SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Khawvel ram hrang hranga hruaitu lian – an Lal, President leh Prime Minister ten dikna leh zalenna an ken kawh zel theih nan

Khawvelah inhuatna, tharum thawhna leh indonate a lo reha, inunauna leh inpumkhatna a lo awm theih nan. He lama hma latu UNO tan

Khawvelah remna leh muanna a thlen theih nan


 

MODERATOR VALEDICTORY SERMON - Rev. C. Lalsangliana, Synod Moderator, 2011

THUHMA :
 Pathian Kohhranho duhsakna ropui tak avangin Synod Moderator atana thlan ka lo ni ve a. Ka huphurh hle a. Pathian khawngaihna leh rawngbawlpuite – Synod Palaite, Board Committee hote, Synod Office-a thawhpuite, ka nupui fanaute tawiawmna te, hmun tina min tawngtaisaktute avangin hun tawp ka lo thleng ve ta a. Pathian leh Kohhran hote, min dawmkang tute hnenah lawmthu ka sawi a ni.
 
 He hna ka chelh chhunga Kohhran hote thatna leh min duhsaknate avanga lawmthu ka sawi rualin, min sawmtute beisei ka tihhlawhtlin kim sen loh avang erawh chuan thupha ka chawi nghal bawk a ni.
 Moderator hna ka chelh chhunga kan Kohhran hmasawnna, kawng tam tak chu report pek zanah ka sawi lang tawh a. Presbytery thar 3 lai hawn a ni a.
 
 Thil thar lawm leh hawn : Women Centre lungphum te, Synod Choir Cabin hawn, Biak In thar leh Synod Department thil thar hlan leh hawn tam tak a awm a. PRESCOM Centenary te, Kristian Tlangau Centenary lawm te, Kohhran mal Centenary leh Jubili lawmte, sawi kim vek sen loh a awm a. Pathian ram thilpeka hmasawnna te, Pastor leh Missionary leh thawktu dang lo pung zel te, member thar te, ringtharte , Synod lam Department-in Hruaina Eng programme, TV leh Radio lama kan hawn tharte a awm bawk a. Lalpa kan Pathianin vawiin thlenga min hruaina hi a ropui a. Lawmthu i sawi ang u.
 
 Mizoram chhung leh India ram hmun hrang hranga Mission Field tlawha ka zinnaah te, Foreign ram pahnih – Bangladesh leh Presbyterian Church of Wales ramte tlawha ka zinnaah te thil tam tak hriat leh zir belh ka nei a. Pathian ram tulzia te rilru-ah a thar hle a. Sawi tawh ang khan hmun tina kan Kohhran mi leh sa, mi inpe leh entawn tlak tak takte kan nei a. Chutih laiin sualin min rûn mek a. Kan thalaite ruihhlo, mipat hmeichhiatna leh kawng hrang hrangin sualin chawl hauh lova min beih mek avangin Lal Isua thuchah, “Hetah hian awm ula, mi venpui rawh u,” tih thu kan thuchah laipui pakhat a nih thu kan sawi lang tawh a.
 
 A ni tak a, Pathianin Missionary-te hmanga a din, harhna thlipuiin a nuai tawn vel reng ni mah ila, mahni awmna hmun leh kan nitin hna theuhvah venpui hna kan thawh loh chuan, Ezekiela 22:30 thu angin ‘Ram chu ka tihchhiat loh nan, ram chhana ka hmaa tang tur leh dai theu tur mi ka zawng a, ka hmu si lova. An sualna angin anmahni ka hrem ta hlawm a’ tih thu te kha kan chungah a thlen loh nan theihtawp i chhuah ang u, kan ti kha a ni a. Chumi belhchhah chuan kan thu ken dang pakhat, “Puitlin lam i pan ang u,” tih thu hi Valedictory Sermon thupuiah hmangin i lo ngaihtuah ho ang u.
 
 PUITLIN LAM I PAN ANG U (BR. Heb. 6:1–2, Phil. 3:12f)
 

 I. Puitling awmzia :
 
Puitling emaw puitlinna tih thu hi Bible hmun dangah, hmasawnna, thanlenna, nih tur ang ni phak, tiam chin thleng, rahchhuah nun, intodelh, mahni kea ding thei, inenkawl thei, dawngtu ni lova pe chhuaktu, midang tana nun sawina te, hmu tawh reng leh famkim tite a sawi a ni a.
 
 Chu chuan taksa, rilru leh thlarau lama ringtu thanlenna te, mimal, Kohhran leh hnampum huapa hmasawnna leh thanlenna te a huap bawk ang.
 
 Leh pek awm lo khawpa fel fai, famkim sawina erawh chu a ni lova, Grik mifing Pythagoras-a chuan amah zuitu te chu zirlai (hoi-manthanontes) leh puitling zir chhuak (hoi telei oi) a vuah a. Philo-a chuan zir tantir (hoi archomenoi) hmasawn mek (hoi prokoptontes) leh puitling tan (hoi teleio menoi) a vuah an ti.
 
 Hmasawn loh leh puitlin lam pan loh hi a pawi a. Thanlen lam pan loh chu a neitu tan a lungchhiat thlak thin. Paula chuan “Krista chu nangmahniah siam puitlina a awm hma loh chuan nau veiin ka vei leh che u hi” a lo ti a (Gal. 4:19). Hringtu nu leh pa-in fate hmasawnna, thanlenna lam an thlir a. An rualpuite nen an teh reng thin. Rah chhuah lo nun chu Lal Isuan ‘Kit rawh’ a tih kha a ni.
 
 II. Puitling turin pian phawt a tul :
 
Mizoram Kristian ten kan buaipui ber chu pianna lam a ni. Thanna lam chu engpawh ni se, puitling tur chuan pian phawt a tul tih kan chiang a. Pian loh hlauvin kumtin kan camp tlur tlur mai a. A tha e. Mahse puitlin lam ngaihthah khawpin kan buaipui a ni lo maw?
 
 Pian dan chi 2 a awm. Nuin hrin pangngaia a hrin leh zai chhuah a piang te ang hian, Fa nihna bo chuang lo ve ve si hi – pian dan chi khata inpiantir kan tum a, kan buai niin a lang.
 Ringtu nunah Timothea anga ringtu chhungkuaa piang a, lo seilian kan awm a. Naupan tet ata chhandamna hmu khawp a – thanlenpui khawpa thutaka chawm seilen – Upa, Pastor te, rawngbawltute an ni. Pianni leh thla, speaker – hre lem lo ho Timothea te anga Testimony rura tak leh ngaihnawm tak an nei lem lo. Heng mite hi an nghet a, an tlo va, an nghing fo lova. Kohhran mi rinawm an ni fo mai.
 
 A dang leh chu Paula te anga inlet thawk, ri phut mai, Nicky Cruz-a te, John Newton-a te anga khawvel nun dai a; lo chen tawh te an lo piangthar a. An thawm pawh a na, a lawmawm a ni. Rawngbawltu tha, nghet leh tlo, mi rinawm pawh an awm.
 
 Hetih lai hian kan ramin kan pawm kawp thiam loh a awm a. Pian dan pangngaia piangte hnawlin, tha tlawn, tha ngawl vei, Kohhran rawngbawl tiin kan deu va. Paula te ang leh Nicky Cruz-a te ang nih tir kan tum a. Mi beidawng tam tak kan siam a, a buaithlak hle.
 
 Piangthar tha ni tur chuan sual kawng han zawh a, han tal buai ve deuh kher tur ang zawngin kan ngaihtuah em ni, a tih theih ta. Ar talh sual ang maia thi hlei thei lo, vulh leh tlak tak tak tawh si lo kan siam ta. Piangthar tha, tui leh Testimony nei tha te ho lah mi thenkhat rei lote ah an zuai leh a, tam tak chu an nun hluiah an kir leh a. Camping dang kan mamawh leh thin.
 
 Piantharna Quality sang – da leh thei lo, chuai thei lo kan zawng a. Famkim lohna khawvelah famkim tumin, mitthi zingah mi nung kan zawng thin.
 
 I pawm kawp thiam ang u. A sawngnawi hi an piang lo a ni lo. Thanlenna leh puitlinna kawng an mamawh zawk a ni.
 
 Nu pumah, camping-ah hnawh luh nawn leh a, an pianthar vanglaia talh mai chi ni awm tak kan inchhuah teuh mai a. Heti tur hi em ni dawn?
 
 Camping, campaign ka sawichhia a ni lova. Kohhran thanlenna, puitlinna lam pan a hun thu sawi pahin, Zoramin kan pawm kawp hleih theih loh hi chin fel tulin ka hria a. Zai chhuah pawh, hrin dan pangngai, Kristian chhungkuaa pianna pawh i pawm ang u. Insawi chhe tawn suh ang u, kan ti zawk a ni.
 
 III. Puitlinna kawngpui pahnih :
 
 1. Pawn lam Nun
 
Mihring nun puitlinna hian pawnlam taksa thanlenna leh chhunglam - rilru leh thlarau lam thanlenna leh puitlinna a huam.
 1. Pawn lam thanlenna : Taksa thanlenna leh ringtu thanlennaah pawh hei hi a dik ve ve a ni.
 
 (a) Numerical :
 
Pumraw lama thanlenna chuan – a len zawng, nambar-a thanna a kawk a. Kohhran punna te, thawhlawm, ringthar, thawktu thar, member thar, etc. a punna lawmawm Pathian hnena lawmthu sawina tur tam tak kan nei. Kohhran mi rinawm, hmantlak; thilpek ah te, rinnaa mi puitling, nghet leh tlo an lo pung zel a. A lawmawm hle. Pian punna lamte pawh chhungkaw 12 zela naupiang pakhat chauh nei ang kan ni a. In chhût ngun ang u.
 
 (b) Qualitative :
 
Pawn lama thanlenna, punna leh hmasawnna ngawt pawh hi a hluin a ropui a, chutih laiin quality a awm em? Mimal nun leh rawngbawlna, Kohhranah chetvelna leh hmalakna, kan zaipawl leh Kohhran rawngbawlna ahte hian i en ngun ang u. Zirna leh thiamna lamah pawh degree sang tak pawh nei ila, quality nei lem lo emaw, a duplicate emaw a lo nih chuan rah tha a awm thei lo. Thawktu leh ringthar, thilpek te pawh a tam lam a pawimawh rualin kan inenkawl dan quality pawh i en tha ang u.
 
 Ka sawi hreh hle na a, sawi lan tho ka duh a. Mi fing zawkte chuan an sawi duh kher lo thei a. Mahse Synod Palaite-a thil a nihna tak kan hriat theih nan han sawi ila :
 Pastor pakhat chuan fate hmalam hun thlirin private skul-ah a luhtir a, hun lo takin an thi ta a. A pension hlawh tlem te Rs. 5000/- vel nen pa tel lovin an nu chuan a enkawl a. Pension dan thar a lo chhuak a, Rs. 3000/- awrh an hmu ta a. A mangang hle mai. “Dam chuan chaw ei kan la duh ve si a, ka tlin lo a ni, ‘Kan nufa zaa thih dial ka va duh em,” a ti a. An fate skulah kalin ka report a. A free-in an kaltir ta a. Ngaihtuah a ti thui hle mai.
 
 Thawk zo deuh leh awm thei deuh tan lo chuan rawngbawl tura inpek ngam a har tan ta. Thil man engkim a to zel si a. Engtinnge ni zel ang le.
 
 (c) Organic growth :
 
Taksa leh a pengte hi tha taka puitling a, hmantlaka a thanlen theih nan, peng tinte inkhairual taka an than chhoh zel a tul a, Kohhran leh a rawngbawl hna pengte pawh chutiang chu a ni.
 
 Hlamchhiah bik emaw, ngaihtuah bik emaw, peng dangte mil zela an ruala thang lo fâl bik a awm chuan a puitling thei lo.
 
 A tira taksa peng lo to chhuak ve lem lo, tlaikhawhnu-a lo piang, thang duang fu si, lo chawr thar ve a awm chuan fimkhur taka enzui a, mithiamte râwna ngaihven a tul thin.
 
 Kan Kohhran leh a rawngbawl hna peng hrang hrang te hi a thahnem thamin, a tha tawk hle a. Hma pawh kan sawnin kan thanglian zel a. A ropuiin a lawmawm hle. Hmanah tirhkohvin thlarau rah te, thilpek thute, rawngbawl hna peng a sawite hi – kum 2000 vel a lo liam hnu pawh hian – hei pawh, hei pawh tiin kan chhar belh lem lo.
 
 Kan Kohhran rawngbawl hna peng tam tak leh tha tak tak hrula peng dang, organ dang lo pung chho zel – para church leh pawl dang, Kohhran NGO dangte hi thatna leh tangkaina tam tak neiin lang mahse i en ngun ang u.
 
 Mahni pawm lai leh kawp lai duh tawk lova kawp lawr duah mai chu chhungkaw tan buaina thlentu a ni thin. Kan vawn lai leh kawp laiah theuh hian lungawi i zir ang u.
 
 (d) Leadership growth :
 
Kohhran puitlinna leh hmasawnna te, a puitlin zelna tur chu hruaitu tha leh rintlak chherchhuah zel hi a ni a. Tualchhung, Bial atanga rawngbawltu leh hruaitu tha tak tak chherchhuah a tul a. Rampum huap hruaitu tha kan mamawh.
 – Mi pakhatin chanvo lian leh tha kawp lawr vak a ni lo
 – Mahni kut kawih, veng/bial vawrh tum luat a awm thei a. Nurse, Missionary, Pro. Pastor lakah te hian a semrual zawng nge, mi tha leh tling kan zawng ang?
 – Mi tha leh tling, ram chhung leh pawn, tualchhunga tangkai thei tur mitmei a, an kawng zawnpui a tul a. Itsik a, daltu leh ngaihthah a, ngaihthah lovin India ram leh khawvel zau zawk thlenga hman tlak i ngaihven ang u.
 
 2. Chhunglam leh thlarau lam nuna puitlinna :
 
Ringtu nun hmasawnna, puitlinna leh thanlenna thu hi kawng tam taka sawi theih a ni a. Tlangpui deuh takin lo ngaihtuah ila.
 
 (a) Rinna leh Pathian fapa hriatnaah (Eph. 4:11–13) :
 
Lal Isua rinna leh amah hriatchian deuh deuhna ah hma kan sawn em? Kan thang zel em? Krismas Putar anga duh duh dil a, pangchang taka a malsawmna dawngtu, nuam leh hlim taka awm kan duh thin. A tha e. Hetih lai hian Paula chuan “Tisa lamah Krista chu lo hre tawh mah ila, chutiangin kan hre tawh lo ve,” a lo ti a. II Kor. 5:16 – Isua Krista a hriatna leh a rinna lo puitlin zel dan sawiin, ‘Eng ang pawha lungawi zel te, tlai leh puar, riltam a awm dan a thiam tawh thu te’ a sawi a. Isua Krista hriatna ropui bik zia avangin, atana hlawkna tur awm apiangte hnawl a, hnâwmhnê leka a ruat thute kan hmu a. Hnung lama thil awmte theihnghilh a, hma lama thil awmte ban a, Krista koh chhan lawmman hmu tura tiamchin lam pan zel a tul thute, puitlingte rilru putzia tur a nih thu sawiin – Krista rinna avanga felna nei a, a thihna tawmpui a, a thawhlehna leh tuarna te tawmpui a, amah nena an lo inhriat chian lehzual zel a chak zia te a sawi a. Kei atan zawng nun hi Krista a ni a, thih pawh hlawkna a ni a tih kha. Phil 1:21
 A nuam leh hlimawm chin ngawt ûm lova, Krista vanga tuar leh chân ngam, mualphopui ngam ni tura inzirtir hi kan puitlinna lam tur a ni dawn lawm ni?
 
 (b) Thu-khat vuaa puitling (Eph. 4:11–13) :
 
NGO te, pawl leh association leh party lamte an inthurual thiam hle a. Pathian thisena lei, thlarauva a hruai leh a chenchilh mek Kohhran te puitlinna leh hmasawnna chu inpumkhatna, inlungrualna leh thawhhona tha neih leh vawn nun hi a ni.
 
 Lal Isuan a Pa hnena min dilsak kha a ni a. Unau kara inremlohna tuh/siam hi Lalpa huatzawng leh a ten zawng tak a ni. (Thuf. 6:16–18)
 
 Tualchhung atanga Bial, Presbytery leh Synod-a thawhhote, Tualchhung Kohhrana rawngbawltu inpumkhatna tha te, Committee leh Department khat chhunga thawhhona te hi Pathian duhzawng a ni a, i vawng nung zel ang u.
 
 Ashoka Pillar ang maia dingho, hawi hrang si te, Pawl leh laina, vua leh vang neih tlat te, Tan bik nei a, hleih nei taka awm te hi Pathian chhungte zia a ni lova. “Chhungkua leh ram pawh, indo apiang an ding chhuak lovang,” Lal Isuan a tih kha i hre reng ang u. (Mat. 12:25f)
 
 Pathian mi thlan, mi thianghlim leh duh takte awm dan tur Kol. 3:12ff a mite hi i vawng nung zel ang u.
 
 (c) Lal Isua anna kawnga puitlinna :
 
Hmasawnna, thanlenna leh puitlinna kawng dang kan hmuh chu Rom 8:28–29 thu hi a ni. “Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria; a hriat lawkate chu ama Fapa ang taka awm turin a ruat lawk si a, a Fapa chu unau tam tak zinga fa tir a lo nih theih nan,” tih leh Philippi 2:5–11 “He rilru Krista Isua pawha awm bawk kha, nangmahniah awm rawh se,” a tih – Inngaihtlawmna leh thuawihna thute kha an ni.
 
 Kan tunlai Kohhran dinhmun enin he thil pahnih hi kan mamawh tak meuhvin a lang ta. Synod thurel zawm leh bawhzui thu-ah te, Presbytery leh Bial-ah te, Tualchhung Kohhranah pawh ni se, Kohhran Aw chu ‘Pathian aw’ a ni ti a thuawihna hi kan zir thar leh a ngai ta.
 
 Thinlung hmin zana thuawih a awm a, hmingchhiat leh mi chhinchhiah fal bik nih hlauva rilru hmin lo chung emaw Misualin thlawhna an hruai kawi a. Vauna karah thih hlauh vanga thuawih anga inlantir te a awm thei. Lal Isua anga “Keima thu ni lovin nangma thu thu ni zawk rawh se,” ti theitu nih hi Lal Isua anna a kan puitlinna tur chu a ni.
 
 Tlangkawmna :
 
A tira sawi lan tawh angin kan Kohhran leh Inkhawmpuiin hma a sawn zel a. Kan dinhmun te ngun taka thlirin thim ata min hruai chhuak a, a êng mak taka min luhtirtu hi hre reng ila. Min hotu thatna entirin venpuitu tha ni turin inbuatsaih ila. Puitlinna tur kawng kan sawi takte kha hlenchhuah theuh i tum ang u.
 Lalpan a thu malsawm rawh se. AMEN

 

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2660274


Synfo © 2006 : All rights reserved. Mizoram Presbyterian Church Synod : Best @ 1024x768