COUNSELLING TRAINING VAWI 28-NA KHAR

Mizoram Synod, Family Guidance & Counselling Centre (FG&CC)-in Kohhran hruaitute puala May 16, 2018 atanga Synod Conference Centre-a Church Leaders’ Intensive Residential Pastoral Care & Counselling Training vawi 28-na a buatsaih chu May 29, 2018 (Thawhleh) zan khan ‘Final Evaluation & Graduation Service’ neiin khar a ni.

Training kharna hun hi Rev. P.C.Pachhunga, Executive Secretary i/c FG&CC chuan a kaihhruai a, Rev. F.Lalrinnunga, Synod Moderator-in a hmanpui a, training chhuakte hnenah Certificate semin thuchah a sawi. He Counselling Training-ah hian Kohhran aiawh 18 an tel a ni.

Training kharna inkhawmah hian Rev. Lalsangbera, Director, FG&CC chuan inlawmna hun a hmang, Training chhuakte chuan training an hlawkpui dan a lema an ziak chu entirin an hrilhfiah a, Pu R. Laldika, Champhai Kahrawt chuan training chhuakte aiawha thu sawiin, Vaivakawn Pastor Bial Zaipawl an zai bawk.

He hun hmanpuitu, Synod Moderator Rev. F.Lalrinnunga chuan training chhuakte fuihna thu sawiin, training chhuakte chuan an thil zirte chu tangkai taka hman tum turin a fuih a. “Hruaitute chu Kohhranhote enkawl tura Thlarau Thianghlimin a ruatte kan ni a, chuvangin taima takin Kohhranhote tan kan inpe zel tur a ni” a ti a. “Kohhranhote chu mi hrang hrang, harsatna hrang hrang nei kan nih avangin dawhthei tak leh taima takin, Pathian rawn chung zelin rawngbawlna kan kalpui thin tur a ni,” a ti bawk.

FG&CC hian Pastor-te pualin Pastoral Care & Counselling Training hi vawi 27 buatsaih tawhin, Pastor 461 training a neihpui tawh a. Church Leader-te puala kum 2002 atanga training a neihpui tawhah, tun tuma mite nen hian Kohhran hruaitu 576 Training pek an ni tawh bawk a ni.

Synod hian Counselling Centre pasarih – Mission Veng, Bawngkawn, Vaivakawn, Champhai, Serchhip, Kolasib leh Lungleiah te a nei a. Heng Counselling Centre pasarihah hian tun thlenga pantu (Client) an neih tawh zat chu mi 21,639 an ni.