PRAISE ON 2017 TAN A NI DAWN TA

Praise On 2017 Audition Round chu September 26 & 27, 2017 hian Khatla Kohhran Hall-ah neih a ni dawn ta.

Praise On 2017 hi Group zai intihsiakna tur a ni a, Group pakhatah member 3 – 8 thleng an awm thei ang. KTP Branch pakhat atangin group pakhat aia tam tel theih a ni a, Branch KTP hminga tel remchang lo tan pawh Bial KTP hminga tel theih a ni bawk. Praise On 2017 hi Synod Information & Publicity Department (Synfo) in Central KTP hriatpuinaa a buatsaih tur a ni a, show pumpui hi Khatla Kohhran, Aizawl in an thleng dawn a ni.

September 15, 2017 zan dar 8:30 khan Khatla Kohhran Hall-ah Praise On 2017 Hlanna hun hman a ni a, Synod Moderator Rev. Lalzuithanga’n hlanna hun a hmang.

Hlanna inkhawm hi Upa V.L Muanchhana, Praise On Organising Committee Secretary-in a kaihruai a, Pu R. Lalnuntluanga, Synfo Coordinator-in report a pe a, Synod Moderator Rev. Lalzuithanga’n Pathian hnena hlanna hun a hmang. Mizoram Synod Choir leh Praise On 2016-a Top 3 te – Nl. R. Lalrinmawii, Tv. Zorinsanga Sailo leh Nl. Cindy Lalthanpuii te an zai bawk. Upa C. Ngurthantluanga, Khatla Kohhran Secretary hnen atangin thusawi tawi ngaihthlak a ni a, Pu K. Lalruatpuia, Praise On Programme Committee Secretary-in Judge turte – Upa C. Vanlalvuana, Chanmari, Pi Liandingpuii, Mission Vengthlang leh Tv. Lalrinfela, Aizawl Ramhlun Vengchhak te inhmelhriattirna a nei a, Rev. Rualthankhuma, Khatla Pastor Bial vawngtuin malsawmnain a tin a ni.

He show hi zaia Pathian rawngbawlna kawnga Kohhranin hma kan sawnna leh zaia Chanchin Tha puan darhna atan te, thinlung leh tih tak zeta Pathian faka zai mi kan lo pun zel nan te, helama talent neite phochhuahna remchang kan lo neih nan leh Hruaina Eng TV Channel hmasawnna atan te buatsaih a ni.

Praise On 2017 lawmman atan pakhatna – Rs. 1,00,000/-, pahnihna – Rs. 50,000/-, pathumna – Rs. 30,000/- (+ Trophy leh Certificate) leh Top 10 chin tan Consolation Prize a awm bawk ang. A remchan angin Special Prize siam tum a ni bawk.

Round awmdan tur leh hriat tur tul te:
1. Audition Round
a) A hun : September 26 & 27, 2017 (Chhun)
b) Group tin te zai hun tur hi September 22, 2017 dar 8:30 PM –ah Hruaina Eng TV ah puan a ni ang a, Office hun chhungin Ph. No. 0389-2314648 ah zawh theih a ni bawk ang.
c) Audition Round ah hian hla duh ber pakhat sak tur a ni ang a, thunawn nei a nih chuan chang 2 (Hnih) leh a thunawn, thunawn nei lo a nih chuan chang 3 (Thum) thleng sak tur a ni ang. Musical Instrument tel lo – a hang (acapella)-a sak tur a ni ang.

2. Second Round
a) A hun : October 12 & 13, 2017 (Chhun)
b) Hetah hian hla pakhat a tluan a sak tur a ni ang a, Keyboard leh Acoustic Guitar hi a kawp leh a mal pawhin hman theih a ni ang.

3. Third Round
a) November 2 & 3, 2017 (Zan)
b) Hetah hian hla pakhat a tluan a sak tur a ni ang a, a duh tan keyboard leh guitar bakah music track pawh hman tel theih a ni ang. Music track mahni Branch/Bial emaw in ngaihtuah tur a ni ang.

4. Final Round
a) November 21 & 23, 2017 (Zan)
b) Final round-ah hian hla 2 sak tur a ni ang a. Pakhat chu Organising Committee-in Kristian Hla Bua mi an thlan leh mahni duh ber hla pakhat an sa ang. Musical Instrument pawh anmahni zalenna a ni ang a, guitar leh keyboard chhawp sa a ni ang a, hei bak mamawh an nei a nih chuan mahni inngaihtuah tur a ni ang.

5. Final Result Puan : November 24, 2017

Heng baka hriat chian duh nei te tan a hnuaia Organizing Committee hruaitu te hnenah hian zawhfiah theih a ni ang.
Chairman : Pu R. Lalnuntluanga, Co-ordinator Synfo – 9862590743
Secretary : Upa V.L. Muanchhana, Synfo Comt. Member – 9862976771
Asst. Secretary : Pu Vanlalpeka – Fin. Secy, CKTP – 9436153728