SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Synod Puipate – Moderator, Secretary te, Finance Officer-te, Statistician leh Executive Secretary te tan

Damlo leh harsatna chi hrang hrang tawkte tan

Wales rama Presbyterian Kohhran tan – Pathian Thlarau Thianghlim tihharhna leh tihchakna an dawn zel theih nan


 

ENG MI NGE I NIH? - By Upa Bonny Lalrindika, Asst. Coordinator, Synod Information & Publicity (Synfo)

ENG MI NGE I NIH?
(Matthaia 7:24-27)

Upa Bonny Lalrindika



Mi zawng zawng hian nun pawnlang zawk leh laipui zawk kan nei theuh va. Mi zawng zawng hi kan nun pawnlawi zawk angin kan nung deuh ber a ni. Thil thleng engemaw tak awm lova kan nih dan pangngaia kan kal thep thep lai hi chuan kan nun pawnlawi zawk angin kan awm theuh va.

He dinhmunah hi chuan tunge ka nih chiah tih hi ka bula mite tan hriat theih a ni lo. Kan nun lungphum sawi che tham thil kan tawn chiah hian kan nun laipui zawk chu a lo lang thin a. Kan mizia tak tak chu chutiang hunah chuan a lo intar chhuak thin.
Kan la rah ngai loh dinhmun sanga kan awm hunah te. Kan beisei ngai loh dinhmun chhe taka kan tluk luh hunah te, kan thenawmten kan neih phak loh thil an neih ni te hian kan ze dik tak chu a lang thin. Hetih huna kan awm dan hi kan nun dik tak, kan ze dik tak chu a ni.

Nitin sikulah zirlai mize enna a awm thin a. Progress report card-ah hian Character tih a lo lang thin. Kan hriatthiam thin dan chuan Nungchang tih hi a ni ber awm e. Sapin character an tih hi chu a chunga thil lo thleng azir zela mihring nun dan, a chhe lam a tha lamin min rawn tlakbuak huna kan lo dawnsawn dan hi a ni a. A chunga thil thleng laka ding nghet tura mi a nun chhungril lama chakna inphum ru hi a ni. Chu chu pawn lam atangin a hmuh theih loh a ni.
I ngaihzawng chu a chhungril i hmuh theih loh avangin i neih hnuah i rin aiin a lo nep daih a. Thuamhnaw awh zawng ber a inbel laia mi hlim thei tak anga lang hi a duh ang a neih theih loh hunah a lan dan aiin a lo chhe daih thin. Mite fuihna thu sawi tur hre tha deuhte hi a tak a lo thlenin a nep nep an ni chawk. An nun ze pui kha a rintlak lo a ni

Tawngtai taima tak, an chhe tak a awm theih a, lam peih tak, hrawn harsa tak a awm theih bawk. Nun ze pui chu kan nun min nuaitu thil chi hrang hrang laka kan awm nem leh awm khauh dan hi a ni. Chu chu a rintlak loh chuan thil tha lo lakah himna a awm lo va, thian kawm azirin kan chhiain kan tha vel mai mai a, chawhmeh azirin kan zaidamin kan thin a chhe vel mai mai thin.

Dam khawchhuak tur hian he nun zepui kan tih tak hi a nghet tur a ni a, a mumal tur a ni. Sap nula nalh deuh a hmuhin a inthuamna a ngaihnep phah ringawt tur a ni lo va, mi pa hausa deuh a hmuhin amah hringtu pa a iai phah ngawt tur a ni lo. Mahni inhmusit a mi dang nih a duh hun hun chu a at hun a ni mai

Bible thianghlima Isua tehkhin thuah khan in pahnih kan hmu a. A chelh dingtu lungphum, an innghahna a inang lo a ni. Mahse a khawi zawk chu nge rinawm zawk tih chu pawn lam atangin a hriat theih loh. A takna ngeiin a rawn fiah tur a ni.
Lammuala hnam incheina inbel rang nasa takte zingah hian vai rama Mizo aia vai kawm nuam ti zawk an awm teuh va, Mizona ze pui hi thuam lamah ni lovin chhungril lamah a awm. Tawlhloh puan ngaina tak, thlan laih nikhuaa lut ngai mang lo, puanchei ngaina tak, YMA hnatlanga kal nachang hria, thawh nachang hre lo an awm teuh.

In pahnihte chu khawi nge duhawm zawk a, rintlak zawk tih fiah turin ruahpui leh thlipui a lo thleng dawn a ni. Tichuan a fiahtu tur chu a lo thleng ta a, a rapthlak ngei mai. Thlipui leh ruahpui lo thlen hmaa awm dan anga awm chu a harsa tawh a ni.
Chuti chuan pakhat chu a tlusawp ta nulh mai a. Tiau vaivuta sak a nih vang a ni. A lungphum a rinawm lo a ni. Thlemna tawh vanga tlu aiin thlemna tawk tlak khawpa chakna nei lo kan nih vanga tlu kan tam zawk. Zu te hi a awm vanga in kan ni lo va, hnar theih loh vanga in kan ni zawk a. Zu awm loh vanga nghei hi zu ngam an ni lo va, a awm luau lai pawha ngainep thei mi hi zu ngamtu chu a ni. Chu nun chu a character chu a ni
In tlu ta hian a tluk chhanah khan a nuaitu thlipui leh ruahpui kha mawhchhiat viau sela a pawmawm hle maithei. Mahse a bulah khan a tuar ang chiah tuara tlu ve lo a awm tlat mai. Chu chuan thiamloh a chantir ta tlat a ni.
Kum 2009 atang khan Zoramah hian mahni intihhlum a lar ta hle a. Kuminah pawh hian mi 50 chuang an intihlum leh tawh ni a hriat a ni. Hengho hian an chhiatna bul berah an thil tawn hrehawm kawh tur an hre teuh ngei ang. “A dinhmun kha a harsa ve em bawk a ni,” tih theih mi an awm fo. Mahse an tuar ang tho tuara tlusawp ve lo, an tawn ang tho tawnga la intihlum ve lo, an retheih ang thova retheia ruihhlo khawih phah ve lo, an tuar ang tho tuara titau ve lo, An hlawhchhamna ang thova hlawhchhama bansan phah ve lo kha an bulah an awm teuh mai.

I nun zepui kha en chiang la, mangan ni atan a rintlak em tih en fiah rawh. Khawvel hian kan nun min khawih chhiatsak thei leh kan future min tihchhiatsak thei thil tam tak a la rawn pho chhuak zel dawn. Nun ze pui nghet i neih loh chuan mi tih dan entawnin i tar thak ang.

Media hian tunlai mite nunah thu a nei thuk tawh lutuk. Nang erawh chu inveng la, TV leh Internet atanga i thil hmuh theihte hi i nun dan tur reltu an nih phal suh. Education atan hmang la, inthununtir suh. Pathian tih la, a duh dan chu tehfunga hmangin i awm dan turah chuan nangmah ngeiin thutlukna siam ang che.

Nun ze nghet nei lova nghing mai mai mi nih hi vanduaithlak tak a ni. Hetiang mite hi humsual dai thinte an ni. Be All You Can Be tih bu ziaktu John C. Maxwell chuan, Vawiinah hian nun man i pek hmasak chuan nakinah a pung nen i la tel leh ang a, nun hi i chen hmasa a nih chuan nakinah a pung nen i la rul leh vek ang,” a ti.

Nun chen hmasa a pung nena rul leh mekte awm dan hi a awhawm lo a ni. A chhiat a that bih chiang lova mi tih dana innghatte chanvo a ni tlangpui. Information technology sang zel avangin zawh atana tha kher lo kawng zawh chakawm an zuar tam tual tual a. Hengte hian kan nun tha min laksak i phal hauh lo vang u.

Thei kung mawi lai ber chu a par hun lai a ni a. Mahse thei kung tana pawimawh ber chu a rah awm dan a ni a. Thei kung ven him pawimawh ber hun chu a par lai a ni. In mawi ber lai hunah in par mek hlawm a. Inven that in mamawh ber hun a ni.Tichhe tur che u hian setana bumna thil itawm tam tak in hmachhawn dawn avangin, hetih hunah hian nun in chen a nih vaih chuan in la tap leh dawn. I nunah harsatna a lo thleng a nih pawhin a danglam lo. Hei hi hringnun nihphung a ni.

Hringnun hi tuifinriat ang a ni an ti thin. Tui inang reng hi mawi taka fawn chang te, rapthlak taka fawn chang te a awm thin. A fawn mawi lawmtu chuan a fawn rapthlak pawh a pawm tel tur a ni. A tha lam leh a chhe lama nun dan thiamte hi character rintlak nei an ni. He character tak hi a ni Lal Isuan min thlak danglamsak a tum chu ni. Pianthar hi harsatna tawh loh nan a ni lo va, harsatna tawk tlak mihring siam nan a ni.

 

 

Share
There are 1 comments to this post
 
lhpachuau,   On Sunday Feb 10 2013 03:59 am
A thu a rilin a ropui hle mai. A man hla ka va ti teh lul em..!
 


 Register
Kids Corner
TELEPHONE DIRECTORY


  Hits:   2449267


Synfo © 2006 : All rights reserved. Mizoram Presbyterian Church Synod : Best @ 1024x768