SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Ram venghimtu sipai chi hrang hrangte tan

Synod Hmangaihna Ina thawktute leh nau hnuchhamte tan

Siliguri Mission Field-a thawktute leh Kohhrante tan


 

KOHHRAN TIAK TIRA THLARAU THIANGHLIM HNATHAWH (PENTIKOS SERMON) - By Rev. C. Lalsangliana, Moderator

Tirh. 2 : 1 - 4


Pentikos Nia thlarau thianghlim lo thlen dan chungchang hi kan ngaihtuahho tur ni mah se la, ka rilrua ka'n thlan chhan tak chu tunlaia keini Mizo Kristiante, Thlarau Thianghlim leh a hnathawh ngaisanga tuipui em emtute hian kohhran tiak tira Thlarau Thianghlim an zinga a lo thlen a, hna a thawh dan leh chumi atanga thil inthlak danglama chu eng nge entawh tur kan neih? Kan lo chhinchhiaha kan zir thar theih nan tiin ka han thlang a ni.

1. Thlarau Thianghlim lo thleng chuan Thuthlung Thar hunpui a her chhuak a ni : An la tawn ngai loh leh hriat ngai loh vana ta ri, thlipui angin a lo thleng phut a. An thutna in chu a tikhat ta vek a. Hmuh theih loh Pathian thil tih theihna a lo thleng a, danglamna mak tak mai a lo awm ta a. Sinai tlanga Mosia hnena Israel mipuite tana Pathian dan pek, an zawm famkim theih loh, hemi nia an hriat reng thin aiah khan nun thar, Krista Isuaa nunna thlarau dan chu an zingah pekin a awm a. Chu chuan a luahlan a, hunpui a inthlak a, Thuthlung Thar kawl a lo eng ta ti ila a inhmeh ber awm e. Hemi hun atang hian tun hnu zelah pawh miin Thlarau Thianghlim zara piantharna leh siam tharna an chanin an nunah hun thar a lo thleng a, tih danglamin an awm thin. Thuthlung Hlui hunah zawlneiten rikrapna chanchin tha an puang a, 'In hmaah nunna leh thihna, malsawmna leh anchhia ka dah' tiin Pathianin a zawlneite a autir thin a. Tun hunah erawh chuan beiseina kawl a lo eng a, 'Amah chu tu pawh a ring apiang an boral loha chatuana nun an neih zawk nan' tih te, 'Khawvel thiam loh chantir turin Pathian a fa khawvelah a tir lo. Khawvel amah avanga an dam theihna turin a tir a ni zawk e' tih thute kan hmu ta a ni. Chu chu hun thar leh danglamna lo thleng mak taka chu a ni.

2. Rawngbawl turin a thuam : Thlarau Thianghlim thuamna an chan hma loh chuan Jerusalem khua kalsan lo turin kan Lal Isuan a chah lawk tih kan hria. Judai leh Samari ram te, kawlkil thleng pawha thu hretu ni turin Thlarau Thianghlimin a thuam ta a. Chumia a hmanraw pawimawh tak chu Lêi hi a ni. Jakoban a sawi angin Lêi hi khawlohna hlawm, thihna hlo-a khat, sual awm hle hle thei lo chu a ni a. Chu ngei chu Thlarau Thianghlim meiin a kang fai a, Chanchin Tha puanna atan buatsaih a tul a ni. Thuthlung Hluiah mei chu Israelte hruaitu, Pathian awmpuina leh sual kang faitu entirna a ni thin. Pentikos Ni-ah pawh hian Lêi te amaha insem darhin, mei angin an chungah a chuang theuh a, a inlar a, tichuan Thlarau Thianghlimin an khat ta vek a. Thlarau-in a tawngtir ang zelin tawng dangin an lo tawng ta tih kan hmu a nih kha. Heta tang hian zawlneite lêi leh kâ pek an ni a, chu thuamna thar chu sawiin Paula chuan, 'Keini inthuamna te chu tisa ami a ni si lo a, kulhpui nghet takte thiatna tura Pathian zarah thiltithei tak a ni zawk' a tih ang khan thuam tharin an lo awm ta a ni. Mi tinin an hlau ta a, thil mak leh chhinchhiahna tam tak an ti a. Mi zawng zawng lawm zawngin an awm a, chu chu an danglamna lo thleng ta leh Pathian thuamna thar an dawna chu a ni. An thu chuan an thinlunga chhun ang maia na-in ngaithlatute thinlung a hneh a. An sualte an sim a, chuta tang chuan mi tam tak Kristianah an lo inpe ta. Chu thuamna thar chu tuna kan han sawia kha a ni. Keini lam hi engin nge kan inthuam thin? Kan dai hriat te, kan zir thiamna te, kan tawngkam thiamna te, fiamthu leh tehkhinthu ngaihnawm kan hriattea inthuam lo-in, Lalpa thlarau thuamna i dil thar zel ang u.

3. Thlarau Thianghlim lo thleng chuan Kohhran a pian chhuahtir : Pentikos Ni hi kohhran pian nia ngaih a ni. Lal Isua zirtir tia-vai, chau leh beidawngteho kha Pentikos Nia Thlarau Thianghlim lo thleng chuan a kai harh a, a tinung a, kohhran ropui takah a chhawm chhuak a. Mitthi khaw kulh khawngkhar pawhin a ngam loh tur khawpa chak leh thil tithei an lo ni ta a ni tih kan hmu. Tihduhdahna leh nuai chimih tuma Rom sorkarin theihtawp chhuaha a beih pawha a nuai reh zawh loh leh a tih chhiat zawh loh kohhran ropui a lo ding chhuak ta a nih hi. Zawlnei Ezekielan a lo hmuh lawk angin ruama ruhro awm khawmte chu Thlarauin a thawk khum a, chumi azarah chuan nunna an lo nei a, sipai rual ropui tak, Lalpa tana ding tur an lo chhuak ta ang khan he Pentikos Ni lo thlengah hian Pathian kohhran ropui tak a lo ding a, a lo pung ta zel a ni. Tin, kan tunlai hunah pawh sualin a sal behte Biak In lam pan tura hruaitu pawh Pentikos Nia lo thleng Thlarau Thianghlim hnathawh kal zela kha a ni tih i chhinchhiah ang u.

4. Kohhran tipumkhatu a ni : Babel in sangin khawvel a then darh a, innghirnghona te, indona te a thleng zui a. Pentikos Nia lo thleng Thlarau Thianghlim hnathawh erawh chuan chu chu a tuam dam a, mi zawng zawngte Krista-ah chuan van khua leh tui nihna pek an ni a, Pathian faa vuah an lo ni ta. Thlarau hruaia awm apiangte chu Pathian fate tih an lo ni ta thin a ni. Kan tunlai hunah pawh hian chu Pentikos Nia Thlarau Thianghlim lo thlengin mak taka hna a thawh ang khan kan nunah hian Kohhran tipumkhat zawng leh kohhran khat chhunga rawngbawltu intai leh insel ru renga awm thin te min tipumkhat a, Thlarau Thianghlim tanpuina azara inlungrual a, a tha ber induhsak tawn a, inthilphal tawnna hun tha rawn her chhuahtir se la a va duhawm em. Inremna ni, inngaihsak tawnna ni, inhmangaih tawn lehna ni lo ni se la tih hi Lalpa hnenah i dil thar leh ang u.

5. Lal Isua a chawimawi : 'Ani chuan kei mi chawimawi ang, ka ta ami a la ang a, in hnenah a hriattir dawn si che u a' tia Lal Isuan a lo sawi ang khan Thlarau Thianghlim, ringtute hnena a lo thlen khan ringtuten Lalpa an chawimawi a, ama hminga tuar leh mualpho a tul pawhin chumi chung thuah chuan lawmthu an sawi a. Lunga an den hlum dawn lai reng pawhin Stephen-a chuan van lam a en tlat a, Thlarau Thianghlimin a khat a, lunga dengtute tan ngaihdam a dilsak a ni tih kan hmu. Ropui zawk, chan tha zawk chan duh ten tih ropui an duh leh chawimawi an duh a lo inang ta a. Anmahniah Krista chu chawimawia a awm avangin roreltute duhsakna dawn tumna aiin Pathian mit hmuhin Pathian thu zawm hi nangni thu zawm aiin a tha zawk lo maw? tiin an challenge ngam ta a nih kha. Pathian chawimawina dik lo a awm thei angem? Lal Isua aiin mahni inchawimawi tum rawngbawltu a awm theih angem? Pathian hnena chawimawina pe phal lotu Heroda chu chawplehchilhin rulhutin a ei hlum ta tih kan hmu a. 'Lalpa nang chauh hi ka mawina i ni' i ti nawn fo ang u. Ama zara chawimawia kan awm ve tum pawhin Lalpa hnenah chawimawina i hlan phal ang u. Chuti chung chuan engtin nge kan chawimawi ve ang a, chawimawi dan sang ber eng nge ni tih hi i chhut nawn fo ang u.

6. Ringtu hmasate kha Thlarau Thianghlimin a thunun a ni : Kohhran tiak tira Thlarau Thianghlim hnathawh khan a thunun tlat mai a, mite thinlung chhun anga naa thusawi thei khawpin an thusawi mal a sawm a. Chumi azarah 3000 te, 5000 te-in an lo pung a, kohhran a lo pung phut phut a. Lehkha thiam lo leh mi mawl mai an ni tih an hriat renga te pawh kha an finna leh sawipuitu Thlarau Thianghlim chu miten an let thla thei lo a, a hruai a, a duh hunah a la bo a, a rawngbawl tura ko-in a serh hrang a, a nih loh leh an mumangah an kalna tur a hrilh a. An rawngbawlna leh chet velna zawng zawng mai kha Thlarau Thianghlim thununna hnuaiah a ni tih kan hre thei awm e. Keini tunlai hunah hian Thlarau Thianghlim hi thununtu ni zawk awm takin kan che vel em? Kan thusawi leh chet dan hmangah te hian Thlarau Thianghlim thlentir a, thlentir lo theitu anga kan lan changte a awm em? I inenfiah ang u. 'I hnathawh ropui tak kan hmuh leh dawn avangin lawmthu kan sawi e' kan han ti ngawt te hi Thlarau Thianghlim tihlungngaihna leh tih vuina aw-kâ a tling thei angem? Thlarau hruaia awm apiangte chu Pathian fate an ni, tih a nih kha.

7. Engkim a chhui chhuak thin : Kohhran hmasahote khan mi chin tinte a fun khawm a, an nun chhungril thlengin a chhui chhuak a, an thinlunga an ngaihtuah leh tumte a hria. Anania leh Saphiri te nupa chuan fel lo takin thil an ti a, chu pawh chu an nuna Thlarau Thianghlim awm chuan a chhui chhuak a, Petera'n a hau hlum ta tih kan hmu a. Rawngbawltu lar leh thiltithei nih duha tangka sum chelektu Simona chu, 'I rilru Pathian ngaihin a fel lo e' an ti mai a ni. Thinlung sual kalh hawngtu, an nun chhungril sual ber thlenga chhui chhuak a, an sualzia leh an chung pikzia hriat chiantir a, Krista hriatna kawnga an nun tivar a, Krista chu lal leh chhandamtua pawm tura tanpui a, thlemtu leh hruaitu chu Thlarau Thianghlim a ni. Keini hian Thlarau Thianghlim chettir lo-a keimahni tawngkam thiam leh rikrapna te, a nih loh leh kan mike emaw, kan khuang emaw, kan hmanraw dangte hmanga mite thinlung chhut keh a, Lalpa hnen lama hruai kan tum hi thahnemngaihna vang chu a nih ngei laiin, Thlarau Thianghlim chetna daltu a ni thei em? 'Ka thu chu mei ang, tuboh, lung chhut sawmna ang a ni,' tiin Zawlnei Jeremia lehkhabu-ah kan hmu a. Pathian thu hi a nung a, thil a tithei a, khandaih hriam tawn eng ang ai pawhin a hriam a. Nunna leh thlarau, ruh tuah leh thling phel hrang khawp hialin a chhun thei a ni, tih thute kha kan hmu a. Chuvangin Thlarau Thianghlimin Pathian thu hmanga mite nun a chhut keh a, a tuam dam a, a siam tharna tur hian keimahni lam pawhin Thlarau Thianghlim kan nghah peih a pawimawh a ni.

8. Thu tak zawng zawngah a hruai lut ang che u : Thlarau Thianghlim a lo thlenin a thlamuan a, an mit a tivar a, sual thu-ah te, fel thu-ah te, rorel thu-ah te an thiam loh a hriattir a. Isua Krista chu an Lalpa leh chhandamtua pawm tura ngenin, pawm thei turin a tanpui a. Anmahniah felna rah chi tin reng a thawk chhuak thin, tih te. Thu takin bawih a ban ang che u, a zalentir ang che u, tihte kan hmu a. Heng ringtu hmasate nuna Thlarau lo thleng chuan khawvel an thlir dan leh khaw eng an chhaih dan a lo tidanglam a, hlauh tur leh hlauh loh turte, ngaihsan leh ngaih hlut turte a hriatchian thartir zel a. Lei lalte leh roreltute hmaah pawh huai takin an ding thei ta. Tihduhdah leh thlemna karah pawh thih thlengin rinawmin rawng an bawl ta a ni tih kan hmuh kha. Keini ramah hian thu tak kan tih te, Pathian thu kan tihte a inang lo ta hle mai. Bible pakhat hmang theuh si karah hian Thlarau Thianghlim hrilhfiahna leh a hruai dan ni lo-in keimahni ngaihdanin kan kal thui lutuk ta a ni thei angem? Ram rorelna lam en ila, 'Rorelna chuan hnung lam min hawisan a, felna chuan hla takah min dinsan ta. Thu tak chu kawtthlerah a tlu reng a, dikna chu a lut thei ta lo a ni' tih thute leh kan tunlai dinhmun a inang ta viau mai nite hian a ngaihtuah theih. 'Chuvangin thu tak zawng zawngah a hruai lut ang che u' Lal Isuan a tih, Pentikos Ni-a Thlarau Thianghlimin 'thu tak' chu eng nge a nih a rawn hriatchiantira kha keini pawhin hriatchian tumin i bei ang u, Pathian hruaina i dil ang u.

9. Thlarau thilpek leh Thlarau rah : Pentikos Ni-a lo thleng Thlarau Thianghlim chuan ringtute sâwt tlanna tur leh an tana tangkai turin thilpek a pe a. Chung zawng zawng Bible-a kan hmuh chu chi hrang 24 lai a ni. I Korinth 12, Ephesi 4:11, Rom 8:6 leh hmun dang dangah te kan hmu a, hengte hi Krista taksa siam thatna tur leh than lentirna tura pek a ni. Sawt tlanna turin mi tin hnena pek a ni a, chhem alh tur a ni a, hman tangkai tur a ni a, Krista taksa siam thatna tur a ni. Intih milenna tur emaw, intih lalna tur emaw lam atana pek a ni lo tih min hrilh a ni. Tin, Thlarau rah chungchang a han sawiah pawh hian, 'Chutiang bawk chuan Thlarau Thianghlim chuan anmahniah felna rah chi tin reng a thawk chhuak thin' a lo ti a. Thlarau Thianghlim hnathawh zara ringtute rah chhuak chu hmangaihna te, hlimnate, remna te, dawhtheihna te, ngilhneihna te, rinawmna te, thuhnuairawlhna te, insum theihna te a nih thu kan hmu a. Chu'ng rah lo chhuah theihna chu thihna atangin a ni. Lal Isuan buh fang leiah a tlaka amah chauha a awm reng chuan rah a chhuah thei lo, a ti a. A thih erawh chuan rah tam tak a chhuah thin, a tih ang khan sual thihsan a, nun thara nung tur chuan Lalpa Thlarau Thianghlim tanpuina leh sual thihsan ngamna leh Lalpa dan thara nun ngamna hi thil pawimawh tak chu a ni. Kan zingah hian sawi thei tak te, amaherawhchu khawvel nun sual tih sim chuang lo nun te a tam ta em em a. Kristian ram kan intihnaah hian sual a huangtau em em mai site hi inen chiang ila, Pentikos Ni-a Thlarau Thianghlim lo thlengin Kohhran ding tira ringtute nun a khawih danglam dan zawng zawngte ngun taka chhut letin he Pentikos Ni hi a taka kan nuna malsawmna thlentu a lo nih theih nan tawngtaina nen mahni inen fiah nan i hmang zui ang u. Lalpan a thute mal min sawmsak rawh se. AMEN.

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2656359


Synfo © 2006 : All rights reserved. Mizoram Presbyterian Church Synod : Best @ 1024x768