PRESCOM BOARD MEETING VAWI 167-NA

Vawiin (May 10, 2019) chawhma dar 10:00 khan Synod Office-a J.M. Lloyd Hall-ah Synod PRESCOM Board meeting vawi 167-na a thu a, member 47 an kal. Meeting hi Rev. R. Lalhmingthanga, Synod Moderator-in a kaihruai a ni.

Secretary report ngaihthlak a ni a, Headquarters building sak mek chu thawh chhunzawm zel niin tunah hian basement chung, showroom chhuat leh stockroom tur chhuat hnih chhun zawh tawh a nih thu te, PRESCOM manual enthat tura Synod Executive Committee (SEC) a dil chu SEC chuan PRESCOM board kutah dahin enthat mek a nih thu te, tun dinhmunah hian Synod Bookroom Branch 15 a awm mek a, District Capital tinah Branch hi nei tawhin Aizawlah hian Branch 7 lai a awm thu te, Mizoram pawnah branch pakhat, Churachandpur-ah neih a nih thu te, Mizoram chhung khawpui lian deuh khaw 37 leh Shillong-ah Distributor an awm tawh thu te, a vaiin Bookroom dawr 52 a awm mek thu leh Bookroom bungraw zuar nghet Dawr ak (Sale or Return) ang hi 20 vel an awm mek thu te, kum danga an tih thin angin tlangdung pali-ah Mobile Bookshop neih a nih thu te, Printing & Stationery deptt. Govt. of Mizoram hnuaia Registered Supplier an nihna rei tak tih nun theih tawh loh chu buaipui thar lehin pek leh an ni a, Registration No. chu P&S-030/2019 a ni.

Kum 2018-2019 Financial Year chhung khan Synod Press hian an Budget Rs. 5,90,70,000/- atangin Rs. 7,31,36,960/- lai an thawk chhuak a, nikum aia thawh chhuah tamna chu Rs. 1,26,08,100/- a ni. Bookroom lam hian an Budget Rs. 10,55,50,000/- atangin Rs. 16,91,82,618/- an thawk chhuak a, nikum aia thawh chhuah tamna chu Rs. 1,99,52,141/- a ni.

Meeting-ah hian Distributor nih dilna chungchang te, Hnahthial khaw chhunga Synod Bookroom din thar leh tura ngenna thu te, Statement of Accounts te an thlirho a ni.