PRESBYTERIAN COMMUNICATIONS BOARD MEETING VAWI 164-NA AN THU

Oct. 17, 2017 (Thawhlehni) chawhma dar 10:00 khan Presbyterian Communications (Prescom) Board meeting vawi 164 chu Lloyd Hall, Synod Office-ah an thu.

He committee hi Rev. Lalzuithanga, Synod Moderatorin a kaihruaia, Secretary hnen atangin report ngaihthlak a ni bawk. Tuntum Prescom Board meetingah hian Bookroom Distributor kaihhruaina ruahman te, Bookroom Branch thar hawn belh chungchang te, thawktu mamawh belh chungchang te leh Presbytery atanga rawtna lut Mizoram map – Presbytery hrang hrang ramri tihlanna tel Synod Calendar siam te leh kum 2018-19 Budget estimate te ngaihtuah a ni. Secretary report in a tar lan angin khawl thar – Web Offset te, Digital Printing Set te neih thar a ni a, Synod Bookroom Headquarters sak that a nih dawn avangin Khatla North Kohhran Biak In Ground Floor ah Headquarters Showroom buatsaih peih fel a ni tawh a, Synod Office Annex ah Show room leh Stock room siam a niin luah a ni tawh bawk a, Bawngkawn Branch building thar pawh peihfel niin luah a nih tawh a, Saiha Branch thar pawh hawn a ni tawh bawk.

Prescom hian tun Financial year 2017-18 chhungah September thla thleng a an sum thawhchhuah tawh chu Rs. 10,69,71,610.00 (cheng nuaih sangkhat sawmruk pakua, sing sarih zaruk sawm) a ni a, tun Financial Year chhunga an hmuh tum 39% vel an hmu tling tawh a ni.