PASTOR NUPUI INTAWHKHAWM VAWI 39-NA

Vawiin (Oct. 12, 2017) khan Pi Zaii Hall, Synod Conference Centre-ah Presbyterian Kohhrana Pastor leh Pro. Pastor nupui Intawhkhawm vawi 39-na neih a ni a, pastor nupui 149 an tel thei a ni. Speaker atan Rev. Dr. Lalchungnunga, Zarkawt an hmang a, thupuiah ‘Pastor nupui leh tunlai khawvel’ tih an hmang.

Chawhma hun hi dar 10:00-ah tan a ni a, Pi R. Thanmawii w/o Rev. Lalzuithanga, Synod Moderator in a kaihruai a, Pi Zapari w/o Rev. C. Biakmawia, Ramhlun North in hunserh a hmang. Pi Lalroluahi w/o Rev. Lalramliana Pachuau, Senior Executive Secretary-in thupuanna hun hmangin inhmelhriattirna hun a hmang a, Sunna hun hman a ni bawk. Missionary Training College (MTC) a Minister nupuite zaipawl ngaihthlak a ni a, Rev. Dr. Lalchungnunga’n ‘Pastor nupui leh tunlai khawvel’ tih thupui hmangin thuchah a sawi.

Chawhnu lam hun chu dar 1:00-ah tan a ni a, Pi Laltlanhlupuii w/o Rev. P.C. Pachhunga, Executive Secretary in a kaihruai a. Pi Rinpuii w/o Rev. C. Lianhmingthanga, Mission Vengthlang in hunserh a hmang leh a, Pi Lalhmangaihi w/o Rev. Vanlalchhunga, Hortoki zai ngaihthlak leh a ni a, hemi hnu Dr. Martin Chawngsailova, Nursery Veng hnen atangin ‘’Hriselna Chungchang’ tih ngaihthlak leh a ni. Thusawi ngaihthlak zawh hian zawhna leh chhanna hun hman a ni a, a duh apiang tan inentirna (check-up) hun hawn a ni bawk. Pastor nupuite hian tlai lamah chawhlui an kilho nghal a ni.

Presbyterian Kohhran Pastor Nupuite hian kum tin intawhkhawmna hun an hmang thin a, mithiamte ruaiin thuchah ngaihthlak bakah thupui thlan bik paper te an zirho thin a, an pasalte rawngbawlna an tawiawm theih dan tur leh Kohhran tana Nu nih tling an nih theihna tura theih tawpa hma la tura infuihna hun te hman a ni bawk thin.