PRESBYTERIAN KOHHRAN HMEICHHIATEN INRAWNKHAWMNA NEI

Vawiin (June 14, 2018) chawhma dar 9:30 atang khan Central Kohhran Hmeichhe bultumin ‘Danglamna thlen turin huaisen rawh’ tih thupui hmanga Inrawnkhawmna (Consultation), Pi Zaii Hall, Synod Conference Centre-ah neih a ni. He inrawnkhawmnaah hian Bial tin aiawh mi pakhat theuh tel tura sawm an ni a, mi 212 lai an kal thei a ni.

He inrawnkhawmna hi hun thumah then a ni a, hun 1-na hi Pi K. Lalliantluangi, Central Kohhran Hmeichhe Chairman in a kaihruai a, Rev. P.C. Pachhunga, Executive Secretary i/c Kohhran Hmeichhia in Inlawmna thu a sawi. Prof. Dr. Lalnghakthuami, ATC hovin ‘Danglamna a awm theih nan Bible i chhiar thar leh ang u’ tih thupui zir ho a ni. Hun 2-na hi Pi Lalnuntluangi, Central Kohhran Hmeichhe Vice Chairman in kaihruaiin Nl. Zohmangaihi, Regional Secretary, AISSA hovin ‘Hmeichhe chungchanga Bible leh Pathian thu zirna’ tih thupui zir ho leh a ni a, Hun 3-na chu Pi Rinchawii, Central Kohhran Hmeichhe Ex-Chairman in kaihruaiin Prof. Dr. Lalneihzovi, MZU hovin ‘Ei leh bâr zawnnaah leh sawrkar inrelbawlnaah danglamna thlen turin huaisen rawh’ tih thupui zir ho leh a ni. Thupui zir zawh apiang hian sawihona hun neih thin a ni bawk. Pi Lalmuanzuali, Central Kohhran Hmeichhe Vice Chairman in lawmthu sawina hun a hman zawhah programme hi khar a ni.

October 25 & 26, 2017 khan Presbyterian Women Fellowship (PWF) bultumin Diphu, Karbi Anglong-ah tuna inrawnkhawmna ang hi neih a lo ni tawh a, hemi tuma kalkhawmte hian Unit tinah mahni tawnga leta inrawnkhawmna (consultation) hi neih vek ni se, ti a an rel angin Mizoram Presbyterian Kohhran Hmeichhia te hian tun tumah hian an buatsaih ta a ni.