OBITUARY : REV. SIKULFALA (73)

Rev. Sikulfala (73), pensioner chu November 29, 2017 zing dar 3:10 khan a thi a, Rev. H. Lalrinmawia. Synod Moderator kal chhuakin Kolasib Venglai Kohhran Biak inah a vui.

A CHANCHIN TLANGPUI

Rev. Sikulfala hi Upa Lalruanga (L) leh Pi Lalrinpuii (L) te fa upa ber a ni a, 12.7.1944-ah Pûkzîngah a piang a. Pianpui unau mipa pathum leh hmeichhia pathum a nei a. An unau chu hengte hi an ni-
1. Rev. Sikulfala (L) 2. Upa Sapthlengliana
3. Hav. Lalremsiama (L) 4. Pu R. Biakmawia
5. Pi Zothangpuii 6. Pi Lalduhkimi
7. Pi Rohlupuii
Lungtiawii, d/o Khanpuia, Kolasib Hmâr Veng nen kum 1968-ah inneiin fa pali an nei a, chungte chu –
1. Lalmuanawmi
2. Lalmuankimi
3. Lalmuanzuala
4. Lalmuansangi

Zirna lam : Pukzing Lower Primary School-ah Class III a zo va, Phuldungsei ME School-ah Class IV thleng a kal leh a, chumi hnuah Kolasib-ah ME School Class VI zo lehin, St. John High School Kolasib-ah Class VII a kal leh a, Lokicherra Ramthar School-ah Class VIII zo lehin, St. John High School-ah Class IX a zo leh a ni.

Rawngbawlna lam : Kum 1963 June thla Kristian Tlangau Bu-ah Aizawl Theological School-ah Pathian thu zir duh, Class VIII passed chin tan a dil theih tih thu chhuah a chhiar a, chu chuan a rilru a khawih a riau a. Pathian thu zir a, rawngbawltu ngheta awm chu a rilru-ah a lian ta ber a, Bialtu Pastor Thanfianga leh a nu leh paten Matric Pass huna zir tura an tih pawhin Pathian thu zir nghal chu a rilru-ah a awm ta ber a. Tichuan, 1963-ah Aizawl Theological College-a Graduate in Theology (G.Th) kum thum chhung zir turin a interview ve ta a, diltu mi 35 atanga mi 7 an lak zingah a tel ta a ni.

Kum 1967-ah Pro. Pastor atan lâk a ni a, Pastor Thanfianga kaihhruaina hnuaiah Kolasib Bial, Bilkhawthlîr PPV Centre-ah dah a ni a. Kum 1968-a Pastor Thanfiangan lungphu châwla a thihsan avangin Kawnpui Pastor Rev. Lalhluran Kolasib Bial chu a rawn hmui a; hemi hnu hian Rev. Challianngura dah a nih leh tâk avangin an inhrawn leh ta a. Kum 1970 Synod Inkhawmpui, Mission Veng Kohhran Biak Ina neihah Moderator Rev. Thansiaman a nemnghet a ni.
Pastor Bial vawn tawhte:
1. Lengpui Bial : 1971 – 1977
2. Phuaibuang : 1978 – 1981
3. Champhai Vengthlang : 1985 – 1991
4. North Vanlaiphai : 1992 – 1996
5. Thingdawl : 1998 – 2004
Kum June, 1981 – April, 1985 chhung hian Aizawl Theological College leh Cherra Theological College-ah B.Th zirin 1990-ah B.D (External) a zo leh bawk a ni. July, 1996 – 1997 chhung Synod Literature & Publication Board-ah a awm tawh bawk.

Rev. Sikulfala hian mi 4437 a baptist a, nupa tuak 441 a inneihtîr bawk.

Mi rilru zau tak, ngaih dân tlang taka sawi chhuak mai thîn, a dik lohnaah ngaihdam dîl hreh hauh lo, mize tha tak nei a ni a. A rawngbawl chhûng pawhin a tûl chuan camping/campaign-ah pawh speaker-ah a tang mai thei a. Rawngbawlna a nih phawt chuan a tlanchhe ngai lo va, a theih ang tâwkin hmâ a la mai thîn a ni.

A pension kum 2005 atangin Kolasib Venglaia anmahni inah an awm zui ta a. Kolasib Venglai Kohhranah lawiin Social Front Committee-ah Chairman niin mi harsate khai chhuah kawngah nasa takin hmâ an la a; a theih tâwp a chhuah a ni.

Hei bâkah hian Bible Society, Kolasib Branch-ah President te ni tawhin Clean Mizoram, Kolasib District te, Board of Visitors, District Jail te, Mizoram Consultative Forum-ah te telin Secretary a ni tawh bawk.

Hun eng emawti chen atang khân zun thlum avângin harsatna neuh neuh a nei chho a. Kum 2016 tâwp lam atang phei kha chuan a kal lam that loh avângin Vellore-ah te inenkawlin a kal a. Hemi hnuah pawh hian dialysis te tiin vawi eng emaw zât damdawi inah a lût a.

A natna hian a thin lam te a lo khawih tel avângin a thin te lianin a taksa a chak lo zual zel a. Ni 29.11.2017 zing dar 3:10 khân a rawng a lo bâwl thin a Lalpa hnênah min lo chawlhsan ta a ni.

VUINA PROGRAMME

A hun : Ni 29.11.2017, 2:00 PM (Nilaini)
A hmun : Kolasib Venglai Kohhran Biak In
Vuitu : Rev. H. Lalrinmawia, Moderator kal chhuak, Mizoram Synod
Hla sak ho : Chhandamtu, i ropui zârah (KHB No. 421)
Chanchin sawi : Upa F. Lalhmunsiama, Presbytery Secretary (Jr)
Zaipawl : Bial Zaipawl
Thlamuanna Thuchah : Vuitu
Zaipawl : Kohhran Zaipawl
Tawngtaisakna : Rev. Vanlalnunmawia Zawngte, Kolasib Hmâr Veng
Hla sak ho : Hla taka khaw dur leh ruahpui sûr (KHB No. 482)
Malsawmna :
Thlanmual : Rev. Samuel Lalrinsanga, Counsellor, FG&CC, Kolasib