Aizawl Theological College-in Kum 100 hmel a hmu ta - Rev. Prof. H. Vanlalauva

June 01, 2017 | ARTICLES & SERMONS

Mizoram Kohhran leh India ram hmun hrang hranga Pastor-te leh rawngbawltu pawimawhte chherna hmun Aizawl Theological College chuan a kum 100-na November 22-24 khian lawm turin a inpuahchah mek a. Hetia India ram Theological College hlun berte zinga mi, kum za kal ta chhunga Pastor chherna hmun pawimawh tak maiin Centenary lawm tura a inpuahchah mek lai hian Aizawl Theological College chanchin tlangpui kan han tarlang a ni e.

1. A din tan hun leh a hun hmasa lam (1907-1935) Aizawl Theological College hi Rev. D.E. Jones (Pu Zosaphluia) a’n a chenna Banglapuiah Tirhkoh hna zir mi pangate class neihpuiin kum 1907 khan a bul a lo tan a. Kum rei tak chhung chu ‘Aijal Theological School’ tih a ni a. Kum 1965-a L.Th zirna College a nih atang khan ‘Aizawl Theological College’ tih hming hi a lo pu ta a ni. He School-a lut hmasa leh zir chhuak hmasa berte chu Thangkhuma, Hauchhunga, Taitea, Rosema leh Dengruma te an ni. Anniho hnuah hian Pu Liangkhaia leh a thiante paliten an zir ve leh a. Kum 1914-a Rev. S.J. Sandy-a lo chhuah thleng khan Theological School hi Pu Zosaphluian a enkawl deuh ber a. A enkawlna hnuaiah mi 10-in Tirhkoh hna an zir chhuak hman a ni. Rev S.J Sandy hian a lo chhuah kum atangin Theological School hi a enkawl nghal a. Durtlang a awmhmun a khuar a ngaih avangin, Theological School pawh tuna Presbyterian Hospital hmunah hian lak chhoh a ni. Kum 1923 atangin Rev. Saiaithangan a tanpui a. A hun chhunga zir chhuak hi mi 27 lai an awm hman a, heng zingah hian chhim lam Kohhranin an rawn tirhte pawh an tel ve a ni. Rev. Sandy hi kum 1926-a a thih tak avangin Theological School chu Rev. E.L. Mendus-an Mission Veng lamah la thlain, kum 1937-a an khar lailawk thleng khan a enkawl zui ta a, Pu Mena hi Rev. Chhuahkhama te, Rev. Saiaithanga te, Rev. Liangkhaia te, Pu Muka leh Pu Pasena te khan a theih angin an pui thin a ni. Pu Mena hova Theological School an enkawl chhung hian zirlai hming ziak chu 28 an ni a. A din tan kum 1907 atanga in registered zat phei chu an vaiin 65 an ni. 

2. Kum 1951 atanga a hmasawn chhoh zel dan: Aizawl Theological School chu kum 15 lai Pathian thu zirlaite a lak tawh loh hnuah kum 1951 Assembly thu angin zirlai pathum Rev. Thansiama, Rev. Lalchama leh Rev. Thangpuiliana te lain, Pu Lloyd-a hovin Mission Veng Biakin Vestry-ah hawn thar leh a ni a. Mission Banglapui godown chu hostel atan hman a ni a. Kum 1952 ah tuna Synod Office hmunah hian hostel leh class room sak a ni a, luah zui nghal a ni. Diploma Course kum thum zir tur Pu Lloyd-a hova buatsaih a ni. Kum 1952-a zir tan tur mi thar pali - Luka, Thanghnuna, Lalthanzauva, Darkunga te lak an ni leh a. Pu Lloyd-a saprama furlough-a a haw avangin zirlai batch thumna chu kum 1957 khan lak an ni leh ta chauh a. Heng zirlai hmasa an lakte hi an thuhril thiam dante chena ngaihtuah hnua lak an ni.

Kum 1959 leh 1960 khan zirlai lak thar leh an ni a. Hemi tuma an zirlai lak thar zingah hian chhim lam Baptist Kohhran atang te, Manipur leh Burma lam atangtein zirlaite lak an ni. Kum 1961 chawlin kum 1962 khan zirlai lak thar leh an ni a. Hemi kum atang hian kum tin zirlai lak thar an ni a, Class VIII passed chin chauh an la tan ta bawk a ni. A tir lamah Pu Lloyd-a pui turin zirtirtu full time-a rawih an awm lo va. Rev. Liangkhaia, Rev. Thanga, Rev. Saiaithanga, Pu Muka, Rev. Zairema, Pi Teii, Rev. Owen-a te, Rev. N.T. Nelmes leh Rev. Roberts ten an theih ang angin an pui thin a. Teachers Training School lama zirlaite nena infin thin an nih avangin Teachers’ Training School lam zirtirtu thenkhat pawhin class an la ve bawk thin a ni Kum 1958 khan Rev. C. Pazawna (1958-1981) chu Theological School-ah hian zirtir hna full time-a thawk tura lak hmasak ber a ni a. Kum 1964 khan Rev. Lalsawma (1964-1979) lak a ni ve leh a. Anni pahnih hi pensioner Rev. Liangkhaia tih lohah chuan kum 1965 hmalama zirtirtu a ngheta rawih awm chhun an ni. Aizawl Theological School hi kum 1964 hma lam khan tuna Synod Office bulah hian Synod Office nen inthenawmin an awm a. Zirlaite an pun zel avangin Mission Vengthlang-a Jubili Hostel hmunah Theological School building thar chu kum 1964 June thla atang khan sak tan a ni a. Kum 1965 khan luah theiha sak peih a ni. Kum 1964 Sept khan Pu Lloyd-a saprama a hawn hlen dawn avangin Rev C. Pazawna chu Principal atan ruat a ni a, kum 1981 thlengin Principal hna a chelh a. Saprama a zir hlanin Rev. Lalsawma chu kum 1971-1974 chhung khan Acting Principal atan ruat a ni bawk. Anni pahnih hun chhung hian College hmasawnna chi hrang hrang sawi tur a tam hle. Kum 1965-ah L.Th zirna College-ah hlang chhovin, Aizawl Theological College tih a ni a. Senate of Serampore College hnuaia Pathian thu zirna College pakhat a lo ni ve ta a ni. Kum 1971-ah B.Th zirna hawn a ni a. Mobile Theological School te, Missionary Training Department hawn a ni bawk a. Kum 1971 hnu lam atang phei kha chuan zirtirtute pawh BD leh M.Th te an ni ta deuh vek a ni.

Rev. C. Pazawnan College a chhuahsan hnuah term neiin Rev. Lalchhuanliana (1981-85) te, Rev. C. Biakmawia (1986-89) te, Rev. H. Remthanga (1990-1993), Rev. C. Rosiama te (1993 Dec. – 94 May) , Rev. Dr. Zaihmingthanga (1994 May -1998) leh Rev. Prof. H. Vanlalauva (1999-2007) ten Principal hna an chelh ve leh a. Hetih hun chhung hian Durtlang lamah Mission Vengthlang atangin College Campus sawn chhoh a ni a. BD zirna kum 1994 October thla khan hawn a ni a. Lay Theological Education Department tha taka kalpui a ni a. Calvin Study Centre din a ni bawk a. Faculty Development leh Library development pawh chak taka kalpui a ni. Hetianga hmalakna avang hian kum 2002 khan M.Th zirna Christian Theology-ah hawn tan a ni a. Kumin 2007 hian New Testament leh Missiology subject-ah hawn belh leh a ni. India Hmarchhakah BCS & Dip.CS zirna Centre tha ber a ni a, D.Min Local Centre a ni bawk. Aizawl Theological College-ah hian tuna doctorate zir mekte nen zirtirtu 25 an awm ta hial a. Heng zinga mi 9 chuan doctorate degree an nei tawh a, 8-in India ramchhung leh pawn lamah doctorate an zir mek a, 4-te chuan doctorate zirna kawng an dap mek a ni. Library & Archive-ah lehkhabu volume 48,000 chuang an nei tawh a. India ram Theological College tam tak zingah Library nei changtlung ber 5-na a ni pha ta hial a ni. Kum 1907 atanga zirlai in registered tawh zawng zawng hi an vaiin 1200 chuang zet an ni a. Hetiangin: Certificate Course 65, Diploma 124, L.Th 27, B.Th 339, B.D 378, M.Th 22, Missionary Traininee 150; BCS 157, Dip. C.S 20. 

Tlangkawmna Aizawl Theological College hi Mizoram Presbyterian Kohhran rawngbawlna hmun pawimawh tak a ni a. Kumtin cheng vaibelchhe tel senga enkawl a ni a. Tunah hian India rama Pathian thu zirna College lian leh tha ber zinga chhiar theih a ni ta. Aizawl Theological College hi a tir atangin Tirhkoh/Pastor chherna hmunpui a ni a, a zir chhuak tam ber pawh Tirhkoh leh Pastor ah te an tang a. Mizoram Presbyterian Kohhran Pastor/Minister 400 vel hi Aizawl Theological College atanga zir chhuak deuh vek an ni. Aizawl Theological College hi Mizoram Presbyterian Kohhran ta ni mah se India ram leh pawn lama Kohhran pawl hrang hrang - Baptist, Lutheran, Methodist, Menonite, CSI, CNI, UPC leh Salvation Army te pawhin vawiin thlengin an rawngbawltu chherna atan an chhawr tangkai hle a ni.

 

 

Aizawl Theological College-in Kum 100 hmel a hmu ta - Rev. Prof. H. Vanlalauva

June 01, 2017 | ARTICLES & SERMONS