PRAISE ON 2017 THIRD ROUND LUTTE FUIHNA & HLANNA NEI

Nimin (Oct. 19, 2017) khan Synod Conference Centre-ah Praise On 2017 Third Round lutte fuihna leh hlanna inkhawm neih a ni.

Inkhawm hi Praise On Organising Committee Chairman Pu R. Lalnuntluanga’n a kaihruai a, Pu Vanlalpeka Praise On Organising Committee Assistant Secretary-in hriattur pawimawh te a puang. Contestant te fuihna thuchah Rev. Remlalfaka, leh Upa V.L. Muanchhana Synfo Committee Member ten an sawi. Rev. Remlalfaka hian Pathian hi faka chawimawi tur a ni thu te, fakna thiltihtheihna te, Pathian fak tur chuan tlawm a ngaih thu te leh mahni inserh thianghlim a ngaih thu te, Pathian fakna hla satute hi zaithiam ringawt ni lova Chanchin Tha hriltu an nih tih inhre turin a fuih a. Contestant te chu inserh thianghlima sual langsar lo lakah pawh inthiarfihlim turin a chah. Upa V.L. Muanchhhana chuan Pathian hi fak zel tur kan nih thu te, Pathian fakna hla sa tute Pathian fakna hlaa in sawrbing turte, fakna hla an sakin a thuchah ngaih pawimawh a tulzia te hre reng turin a fuih bawk. Pu P. B. Lalbiakzuala kaihhruaina-in inhlanna neih a ni a, Pu K. Lalruatpuia’n tawngtainain inkhawm a tin a ni.