CKTP-IN HOSPITAL CHARITY FUND AN PE A, GRACE HOME AN TLAWH NGHAL

Central Kristian Thalai Pawl chuan Sept. 5, 2018 (Nilaini) chawhnu dar 3 khan Hospital Charity Fund atan cheng nuai nga chu Synod Hospital, Durtlangah an pe.

57th KTP General Conference Rorelah khan Hospital Charity Fund atan hian Thawhtanni zan inkhawm thawhlawm tum khat lak khawm ni se, ti-a rel a ni a. Mizoram hmun hrang hranga KTP Branch ten charity fund atana zan khat thawhlawm an lakkhawm atang hian a thawh khat nan Sept. 5, 2018, Nilaini chawhnu khan cheng nuai 5 chu Synod Hospital thuneitute hnenah an hlan.

Hospital Charity Fund hi CKTP Leader Rev. Dr. K. Lallawmzuala chuan Synod Hospital Director, Dr. LH Thanga Singson hnenah a hlan a. Rev. Dr. K. Lallawmzuala hian KTP ten Synod Hospital hi an ngai pawimawh a, tih theih tam tak awm lo mah se, KTP ten an tih theih chinah chuan Synod Hospital hi an hre reng a, tanpui an inpeih reng a ni a ti a. Synod Hospital, Durtlang bakah John Williams Hospital, Lunglei hmasawn zelna tur leh, mipuite tan belhfakawm a nih zel theih hi KTP member-ten an duh a, KTP General Conference Rorel Inkhawmah pawh sawi chhuah a ni a, agenda-ah hian rawn lut a ni a ti. Dr. LH Thanga Singson chuan KTP ten thahnem an ngai a, Synod rawngbawlna pawimawh taka hetianga thâ an thawh hi lawmawm a tih thu sawiin, Synod Hospital hi mi rethei ber thlenga an pan a ni a. Mi rethei tam tak, damdawi ina an inenkawlna senso nei lote tana KTP-in inphal taka thawhlawm an thawh chuan mi rethei tam tak, an awm man an pek theih loh avang leh an damlohna avanga rilru hah mekte tan damna a thlen ngei ang a ti.

Synod Hospital Coordinator, Upa F. Lalsangliana chuan KTP te avangin kawng tam takin Synod Hospital hi a changtlung a, hma a sawn a, an neih theih loh tur thil tam tak an lo nei tawh thin a ni tih a sawi a. KTP te sum thawh khawm hmangin Mizorama endoscopy khawl hmasa ber pawh Synod Hospital hian an neih theih phah a, a hmun laih, bûk leh thil tul dang hrang hrangah, thisen pêk leh mi rethei chhawmdawl thlengin, hman atanga tun thlengin KTP chu Synod Hospital tana tangkai leh chhuanawm an la ni reng a ni, a ti bawk.

Mizoram Synod hnuaia HIV/AIDS avanga harsatna tawkte enkawlna hmun, Durtlanga Grace Home chu Sept. 5, 2018 (Nilaini) khan CKTP Leader, Rev. Dr. K. Lallawmzuala hovin CKTP hruaituten an tlawh bawk a.

Grace Home hi Presbyterian Church of Wales leh sapram atanga tanpuina hmuh atanga sak leh din a ni a, CKTP chuan he hmun din nan hian cheng nuai 2.2 lai a thawh a. Hei bakah tun thlengin chaw chhûmtu hlawh tur eng emaw zat a tumsak bawk.

Grace Home-a thawktute nen titihona hun hman a ni a, Grace Home hmalak dan leh tuna an dinhmunte sawiho a ni. HIV/AIDS avanga damlo, inenkawlna nei lote hi Grace Home-ah enkawl a ni a. Mi 20 lai awm theihna a ni a, mi 10 bawr vel awm an awm reng a, heng damlote hi nurse leh doctor-ten an thutchilh reng a ni. Grace Home pantute hi mi rethei, HIV/AIDS avanga harsatna tawk, mahnia inenkawlna tur tha nei lote an ni ber.