SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Khawvel ram hrang hranga hruaitu lian – an Lal, President leh Prime Minister ten dikna leh zalenna an ken kawh zel theih nan

Khawvelah inhuatna, tharum thawhna leh indonate a lo reha, inunauna leh inpumkhatna a lo awm theih nan. He lama hma latu UNO tan

Khawvelah remna leh muanna a thlen theih nan


 

MIZORAM SYNOD MEDIA LAM RAWNGBAWLNA REPORT - By Upa Zonunmawia, Coordinator, Synod Information & Publicity (Synfo)

MIZORAM SYNOD MEDIA LAM RAWNGBAWLNA REPORT

- By Upa Zonunmawia, Coordinator,
Synod Information & Publicity (Synfo)

 

THUHMA:
Kum 1981 Synod Inkhawmpui thurel angin Mizoram Presbyterian Church Synod chuan Electronic Media lama rawngbawlna lamah hma a lo la tan tawh a, Synod Executive Committee (SEC) bawhzui tura dah a ni a (1981 Synod Gen.18). SEC-in Ruahmanna a siamte chu kum 1983 Synod inkhawmpuiah thlenin pawm a ni a (1983 Synod Gen. 48). Ruahmanna an siam zingah chuan “Press and Bookroom hmalak nan Electronic Communication siam a ni ang a. Hemiin a huam tur chu Cassette, Radio, TV. etc. a ni ang” tih a ni. (1983 Synod App. No. 2 II PRESS & BOOKROOM D. Electronic Communication).
 
He ruahmanna hi bawhzuiin 1984 atangin Bookroom-ah Kristian Cassette an zuar tan a. Hralh a tlain Bookroom pawh a tihlun phah hle a ni. (1984 Synod Report : Appendix 15 pp.121). May 1985-ah Synod Electronic Communication cassette siam chhuah hmasak ber chu tlangzarh a ni a. Zaipawlte, Fiamthu thianghlim, zirtirna tha nei thei tur buatsaih tum a ni bawk. (1985 Synod Report : Appendix 12)
 
Kum 1985 chhungin Synod Press Building chungah he Department office tur leh studio tur sak tan a ni a. June 24, 1988 khan Recording Studio chu Synod Moderator-in a hawng a. August 1988 atangin Recording pawh neih tan a ni. (1988 Synod Report : App – 14).
 
Presbyterian Communications inrelbawl dan tharah Electronic Unit kalpui zel dan turah harsatna eng eng emaw a awm a, chhunzawm hleih theih a ni ta lo va. Synod Inkhawmpui (2000) chuan “Electronic Media hmanga rawngbawlna tihthar a, chak zawka kalpui dan tha zawn tha kan ti a, SEC-in lo bawhzui rawh se” tiin a rel thar leh a (2000 Synod Gen. 29). SEC chuan ruahmanna siam tur Sub –Committee a ruat a. Sub –Committee ruahmanna siam hi pawm a nih hnuah Synod Electronic Media din a lo ni ta a, a enkawltu tur SEC hnuaiah Sub –Committee din a ni a, Executive Secretary i/c Publicity-in a ho ta a ni.
 
Kum 2002 April thla khan Synod Archives Room sirah Office hawn tan a ni a, Coordinator 1, Recording Technician 1 leh Office Assistant 1 dah phawt a ni a. Electronic Media Sub -Committee rawtna angin SEC-in Synod Inkhawmpuiah Synod Electronic Media hming thlak dilna a thlen a, Electronic Media tih chu Synod Information & Publicity tia thlak a ni leh ta a (2002 Synod Gen. 47). A lam tawiin Synfo tih a ni.
 
SYNFO RAWNGBAWLNA TLANGPUI:
Synod Electronic Communication Office leh Studio te chu thil dang atana hman a lo nih tawh avangin hman zui a remchang lo va. A tir phat atangin hmun hma tur ngaihtuah nghal a ni a, Property Committee-ah te thlen thin a ni a. Hmunhma tur remchang a awm mai loh avang leh Synod Office Building pumpui sak that tumna te a awm avangin hmalakna lian tham a awm thei meuh lo va.. Synfo Committee ruahmannain theih ang tawkin hetiang hian rawngbawlna kalpui a ni.
 
Audio Recording: Inkhawmpui Sermon te Audio Recording tih thin a ni a, hei hi Compact Cassette emaw Audio CD-in emaw siam chhuah thin a ni a. Audio Cassette leh Audio CD lam hi a hmangtu an tam tak loh avangin tih chhunzawm a ni ta lo.
 
Local TV Programme: Local TV Operator-te nen tangrualin Synod hnuaia Inkhawmpuite a remchan dan azirin Live coverage tih thin a ni a, a hnuah playback tura pek a ni thin bawk. Khawpui pawn lama Inkhawmpui nghah a nih chuan video-a thlalak sate Aizawl lam TV-a tihchhuah turin thawn thin a ni. Mipuite hnena puanzar awm chi programme te News atan pek thin a ni bawk. Tin, Kohhran hun pawimawh (Kum Thar, Chanchintha thlen ni, Harhna Thlen Ni, Tumkau Ni, Good Friday/Easter, Pentikos Ni, Ramthar Ni, Krismas, etc.)-ah Sermon Video buatsaih thin a ni a, hengte hi Local TV hrang hrangah pek thin a ni a. Pathianni hun remchanga tihchhuah turin sermon chi hrang hrang pek thin a ni bawk.
 
Tin, September, 2010 atang khan Synod Mission Board Media Ministry nen tangkawpin kar tin Hindi Gospel programme – Susamachar Prasaran buatsaih tan a ni a, hetah hian Pathian thuchah leh fakna hlate dahin Local TV 2– LPS leh Zonet atangin Pathianni tlaiah tihchhuah thin a ni.
 
Radio: Synod chanchinthar langsar zual puanzar tur chite AIR, Aizawl leh Lungleiah pek thin a ni a. Transworld Radio te nen tangkawpa zau zawka rawngbawl dan tur dap a ni tawh a, rokhawlhna engemaw avangin la tihpuitlin loh a ni.
 
Website: Mizoram Synod website www.mizoramsynod.org siam a ni a. Hetah hian Mizoram Synod chanchin tlangpui, Department hrang hrang chanchin leh News te tarlan thin a ni a. Tin, hunbi neia chhuak chanchinbu - Synod Newsletter, Kristian Tlangau, Kristian Thalai, Agape, Ramthar, Kristian Naupang, Presbyterian Review leh Didakhe te chhiar theih leh download theiha dah a ni a. Nilai Zan & Beihrual Thupui, Puitling Sunday School Zirlai leh Kohhran mite tana tangkai tur thil dangte dah a ni bawk.
 
News Update: Synod chanchin thar tarlan awm apiang TV, Radio leh chanchin thar lakhawmtute hnenah pek thin a nih bakah kar tin (Ningani apiangin) Synod chanchin thar tarlanna “Synfocity” tihchhuah thin a ni a, heng hi website-ah dah ziah a ni a, thuthar lakhawmtute hnenah pek thin a ni a, veng hrang hranga Kohhran/KTP chanchinbu buatsaihtute hnenah pek thin a ni bawk. Kan missionary-te leh khawvel hmun dang danga Mizo awmte mi 500 chuang hnenah Email leh Fax hmanga thawnchhuah ziah thin a ni bawk. Tin, Kristian Tlangau leh Synod Newletter-a chhuah tur Synod rawngbawlna thu tharte thla tinin pek thin a ni bawk.
 
Video/Films: Synod hnuaia Department hrang hrangte programme pawimawh Video coverage tihsak thin a ni a, TV News-a pek bakah a tul dan azirin full coverage tiha CD/DVD-ah dahthat thin a ni. Bible Films thenkhat Mizotawnga dah (dubbed) a ni a, Music Video siam nual a ni tawh a, Kohhran Hmeichhe Documentary Film leh PresCom Documentary Film siam tawh a ni a, Film puitling pahnih – “Kum Tluang” (Christian Love Story) leh “Beiseina Eng” te siam a ni tawh a; tun hnaiah Presbyterian Church of Wales lam atanga ngenna angin Hmangaihna In documentary film siamsak a ni a. Tunah hian Synod pum pui rawngbawlna Documentary Film 2010 (Maichama mei nung reng) chu tlangzarh theiha peih a ni ta bawk.
 
Thil dang: Heng bakah hian Synod Email-a lehkha pawimawh lo thlengte dawn khawm, sem darh leh thawnchhuah hna thawh a ni bawk a. Synod danga palaia kal tur Report siamsak te; Synod Brochure, Synod Telephone Directory leh Tawngtaina Bu siam te, Video Films hlui CD/DVD-a dah hna te thawh a ni bawk.
 
RAHBI THAR:
Kum 2009 Synod Inkhawmpuiin, Synod Information & Publicity hmalakna chak zawka kalpui dan tur kawng SEC-in lo zawng rawh se, (Synod 2009 Gen. 38) tia a rel chu, Synod Information & Publicity Sub-Committee-in Information & Publicity Kaihhruaina Dan en that an dilna nen la kawpin SEC-in a ngaihtuah a. Synod Information & Publicity Sub-Committee-in lo zir chiangin Inkaihhruaina Dan pawh a tul angin lo en tha sela, tiin a rel a.(SEC 228:23). Synod Information & Publicity Committee chuan Budget siam nena kalrualin November, 2010 Synod Executive Committee thutkhawma thlen hman turin ruahmanna siam ni se, tia a rel angin ruahmanna zau zawk siam a ni ta a. Synod Building thar luah a nih takah chuan Office room zau zawk leh Recording Studio tur te neih a ni ta bawk a. Ruahmanna ang ang chu SEC-in pawmpuiin budget ruahmanna pawh Synod Inkhawmpui 2010-in a pawmpui ta bawk a ni.
 
Ruahmanna tharah hian All India Radio, Aizawl FM Zo Awi-ah Zirtawpni zan dar 7:30 -8:00 chhungin programme buatsaih ni se, hetah hian Fakna Hla, Thuchah, etc. tihchhuah thin ni se, Local Cable TV Operator 2 – LPS Vision leh Zonet kaltlangin Pathianni tlai dar 3 velah darkar 2 chhung programme buatsaih thin ni bawk se, tia rel a ni a. AIR leh Cable TV Operator-te dawr nghal an ni a, an lo inhawngin min phurpui hle a. Synfo Committee chuan Radio leh TV programme kalphung lo duang tur leh bawhzuitu tur sub-committee a hran ve vein a din a. Anni hian an ruahmannate Committee Meeting-ah pharhin Committee-in a pawmpui tawh bawk a ni. FM Radio leh TV Programme hmingah hian “HRUAINA ENG” tih hman ve ve a ni ang. Ruahmanna ang ang hi Synfo Office lam lo bawhzui tura dah a ni a. FM Radio programme hi November 11 (Zirtawp) zan dar 7:30 atanga tihchhuah tan tur leh TV programme hi November 13 (Pathianni) tlai dar 3:00 -5:00-a tihchhuah tan tura ruahman a ni.
 
Synfo kaltlanga Mizoram Synod-in Media rawngbawlna a kalpui tawh chinah Print Media, Radio/Doordharsan leh Cable TV lama kan thawhpuite tawiawmna kan dawng tha hle thin a. Kan rawngbawlhona hi Pathianin mal a sawmin a thlen phak chin chinah midangte tan pawh malsawmna a nih zel kan beisei bawk a ni.

 

Note : He thu hi Mizoram Synod FM Radio & TV Programme (Hruaina Eng) hawnna leh hlanna programme, November 7, 2011 a  neiha a report a ni.

 

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2659614


Synfo © 2006 : All rights reserved. Mizoram Presbyterian Church Synod : Best @ 1024x768