FG&CC COUNSELLING TRAINING KHAR

Mizoram Synod, Family Guidance & Counselling Centre (FG&CC)-in Kohhran hruaitute puala May 17, 2017 atanga Synod Conference Centre-a Church Leaders’ Intensive Residential Pastoral Care & Counselling Training vawi 26-na a buatsaih chu May 30, 2017 (Thawhleh) zan khan ‘Final Evaluation & Graduation Service’ neiin khar a ni.

Training kharna hun hi Rev. P.C.Pachhunga, Executive Secretary i/c FG&CC chuan a kaihhruai a, Rev. Lalzuithanga, Synod Moderator-in a hmanpui a, training chhuakte hnenah Certificate semin thuchah a sawi. He Counselling Training-ah hian Pastor Bial 8 atangin Kohhran aiawh 29 an tel a ni.

Training kharna inkhawmah hian Rev. R. Lalhmingthanga, Director, FG&CC chuan inlawmna hun a hmang a, Training chhuakte chuan training an hlawkpui dan a lema an ziak chu entirin an hrilhfiah a, Pu C.Lalzova, Champhai Bethel chuan training chhuakte aiawha thu sawiin, Mission Veng Pastor Bial Zaipawl an zai bawk.

He hun hmanpuitu, Synod Moderator Rev. Lalzuithanga chuan training chhuakte fuihna thu sawiin, training chhuakte chuan an thil zirte chu tangkai taka hman tum turin a fuih a. “Tunlaiin Mizoramah Kohhranin beihna a tawk nasa em em a. Chuvangin kan mi leh sate pawh hetiang lamah hian nasa zawka kan zirtir a ngai a ni. Kan ram hmasawnna hi Politics-a innghat ni lovin Chanchin Thaa innghat a ni zawk tih hi kan hriat reng a ngai a ni” a ti a. “Khawvelah hian thutak dinpuitu nih a pawimawh avangin Pathian leh a Kohhran tana rinawm tlat turin Kohhran mite i infuih thar zel ang u,” a ti bawk.

FG&CC hian Pastor-te pualin Pastoral Care & Counselling Training hi vawi 26 buatsaih tawhin, Pastor 440 training a neihpui tawh a. Church Leader-te puala kum 2002 atanga training a neihpui tawhah, tun tuma mite nen hian Kohhran hruaitu 531 Training pek an ni tawh bawk a ni.

Tin, Synod hian Counselling Centre paruk – Mission Veng, Bawngkawn, Vaivakawn leh Champhai, Kolasib leh Serchhipah te a nei a. Heng Counselling Centre parukah hian tun thlenga pantu (Client) an neih tawh zat chu mi 18,142 an ni.