OBITUARY : PU K. ZOTHLAMUANA (54), MISSION PROMOTER SMB

Pu K. Zothlamuana (kum 54), Mission Promoter, Synod Mission Board chu nimin (April 28, 2019) tlai dar 4:20 khan kal leh lung tha lo avangin a thi a, vawiin (April 29, 2019) chhun dar 12 khan Laipuitlang Presbyterian Kohhran Hall-ah Rev. K. Lalrinmawia, Executive Secretary i/c Mission, etc. in a vui.

Pian leh murna : Ni 22 April, 1965 zân dâr 6:30 khan Champhai Kahrawt Vengah Sangkhuma leh Lalzuali (L) te inkârah a piang a. An unau (a upat dân indawtin) :
1. Chawngthansanga (L) H/o Hmingthangi, Republic Veng
2. K. Zonunsangi W/o Pastor Rodingliana, Shillong
3. K. Zothlamuana H/o K. Laldinmawii, Laipuitlang
4. Upa K. Zosangliana H/o Lalthanzuali, Laipuitlang
5. Zoramnghaka H/o Lalthanzuali, Laipuitlang
6. K. Zochawitluanga (L) H/o Malsawmtluangi, Laipuitlang

Ni 23 Oct., 1993 khan K. Laldinmawii nen Laipuitlang Presbyterian Kohhran Biak Inah inneiin fa pali an nei a. An fate (a upat dân indawtin) :
1. K. Lalhruaitluanga
2. Christina Lalrinzuali
3. Sarah Lalrinkimi Khawlhring
4. Ruth Lalrinpuii

A mizia : A naupan lai atang rêngin mi thuawih thei tak leh tlawmngai thei tak a ni a. Mi hlim thei leh chhungte pawh chawk hlim thei tak a ni a, mi zaidam tak a ni bawk. Music leh Sports lam te hi a tuipui thei êm êm thin.

Khawzawla an awm laiin Tuichangral Beat Contest-ah te chhuak vein hetih lai hian rawlthar chauh a la ni nachungin, lawmman pakhatna an la ve hial a ni. W. Phailenga an awm lai pawhin Beat Contest-ah lawmman pakhatna an la ve tawh bawk. Tun hnuah pawh hian Pathian faka zai hi nuam a ti êm êm thin a ni.

Sports lamah pawh a naupan lai atangin a tui thei êm êm a. Football te, Volleyball te, Hockey te, Table Tennis te, Badminton khelh te hi nuam a ti êm êm thin a ni. Rawngbawla a chhuah hnu pawhin a la chhunzawm zel a; sports hi an rawngbawlnaah a ram mite nen inpawhna tangkai tak mai a lo ni bawk a ni.

Zirna lam : A pa hi sawrkar hnathawk, khaw hrang hranga insawn thin a nih avangin Champhaiah te, Khawzawlah te, W. Phailengah te leh Aizawlah te lehkha a zir thin. Zirna lamah chuan B.A. (Hons), B.Ed a ni.

Rawngbawlna lam : P.U. a pass hnu hian missionary a kal a duh hle a; mahse, a nu Lalzuali’n B.A. pass phawt tura a duh thu a hrilh a. B.A. a pass hnuah khatih hun laia Political Pasrty pakhat chuan an awmna Phuldungsei biala M.L.A. candidate atan an lo sâwm ve a. Amaha thu titlu lovin a pa, W. Phailenga awm chu a zuk râwn a. Ani’n a hmaa a nu hnêna Missionary-a kal a duh thu a lo sawi tawh kha a la tui chuan dil zawk turin lehkhain thurâwn a pe a. Dil hun remchang hmasaah a dil a, Synod Mission Board chuan missionary atan a lo la ve ta hlauh a. Tichuan, a nu leh pa te nen lungawi tlang takin missionary ni ve turin Pathian tan kum 1989 khan a inpe ve ta a ni.

Missionary dangte ang bawkin hmun hrang hrangah a thawk a. Hetiangin :-
Evangelist Teacher – Noagang (Tripura); Asst. Headmaster – Tuidu (Tripura); Headmaster – Salem Boarding (Home Mission North); Field Promoter – Khasan (Arunachal East); Headmaster – Khasan (Arunachal East); Office Assistant – Kolkata (Calcutta); Headmaster – Laimekuri (Arunachal West); Headmaster – Bhairabkunda (Assam) leh Mission Promoter – SMB Headquarters Office, Aizawl.

Kum 2016-ah a nu thih hma chiahin Synod Mission Board hruaitute hmangin Lalpa’n a nu sûn hmanin Aizawlah a rawn sawn ta a ni.

A rawngbawlnaah hian a tui êm êm mai a. A thawh tan tirh lam phei chuan a hlawhte hi amah chauha ei tur niin a inhre lo va; a ram mi, mi rethei ve tak takte nên an ei ho dial dial thin a ni. Pathian zârah a thawhna ram mite hian an ngaina ve hle a ni tih lanna chu – amah a lo hrisel loh va, a lo bawrhsawm hnu hian an lainatna leh khawngaihna an rawn lantir nasa thei êm êm a ni.

Tunah a lawina Laipuitlang Kohhranah hian rawngbawltu a ni mêk. Aizawla a awm hnu hian Mizoram khaw hrang hrangah Ramthar campaign-in a zin ve thin a ni.

A nat dan : Khasan (Arunachal East)-a an awm lai (2003) kum tâwp lam khan lung (heart) lam harsatna namen lo tak mai a tawk tawh a. Doctor-te chuan dam chhuak turah an ngai lo va, a dam chhuak leh pawh chu mak an ti hle a, ‘Kristiante Pathian hi a tha a ni,’ an ti ve ringawt mai a ni. Kolkata-ah a lung chu Open Heart Surgery (CABG) zai a ni a. A lung 65% chauhin hna a thawk thei tawh a, chak lo tak chungin a rawngbawlna chu a la thawk ve thei zel a. Damdawi hmangin a inenkawl reng a, Doctor-te thusawi awihin ei leh in lamah pawh theih ang tawka ulukin a insum tlat a.

Kum 2016-a Aizawl an lo pêm hnu hian zunthlum natna a lo nei ve reng mai a. Chu chu kum 2018 October thla khan hriat chhuah chauh a ni a. Vanduaithlak tak maiin a lung chu a lo khawih pawi hman a. Ni 2 November, 2018 zan khan Heart Attack a nei leh a. Civil Hospital Aizawlah theih ang tawka enkawl niin tha angreng tak chuan a chhuak a. Mahse, heart attack a neih leh avang hian Angiography ti turin Kolkata-ah refer a ni a. January 2, 2019 khan Kolkata an pan a, chutah chuan lung khawl (pace maker CRTD) an lo vuahsak a. Aizawl a rawn haw hnu chuan ni 4 vel bawr chu tha takin office te pawh a kal ve leh a. Chumi hnu chuan a taksa a lo chau telh telh a, a thaw te a hah a. Synod Hospital, Durtlang leh Ebenezaer Hospital te panpui a ni a. Chumi hnuah Civil Hospital Cardio Ward-ah khum âwl a awm tih hriat a nih veleh panpui leh nghal a ni. Doctor leh Nurse ten theih tawp chhuaha an enkawl chungin a natna a lo zual zel a. Ni 28.4.2019 (Pathianni) tlai dar 4:20 khan chatuana chawl tawh turin min lo kalsan ta a ni.

PU K. ZOTHLAMUANA VUINA PROGRAMME
Vui hun : Ni 29.04.2019 (Thawhtanni), 12:00 noon
A hmun : Laipuitlang Presbyterian Kohhran Hall
Vuitu : Rev. K. Lalrinmawia, Executive Secretary i/c Mission, etc.
Chanchin sawi : 1) Pi K. Laldinmawii (A nupui) 2) Rev. C. Zorammawia, Secretary, Synod Mission Board
Thlamuanna Thuchah : Vuitu
Tawngtaisakna : Upa H. Lalhmingliana, Bialtu
Hla : Vân hmun ropui hmangaih ram khi (KHB No. 489)
Malsawmna :
Thlanmualah : Rev. Dr. Vanlalchhuanawma, Vice Chairman, Laipuitlang Kohhran