FG&CC THAWKTUTEN INTUAITHARNA HUN HMANG

FG&CC Committee-in a rel angin, hmun hrang hranga Family Guidance & Counselling Centre-a thawktute chuan July 2 & 3, 2018 khan FG&CC Main Centre, Mission Vengah intuaitharna hun an hmang.

July 2, 2018 (Thawhtanni) nilengin Counsellor-te pualin Counselling chungchang thu pawimawh chi hrang hrang zirho a ni a, Nl. Lalropuii, Mission Veng, Counselling Psychologist chu Resource Person atan hman a ni. Ani hian Case Study leh Practical Base Study a zirpui a, an hlawkpui hle.

July 3, 2018 (Thawhlehni) nilengin FG&CC hnuaia thawktute zawng zawng pualin Intuaitharna neih zui nghal a ni a, he hun hi Session thuma mhenin hetiang hian hun hman a ni.

Session khatnaah Rev P.C Pachhunga, Executive Secretary i/c FG&CC-in thawktute fuihin thu pawimawh tak tak a sawi a. Director Rev. Lalsangbera’n Devotional Message a sawi bawk a, tawngtai rual neih zui a ni.

Session hnihnaah Upa H. Lalchhandama, O/A in office kalhmang leh hriat tur chi hrang hrang a sawi a, Counsellor ten Branch hrang hranga an dinhmun leh an ngaih pawimawhte an sawi bawk.

Session thumnaah Counsellor puala hun hmang lehin, Upa R. Lalmalsawma, FG&CC Committee Member chuan, “Counsellor-te pawn lam a\anga an beisei dan” tih thupui sawiin, Counsellor-te chu mamawhtute pan theiha awm reng tur leh thuruk vawng him zel turin a chah bawk.

Synod hian tun dinhmunah Counselling Centre 7 – Mission Veng, Bawngkawn, Vaivakawn, Champhai, Serchhip, Kolasib leh Lunglei-ah a nei tawh a. Hengah hian thawktu mi 16 an awm mek a. SEC-in a rel angin kum 2019 hian Mamit-ah Centre hi hawn belh tum a ni bawk.