MSSU SECRETARIAL TRAINING VAWI 16-NA

Ni thum chhung awh tur Residential MSSU Secretarial Training vawi 16-na chu nizan (May14, 2019) khan Aizawl Theological Colege Inter-Cultural Hall-ah Synod Moderator Rev. R. Lalhmingthanga’n a hawng.

Hawnna inkhawm hi Rev. B. Sangthanga, Executive Secretary i/c MSSU-in a kaihhruai a, Pi Lalpianthangi, Coordinator-in inhmelhriattirna hun hmangin Israela Pachuau leh Lalduhsaki ten Pathian fakna hla an sa bawk.

Hawnna thuchah sawiin Rev. R. Lalhmingthanga chuan,“Kan ramah nu leh pa te beisei ang ni phak lo fa an pung tual tual a. Hnahkhawrin mulek a hring, tih ang maiin anmahni chawm sei liantute tana lungngaihna, zahna leh tahna thlentu lo pung zel hi kan rama harsatna lian tak a ni. Nghakhlel taka an seilen hun kan thlirte an lo puitling ve ta cheng a, nu leh pa te tana phurrit an ni fo mai hi a siam that hna kan thawh a ngai a. Chumi atan chuan Naupang Sunday School Zirtirtu he lam rawngbawlnaa inhmang zawng zawngte mawh a ni. Mihring nungchang hi thisena inthlah chhawnna atang leh tlakna leilungin a siam a, seilenna boruak tha tak siam turin chhungkaw inkawm ngeihna a pawimawh. Lui hnar nei tha tak chu a dan chah tak tak theih loh va, hruai pen erawh chu a tih theih. Chuvangin, an pianna chhungkua leh tlakna leilung chu eng pawh ni se, a tha zawnga inkaihhruaina hian danglamna nasa tak a thlen dawn a ni. Sap ngaihsanawmna nia ka hriat chu nu leh paten an fate duh zawng leh nuam tih zawng an tuipui peih a, an hun an pe phal hle bawk hi a ni. Kan fate thlamuang tak leh nuam ti taka an awm theihna turin nu leh pa te mawhphurhna a sang hle. Chhungkuaa inchawimawi tawn, infak leh lawmthu inhrilh te hi uar ila, kan khawtlang leh ram a danglam ngei ang,” tiin a sawi.

MSSU Secretarial Training hi Bial Sunday School Secretary ruat thar kum apianga neih thin a ni a, Secretary hna leh an rawngbawlna atana thil pawimawhte inzirtirna hun atan hman thin a ni. Kum 1974 atanga kum thum dan zela neih thin chu kum 2018 Synod-in Bial Sunday School Secretary term kum hniha a bithliah tak avangin kumin atangin kum hnih dan zelah neih thin tawh tur a ni ang.

Tun tum Secretarial Training-ah hian Bial Sunday School Secretary 169 an tel thei a, an zingah hian hmeichhia 3 an tel. Zing karah devotion hun hmangin ‘Naupang leh Tleirawlte venhim’ tih leh ‘Chhungkaw inrelbawl tha’ tihte zirho a ni ang a. Chhun lamah ‘Sunday School chanchin leh a pawimawhna, Secretary hna leh a pawimawhna, Christian & Child Evangelism, Sunday School inrelbawl dan leh inkaihhruaina’ tihte zir hovin, zan lamah sawihona hun hman thin a ni ang a, May 16, 2019 (Ningani) zanah a kharna hun hmangin Zirtawpniah an tiak ang.