FG&CC CENTRE THAR MAMIT-AH HAWN A NI

Family Guidance & Counselling Centre-in Mamit-a Counselling Centre thar a siam chu May 4, 2019 khan Synod Moderator Rev. R. Lalhmingthanga’n a hawng a. Centre thar hawn rual hian Counsellor awm tur Rev. Lalbiakhlira a dahnghet nghal bawk.

Mamit FG&CC thar hawnna inkhawm hi Mamit Hmunsam Kohhran Biak Inah neih a ni a, Rev. B.Sangthanga, Executive Secretary i/c FG&CC-in kaihruaiin, Rev. Lalsangbera, Director, FG&CC-in report a pe. Mamit leh Mamit Hmunsam Pastor Bial Zaipawlte an zai a, Counsellor tharin thu tawi a sawi a, Synod Statistician Upa C. Lalbiakthanga’n tawngtaisakna hun a hmang. Centre thar hawnnaah hian Aizawl atangin FG&CC Committee member mi 8 kalin, Inrinni zan atanga Pathianni zan thlengin Mamit Pastor Bial-a Kohhran 8-ah Counselling Centre Awareness leh Kristian Chhungkaw Campaign an nei nghal a ni.

Synod Moderator chuan, ram thang zel atana Mamit a Centre hawn a ni ta chu lawmawm a tih thu sawiin, “Counselling hi mi tin mamawh, Kohhran pawl bik awm lova mi tin hman tangkai tur a ni” tiin Mamit leh a chhehvel mipuiten tangkai taka hmang turin a fuih a ni.

FG&CC Director Report-a a lan danin, Synod hian tunah hian FG&CC hmun 8 (Mission Veng, Bawngkawn, Vaivakawn, Champhai, Serchhip, Kolasib, Lunglei leh Mamit)-ah a nei ta a. Thawktu hi Main Centre, Mission Vengah thawktu 6 awmin, Centre dang zawngah chuan 2 zel an awm a, thawktu zawng zawng hi 20 an ni. April 30, 2019 thlenga an record danin Centre pantu 26,357 an nei tawh a, kumin 2019-ah mi 1,303 an nei tawh bawk.

Mamit-a Counselling Centre hi Mamit Hmunsama Pu Laldingliana In luaha siam a ni a. Hetah hian Counsellor Quarters leh Counselling Centre a awm nghal a ni.