Zawhna:

Kan nupa hi kan hlim ngai lova, bei dawnna nasa tak ka nei a, he website hi ka hmu fuh hlauh mai a. Kan nupa in a hmun ngeiah rawn pan che u ka duh. Eng tikah nge hun a awm theih ang ?

Chhanna:

Hetianga in harsatna te sutkian duhna rilru i nei hi a lawmawm e. Mizoram Synod hnuaiah hian Family Guidance & Counselling Centre, Mission Veng (P.C. Girls School Road)-ah khian Office hun chhungin pan theih reng an ni a, Counsellor tha tak tak an awm reng a ni. Hun remchang hmasa berah kal chhin teh.

Zawhna:

ka bialpa nen hian kum 10 vel kan inngaizawng toh a,kan chhungte lamah pawh harsatna kan neilo a,inneih hial te pawh kan tum ve thin..mahse vawi tam tak kan che sual tawh a,ka bialpa hian chhan ho te te vangin min then fo mai a,hmun khatah kan awm bawk si lo a..tin ka bialpa hian dan 1 na a kan inneih thei tawh lo tih hi a chhungte a hrilh hreh bawk si..vawi tam tak kan sawi dun tawh a,kan sawi fel thei bawk si lo..engtia tih chi nge..ka bialpa hian min duh tak tak lo em mi ni ang?

Chhanna:

I lehkha kan lo hmu a, i zawhna hi i hriat loh in nangman i rawn chhang nghal em aw a tih theih. Inneih hma a mipat hmeichhiatna in lo hman fo tawh avang hian i bialpa chuan neih atan che nilovin a duh duh huna a mutpui tur atan a duh chauh che a ni mai lo maw? Lo ngaihtuah zui teh.

Kan Kohhran in Mipat Hmeichhiatna chungchang thu puan chhuah Bible tlawhchhana, a siam ah chuan Mipat Hmeichhiatna hi Mipa leh Hmeichhia Nupa kar chauh ah hman tur a nih thu a puang a, hei hi kan hriat reng a pawimawh khawp mai

Tanpui i mamawh zel anih chuan Family Guidance and Counselling Centre, Mission Veng emaw Chanmari Biak In hnuaiah kalin emaw Mobile 9856883377 or 9436140055 ah rawn phone ang che

Zawhna:

Engtin nge sex ah hian kan fihlim theih ang ?

Chhanna:

Sex (Mipat hmeichhiatna) hi Pathian in Nupa (Mipa leh Hmeichhia) te inkara hman tura a siam a ni a, Bible kan en chuan Malakia 2:15 ah chuan “Nunna chi neiin, pumkhatah a siam lo em ni? Engah nge punkhata a siam? Chi thlah, Pathian ngaihsak a zawng a ni.” tih ziak kan hmu a, Pathian in nupa a siam chhan pakhat chu fa, Pathian ngaihsak mi an neih nan a ni. Hetih rual hian Nula emaw tlangval te erawh chuan Nupui Pasal neih hma loh chuan Sex hi hman loh tur a niin kan fihlim tur a ni.

Zawhna i rawn zawh dan atangin kawppui i la nei lo ah ngai ta che ila, ringtu i ni ngei bawk turah ka han ngai che a. Sex lakah i fihlim theih nan chuan zing tin Pathian hnenah A venna dil la. Sex hman hi Nula leh Tlangval tan chuan Pathian pawi sawina leh A huat zawng tak ani tih hre reng ang che. Sex mi in an hman dawn in remchang insiam in thlemna ah an lut thin a, nang erawh chuan remchang in siam lo la thlemna ah i lut lo mai ang.. remchang insiam tih hian awm fal te, interek hran te awm lohna tura awm te pawh a kawk thei ang.

Website ah hian Presbyterian Kohhran in Mipat hmeichhiatna chungchang a thu puan chhuah tarlan a ni a, lo chhiar ve teh

Zawhna:

Hun khirh tak mai ka paltlang a, in tanpuina ka mamawh khawp mai. Kum5 chuang lai chu phaiah ka awm tawh a, ramdang a awm hi hrehawm em em ka ti lo khawp mai. Ka thiante min hrechiangtu te pawhin Mizo society ai chuan i mil zawk te min ti hial thin. Kum 1 kal ta khan hnamdang ngaihzawng ka tawng a, mi tha tak a ni. Pastor a ni nghe nghe a, chuvang chuan pawi em em ah ka ngai lova, bakah kan inhmangaih tawn hle a ni. Ka chhungte pawhin an hriatna a rei toh a, engmah an sawisel ngai lem lo. Mahse tunhnaiah inneih kan duh thu kan sawi a, ka chhungte chuan awn palai mahse awmzia a awm lo an ti ta bur mai sia, ka mangang a ni. Theihpatawpin ka chhungte hmin ka tum a, mahse theih nganga kan hriat loh chuan court a inneih mai kan tum a. kawng min han en sak theih chuan ka lawm ngawt ang.

Chhanna:

I kawppui atana i duh mahse i chhungte’n neih an rem ti loh chungchanga hi paltlang a harsa i tih hi a dik khawp mai. Inneihna hi mi 2(mipa leh hmeichhia) induh a dam dun chhung atana awm dun tura Pathian leh kohhran hmaa intiamna ni mai a kan ngaih lai hian Mizo Society ah chuan hei ai hian a la thuk deuh a, chhungkaw pahnih inneihna avanga chhungkuaa insiamna a keng tel hian hnamdang neih dawn hian harsatna a siam thin fo a ni. Mahse i dinhmunah hian zawhna kan nei a, i chhungte hian a hma zawnga harsatna an siam loh lai che hian tinge inneih insawi rik hnuah harsatna a awm tak? I tum ang hian court ah innei ta la i hlim ang em? Inneih lai tak hi chu hunreilote a nih lai hian inneihna erawh hi dam chhung daih a ni si a.

Zawhna:

Kohhran dan thianghlimin nupui ka nei a, awmhmun chungchangah intihthiamlohna vangin kan inthen a (a hmeichhia ten sum an chhuah a) hetiang case kohhran hruaitute atanga ka hriat chu ‘Rawngbawlna langsar a inhmanloh’ tih a ni a. Kan inthenlai hian Bial leh Branch-ah OB ka ni a, kei chuan chuan rawngbawlna langsar leh sar lo ka thliar ve ngai si lo a, inkhawm lohah ka tlak ta a, hetiang lama kan kohhran in dan a siam te chiang taka min hrilh theih chuan ka lawm viau ang.

Chhanna:

Kohhran tawngkamah hian rawngbawlna langsar han tih hian Thuhriltu, SS zirtirtu, Committee member hrang hrang te(Kohhran,KTP, etc), Tantu, Nilai zan thupui hawngtu, khuangpu, Zaipawl Conductor, thawhlawm khawntu leh dar vawtu(Biak In Chowkidar emaw midang) te hi an ni a, – inthen hian heng rawngbawlna langsar tia kohhranin a chhiarah hian tel a remchang lo ve tihna a ni mai a, inkhawm te chu hei hian a dal lova, inthlahrung hauh lovin hma lo la tang tang rawh kum 3 chu a liam hma viau a nia.

Zawhna:

1. Inneihnaa innei turte an zawh thin, …Pathian hminga in inneih a rem lohna a awm chuan, nangmahni in inpuang tur a ni tih hi in virgin leh virgin loh puang ru tihna ang em ni? Biak in hawng hian virgin te chauh em ni innei thei? Biak in hawng lova innei te hi he zawhna ang hi an zawt ve tho em? Tlangval kum 25 mi ka ni a, kum 7 kalta (ka pianthar hma) khan sex ka hmang a; mahse ka ti leh tawh miah lo. Ka naupan tet atanga biak in hawnga nupui neih tum ka ni a, kum thum kalta-a ka pianthar atang phei kha chuan ka tum ruh leh zual a; mahse, zawhna in chhanna thenkhat ka lo chhiar a, ka lo tlin tawh lo reng tih ka hrechhuak ta. Eng tin nge ka tih ang? Tunah hian KTP hruaitu ka ni mek a, inneite thu an zawh thin khi virgin leh virgin loh a nih chuan ka pal tlang ngam lo a ni. Min la phuar si lo va. Ka inpuang ang a, ka inphuartir dawn em ni? Inphuartir ta ila mi dang tam tak inthiam lo takin ka awmtir thei tih ka hria a, tin ka rawngbawlpuite pawh an zahawm dawn khawp mai; mahse ka thil paltlang tur ka ngaihtuah hian chu chu ka huphurh zawk a ni.

2. Ka chetsualpui nen chuan hemi kum (kum 7 kalta)-ah hian kan inthen tawh a, amah chu ka neih a rinawm tawh lo. Chuti a nih chuan mi dang nei ta ila, Upa pawh ka ni thei tawh lo tihna a ni thei em? Kan hmalam hun kan hre lo va, Upa-ah te pawh min lo thlang palh thei a, ka inpuan loh chuan min lo thlang palh se eng tin nge ka tih ang?

3. Keimah anga virgin lo, biak in hawnga innei thei tawh lo an ni tih inhre miah lova biak in hawnga inneih tum tam tak an awm ka ring. Thenkhat chu hriat ka nei. Heng te pawh hi kei chuan ka hrilh ngam lo. Biak ina an puan vek tawh hnuah rehearsal an neihnaah Pastor-in an virgin leh virgin loh lo zawt ta se, an inpuan ngam loh phei chuan kumkhuaa rilru inthiam lohna an pai reng dawn tihna a ni dawn a. Chuvangin hetiang lam hi inhriat thartir a va tha ve. Kei pawhin in zawhna chhanna atang hian ka hre ve chauh a. Inneih dan bu ka kawl mai lo va, hetiang case tak hi a inziak reng em. Ka chhiar tawhah chuan tiang tak hi ka lo hre lo va. Chiang taka puanzar a va tha ve. Rilru inthiam lo takin kan awm kumkhua mai dawn asin. Kan puanzar chuan biak in hawnga innei theite (virgin) chu kan ngai hlu zual ngei ang. (Ka ziak sei hle mai. Helaia chhan awm a nih loh chuan ka email-ah hian min lo chhang mai dawn nia. Thlaleh chhung ngeia min chhan hman ka beisei.)

Chhanna:

“Pathian Hminga inneih a rem lohna” tih hi a kawh ber chu mipa in emaw hmeichhia in emaw ngaihzawng dang nei reng chunga mi dang neih emaw kawp pui dang nei reng chunga chhungte emaw tihluihna avanga midang nena inneih tum te tana chance inpekna a ni ber a. Entirnan Hmeichhia pakhat chuan mi fa a pai a, mahse chhung te tihluihna avanga midang daih nei ta, mahse rei lo te hnuah a rai avanga a pasal ina a then tak te an awm a, hetiang ho tana inpuanna remchang siam na hi a ni ber mai a. Hei lo lehah chuan Pathian leh kohhran hmaah Biak In hawnga inneih buatsaih mah se a ruk a nau lo pai lawk si, an inneih hnu reilote a thunun ngai leh ta mai pawh an awm thin a, chutiang ho tan te pawh chance a ni ber ang chu. I zawhna a virgin lam in zawhna a nih chuan Nu thlawi/Pa thlawi te tan a hrehawm dawn asin.

Zawhna:

Ka fapa kum 17 mi chu Drugs tih a ching ith kan hre chhuak a, sikul a kal tha duh lo bok a, a rilru a mumallo em em mai a, amah hi a nu a boral tawh avangin a pi(hmeithai) hnena khawsa a ni. Tih vak ngaihna ka hre lo hle mai a, heng ho hi engtianga enkawl chi nge. Vuak dawn lahin kan vawhlum maiang tih a hlauhawm bok si. Min puih theih chuan ka lawm ngawt ang.

Chhanna:

I fapa hi i bulah a awm lo niin a lang a, a nu chu a lo thi tawh a nih chuan pa a nei a, ruihhlo a khawih chhan ni thei awm hi a tam mai. A nu a thih hnuah hian nu hmangaihna a dawn thin ang kha a dawng ta lo va, chu chuan a nun khawharna a siam a ni thei. Tin, a pa bulah a awm zui lo lo ni ta sela, a rilru chhungrilah himna (security) nei tawk lova inhriatna a nei a ni thei bawk. Tin, chutianga bul nei lo taka a inhriat chuan thiante zingah a nun a hrang daih thei a, chu chuan depression a siam a ni thei bawk. Ruihhlo a khawih tawh chuan zirna chauh a ni lo va, thil dang pawh engmah mumala tih theih a nei lo vang. A rilru khawih chhetu hi khingte khi a ni thei em? a nih chuan a pa i awm a, tihdam dan ngaihtuah chu i mawhphurhna a nih a rinawm. Nu enkawlna ang dawng se tih i duhsak avanga hmeichhe bula i dah hian, hmeichhia nazawng lakah nu enkawlna ang an dawng phak kher lo va, a nu a mamawhna zawn hre chiang bertu chu nangmah i nih ka ring. Chuvangin fatherly care leh motherly care mawh phur kawpin i inhre thei em? A nun kal sualah khan siam tha turin vuak pawh a that hun a awm tho ang a, mahse amahah khan bel vek lovin mawhphurhna i nei em tih inen hmasa rawh. Tleirawlte hian nun ruak nasa tak avangin ruihhlo an khawih deuh ber. A nun ruak hnawh khahsak dan i hre thei ang em?

Zawhna:

Ka zawh na te hi achhan na ka beisei hma lutuk nge ni tin ka chang a,anghak tu tan ava rei duh ve ?

Chhanna:

Lo nghak hram hram rawh. A chhanna hi a hlawmin mi thiamte hnenah pek thin a ni a. An la rawn chhang em em ang.

Zawhna:

KHAWNGAIH TAK IN ARANGLAMA MIN CHHANG THEIH CHUAN KA LAWM HLE ANG NGAIHZAWNG KA NEI VE A,KAN IN DUH VE EM EMA,KAN IN KAR AH BUAI NA AWM LOVIN K UNAU TE ATANGIN THEN TUR IN MIN TI A.ADINHMUN ATHAT TAWK LOVANG ANI BER,KEI IN HARSA KA TI A,ADINHMUN HI PATHIAN DAH NA NI A ANI PAWH ALUNGAWI BIK LO ANGA KEI IN HNAWL PHAH NAN KA HMAN LEHZEL CHUAN ANUN IN ACHHIAT PHAH NGEI DAWN SI.AMAN MIN THEN THEI MAI BAWK SI LO.KEIPAWHIN ADINHMUN VANGIN KA TI NA NGAWT THEI SI LO.KA CHHUNGTE TI NAT KA DUH BAWK SILOVA KHAWNGAIH IN ENGTIN NGE KA AWM ANG MIN PUI TEH.KA BEIDAWNG LUTUK ANI.

Chhanna:

I dinhmun hi a khirh hle mai. I awm zel dan turah Pathian i rawn em? Tin, in Bialtu Pastor emaw Kohhran Upa emaw rawn bawk la a duhawm khawp mai. Ralkhat atanga thurawn inpek ai chuan in Kohhran hruaitu tu emaw, nangmah leh in inchhung dinhmun hrechiangtu kha rawn thei la chuan i tangkaipui ngeiin a rinawm. Synod Family Guidance & Counselling Centre-ah counsellor-te pawh an rawn theih bawk ang.

Zawhna:

Nupa a faneih hnuah hian a hmeichhe chhungte inlama naute leh anu khawsak hi tunlai hian an intihhmuh nasa toh hle.Thil tha ber ani em?Enge tha ber ang?

Chhanna:

Thil tha ber a nih leh nih loh chu sawi thiam a harsa khawp mai. Nimahsela, mipa (pasal) hnathawhna vang emaw, chhungkaw dinhmunin a mamawh vang emawa inhrethiam chunga tih a nih chuan a that lohna a awm lem dawn em ni?