SAP RAM ZIN THU – By Rev.Zosangliana Colney

Kum 2002 April thla khan USA-ah
Khawvel hmun hrang hrang atanga Mission hruaitute inhmuh khawmnaah ka tel ve a.
Mission Hruaitu 60 chuang zet kan kal khawm a. Vanneih thlakin report pekna hun
min siam ve hlauh a. Chu report ka pek zawha thingpui ina kan chawlh lain CMS
hotupa, Asia khawmual pui bialtu, Rev Canon Chye Ann Soh chuan min rawn be
pawpin kan in kawm zui ta a. India ram an vei thu te, anmahni’n Missionary tir
lut tura a harsat zia te, India ramah thawhpui tha tak neih an duh thu leh
thawhpui tlaka min ngaih thu te a sawi a. Visiting card te in pe tawnin thla te
kan la dun a. Kan in then hnuah rawn bawhzui zelin CMS Mission Consultation,
Bangalore-ah thusawina hun te min pein, Mission Conference-2005, Noida-a tel ve
turin min sawm bawk a. Chumi hnuah South-Asia Manager, Mr Adrian Watkins chu
Mizoramah rawn kalin Mission Board Executive Committee nena inkawmna hun te neih
a ni. Thu a kal zel a, thawhhona thuthlung chipchiar tak mai an rawn duang a.
Synod Mission Board chuan CMS nena thawhho policy chu pawmin tuna thawhhona
thuthlung an rawn duan hi chu a chipchiar em a vang leh kan kal phung in anglo
deuh te a awm avangin, zir chian ni se, agreement sign dawnah zawhna kan neih
ang te pawh zawt ila a ti a. Chu thu chu London lama kan zu hrilh chuan anni
chuan ‘In hriat chian chu a tha a lom, kan lo kal hmain CMS chanchin hre chiang
tur leh kan kal phungte zir turin lo kal ta che,’ min rawn ti ta a. An
Missionary tur an lakna Board meeting-a tel remchang turin hun an rawn ruat tak
avangin February 8-21, 2006 chhung London leh a chhehvelah hun ka zu hmang ta a
ni.

Hetia hapta hnih zet Saprama awm
dawn takah chuan Wales rama kan Missionary Rev Sangkhuma te tlawh leh Council
for World Mission (CWM) office-a hun engemaw chen hman ka duh thu CMS lam hi ka
hrilh a. Anni pawh chuan hrethiamin Wales-ah zan hnih, CWM lamah zan hnih riak
turin hun min lo duan sak a, ka tlawh tur lamte pawh chiangkuang takin an lo
hrilh lawk bawk a.

British Airways-a London tlang
nghal turin February ni 7, 2006-ah Aizawl atangin Kolkata ka pan a. Kolkata
atanga ka thlawh chhuah leh hun tur hi zing lam dar 4 anih daih avangin kan
Field Secretary te chenna Synod House lam ka pan a. Zanriah te eiin zan dar
12-ah Airport lam chu ka pan a. Tih tur tul ang ang te ti felin a hun takah
London panin kan chhuak ta a. Zing dar li-a chhuak kha darkar 10 dawn kan thlawh
hnuin zing dar 10:15-ah kan thleng thei a. Kan hun inthlauhna chu darkar 5:30
vel a nih chu. CWM hotunu Mizoramah pawh vawihnih lai lo kal tawh, Ms Sylvia
Coombs inah ka thleng a. Amah chauha awm a ni a, mahse kan Missionary thin Pi
Lalnunthari Fanai te nupa, keima inneihtir ve te chu eirawngbawla chaw te ei
nghal turin a lo sawm a. Tin, Dr Rintei (D/o Pu Hmingthanzuala IAS) a lo tel
thei bawk a, kan hlim hle.

February ni 9, Ningani-ah chuan
Breakfast te kan ei zawh hnuin CWM Office lam kan pan ta a. Rev Dr Andrew
Williams, Executive Secretary leh Ms Sylvia Coombs te nen kan thawhhona
chungchang leh tuna kan Missionary CWM-a thawk mek te chungchang te, Mizo tam
zawk CWM Missionary-a tirh dan tur kawngte sawiin darkar hnih zet kan in kawm a.
Chumi hnuah chuan CWM Chanchinbu ‘Inside Out’ enkawltute’n interview min neih
pui leh hnuah Dr Andrew leh Ms Sylvia te nen chaw kan eiho hnuin duan lawk
angin CMS Office lam ka pan ta a. CMS-ah chuan Mr Stuart Buchanan, Personnel
Manager nen darkar hnih zet kan in kawm a. Hetah hian thawktu an lak dan
tlangpui leh naktuka ka tel vena tur Partners Selection Board meeting kalhmang
te kan sawi dun a ni ber. Tlai dar 4-ah CWM Office lam pan lehin Sylvia nen a In
lamah kan haw a. Hemi zan hian India chaw min ei pui a duh avangin chaw kan ei
chhuak a. A thiannu Olive leh an Pastor David-a te bakah Lalnuni te nupa te’n
min rawn kilpui thei bawk a, hun hlimawm tak kan hmang leh a ni.

Zirtawpni-ah chuan CWM lam
kalsana CMS lama ka hun hmang turin ka thlen in hmasa ber chu ka chhuahsan ta a.
CMS Office atangin Car-in Leamington Spa lam kan pan a. London atangin 200km
chuang lai a ni. Hetah hian thawktu tur te interview neihpui tura mi thiam bik
sawmte leh hna diltute hmun khatah riak khawmin CMS hnuaia thawk tur
(Missionary) lakna hun kan hmang dawn a ni. Hna diltu zawng zawng ten interview
vawithum theuh an neih a ngai a. Chungte chu Personal and Professional
interview, Family and Relationship Interview, leh Faith Interview te an ni a.
Vawikhat interview-ah hian darkar hnih zel hun pek an ni bawk. He interview neih
hma hian an dilna lehkha (form) te uluk taka zir bakah Office lama hotute’n uluk
taka interview neih puiin report chipchiar tak an rawn ziak bawk a ni. He
meetingah hian International Observer pahnih kan awm a, ka thianpa chu Kenya lam
mi Rev Dunccan Olumbe a ni. Ani nen hian hmun danga lo inhmelhriat sa kan ni
nghe nghe a. Interview hi mi pakhatin diltu pakhat zel interview anih avangin
Observer tan pawh indaih loh a na duh hle a. Interview session zawh apiangin
Interviewers’ meeting a awm zel bawk a. Thu tlukna siam tura Inrinni zana kan
han inhmu khawm phei chu zanlai kan thleng hial mai. Thawktu thlan an ulukin an
bei ngawrh hle mai. Thu harsa deuh an neih chuan ‘Hetiang hi engtin nge in tih
ve thin’ tiin min han rawn ve bawk thin. Tin, thawktu atana an lak tak loh te
rilru tih nat an hlau hle a. An rilru thawi zawnga lehkha thawn tur kan duang
thlap vek a ni. Chutianga zanhnih riaka buai taka hun kan hman hnu chuan a
kharna hun urhsun takin Lalpa Zanriah kilin Pathianni chawhnu dar khatah kan tin
a. Chuta tang chuan kei chu Wales lam pan tur ka nih avangin Rail Station-ah Pi
Joan-in min va thlah a, Birmingham lam pan relah ka chuang ta a. Birmingham-ah
hian Rel thlak a ngaih avang leh Pu Zaichhawna Hlawndo hnena thil thawn pek tur
ka neih avangin ka chhuk a. Pu Zaichhawna leh a thianpain min lo hmuak a, Coffee
te kan inho hnuin Cardiff lam panin ka chhuak leh ta a. Thian tha tak mai ka
chhar a Glaucester hmuna Redcliff College-a Head of Mission Studies Rev Dr Kang
San Tan, Malaysia mi a ni a. Kan Mission tan pawh mi tangkai tak la ni thei tur
ani. Malaysia-ah leh Myanmar-ah te kum tin lecture pe in vawi khat tal a rawn
zin thin avangin Mizoram-a rawn kal a har loh thu leh zirtirna lama min puih a
inhuam zia te a sawi a. Tin, an college-a Mission lam zir tur an awm chuan min
puih a duh thu te min hrilh a. Glaucester-ah min chhuk san a, biak chu kan in be
pawp zui ta zel a, a tihzia hle mai.

Cardiff-ah hian Rel thlak leh a
ngai a. Ka han chhuk a, Bridgend train ka han zawng hmu chu an lo zi hut hut mai
a. A hmei a pain zurui hmel pui pui, incheina maksak tak tak leh lukhum ki nei
fer fur nen tawng bawlhhlawh pui puiin an lo au lung lung mai a. Relah pawh
chuan an thu duh mang hlawm lova, an dinga, an vei nuk nuk a, an au tuar tuar
mai a. Ka rilru chuan ‘Wales zet chu a va ramthim zia ve le’ ka ti mai a. An
zingah chuan ka thu ve ta ran mai a. Kan han kal ta pawh chu an zai a, an au vak
vak reng a. Him tak chuan Bridgend chu kan thleng ve ta mai a. Ka han chhuak a,
kan inhrilh lawk dan chuan Pi Lalnunchami te nupain min lo hmuak tur an ni a.
Anni awzawng ka hmu ta lo va. Gate bulah chuan sap nu naupang lam deuh hian ka
hming min lo hmuh a “Ka pu, hei hi i ni em?” min lo ti a. “Aw, ni e, tunge inih?”
ka han ti a. A ni chuan, “Sangkhuma’n min tir a ni. Ani lah chu Sarament a
buatsaih si a” a ti a. “Ka hria alo’m, mahse Chami te’n min hmuak tur an ni a,”
ka ti a. A ni chuan, “Theih lohna thut an nei aniang, chawpchilh takin min tir a
ni” a ti ve mai a. Car kan han thleng a, an nupain an lo ni a. A tihzia hle mai.
Pu Sangkhuma te enkawl kohhran Upa fate nupa an lo ni a. Ka rel chuan pui te
chungchang ka’n sawi chuan vawiin hi Rugby tournament final khelh ni anih thu
leh, Wales an chak avanga chutiang boruak chu awm anih thu te min hrilh chuan ka
thaw a veng huai mai. ‘In nih phung ve rengah ka ngai mai asin,’ ka tih chuan an
nuih a za ve hle mai.

Thawhtanni (13/2/06)-ah chuan
Rev Sangkhuma nen ama car-in Bala leh Aberyswyth te tlawh turin Breakfast ei
zawhah kan chhuak a. A khawhar thlak deuh nain titi na hun tha tak kan nei thei
a, kan hlim dun hlein ka hria. Bala khua kan thlen chuan chhun dar 12 a lo ri
tawh a. Pi Rovi (Mrs Imorgen Roberts) In kan pan nghal a. Ani hi Durtlang
Hospital-a kum nga zet lo thawk tawh a ni a, min lo lawm hle mai. Min hruai
kualtu turin an Pastor Rev Eric chu a lo hrilhlawk a, ani pawh a lo thleng ve
thuai a. Thingpui te kan in hnuin Pi Tei thlanah kan kal a. Thla te kan lak
hnuin Mary Jones hnena Bible pe tu Rev Thomas Charles-a kohhran Biak In leh Mary
Jones hnena Bible a pekna (a chenna In) te kan tlawh a. Tichuan Kolegi Bala, an
Theological College hlui, tuna Mission Office leh Conference Centre anga an
hmanah kan kal leh a. Hetah hian Pi Tei ro, Mizo thil a lo la vawn te an lo dah
khawm a, a lunglen thlak hle mai. Tin, an Office-ah pawh Synod Calendar te,
Mizoram Gospel Centenary Souvenir te leh Kohhran Hmeichhe Centenary logo te an
lo dah ve hlawm a, a tlangnel thlak sawt mai. Pastor Eric-a kan thlah fel hnuin
Pi Rovi In-ah chaw ei turin kan haw ta a. Chaw te kan ei hnuin Aberyswyth lam
kan pan leh ta vang vang a. He khuaah hian National Library of Wales a awm a.
Chutah chuan Mary Jones-i Bible kha a awm. Chu chu hmuh duhin kan va tlawh a. An
dahna an siam that lai alo nih avangin a thawktute pawhin a awmna min hrilh mai
thei lo va. Darkar chanve zet hnuah chuan min hmuh sak thei ta a. Uluk takin
bawm chhungah an lo dah a. A hun lo taka en kan nih chu kan vanneih phah ta zek
a. Ni danga an phal loh khawih leh thlalak te min phalsak a, kan lawm hle mai. A
tlai deuh tawh na a, Pi Zawni, Pu Zawna (L) (Rev Dr Basil Jones) nupui kan va
tlawh leh hram a. Mizoram tlawh hlim a ni bawk a, sawi tur a ngah hle mai. Pu
Zawna thlan te kan tlawh a, thla te kan lak hnuin kan hawsan ta a. Haw kawngah
Pi Lalnunchami leh a pasal Mike-a te kan tlawh a, Sazuk sa hmeha zanriah te ei
nghalin Rev Sangkhuma te In chu zan dar 9:30 velah kan thleng leh ta a ni.

Thawhlehni (14/2/06)-ah chuan
Presbyterian Church of Wales Mission Board Secretary Rev David Andrew Jones hmu
turin Cardiff lam kan pan leh ta a. Ani nen hian darkar khat vel kan in kawm
hnuah Cardiff khawpui min fan pui a. Pu Sangkhuma te rawngbawlnaah an lungawi
thu leh a term zo tur hi pawtsei leh hram tura min duh thu te min hrilh a. Rev Z
John Malsawma Colney kal ve leh dan tur te kan sawi zui a. Rev John-a hi kal mai
tura kan ngaih laiin a enkawl tur kohhran pathum zinga a hausa deuh ber an in
hnuhdawh leh avanga tangkhang ta a ni ber a. Chu pawh chu Mission Board-in
engemaw zata tanpuia tihhlawhtlin hram an tum thu te min hrilh ta a. Chuti anih
chuan March emaw April thlaah emaw a kal dan tur ngaihtuah ni se tiin kan sawi
dun a. Chhun chaw te min eipui hnuah chawhnu dar 2-ah London pan leh tur ka nih
avangin Pu Sangkhuma nen Bridgend Rail station kan pan leh ta nghal a. Tluang
takin tlai dar 5-ah London Padington station ka thleng leh ta a ni. Rail
Station-ah hian ka thlen in tur pa Mr William Fittal-a’n min lo hmuak a. Train
vawi thum zet kan thlak hnuah Bus-in minute 15 vel kan tlan leh a, an in chu kan
thleng ta a. An fate an awm bo avangin Pu William-a hi a nupui Pi Barbara nen
chauh an awm a. An in erawh a lian hle. Chhawng li (4 floors) a ni a, an thawl
hle mai. Amah Pu William Fittal hi sorkar hnathawk lian tak ni thin a ni a.
Tunah hian Church of England-ah Secretary General hna hun puma thawk a ni. Zanah
House Group meeting ka thlen Inah hian kan nei nghal a. Mi pathum an lo kal a,
kan kal tha vak lo a ni. Bible zirhona leh tawngtaihona te kan neih hnuin zan
dar 10 velah kan bang.

Nilaini (15/2/06)-ah chuan
program duan lawk angin CMS hotute nena in kawm tur a ni a. CMS Office-ah relin
ka kal a. South Asia Manager, Mr Adrian Watkins leh Dr Cathy Ross, Mission
Adviser te ka hmu a, anni nen hian chaw kan eiho nghal a. Chawhnu lamah Fund
Raising Team, Paul Bigmore leh a thian te nen kan in kawm leh a, a bengvar thlak
hle. Zanah Dr Julian Churcher nen Thalai Inkhawm (Alpha Course)-ah kan kal a,
chaw te eiin, inkhawmna hun duhawm tak kan nei a, thalai 40 chuang zet an
inkhawm.

Ningani (16/2/06)-ah chuan CMS
Office-ah bawk kal lehin Ms Carol Walker, Training Manager leh Mr Patrick Gvigan,
web writer te ka hmu leh a. Ms Carol nen hian chhun chaw kan ei dun nghal a. Ani
hi Pakistan-ah hun rei tak Missionary hna lo thawk tawh a ni a. Bangalore-a
Mission Consultation kan neih tuma in hmel hriat kan ni.

Zirtawpni (17/2/06)-ah chuan ka
thlen In pathumna pawh chu ka chhuahsan a lo hun leh ta a. Ka programme-ah chuan
chawhma lam hun awl nei tur anga ziak a ni a. Mahse, a duangtute duan danah
London khawpui hmun thenkhat tlawhna hun tura an tih a lo ni a. Min kalpuitu tur
pawh an lo ruat thlap a. Tichuan chawhma dar 11-ah CMS Office thlengin Mr Adrian
Watkins nen kein kan thawk chhuak ta a. London khawlaia lui hmingthang Thame lui
dung zawh zelin kum sangbi thar lawm nana an siam Millennium Wheel, London Eye
an tih bawk kan tlawh a. Hei hi ‘Merry go-round’ ang deuha siam bawm (capsules)
sawmthum chuang zet nei a ni a. Bawm pakhatah hian thawl takin mi 10 chuang kan
awm thei a. Muang tein a vir a, sir tin atanga London khawpui thlirna nuam leh
remchang tak a ni. Ka thianpa pawh chu a vawi khat chuanna ve tho a lo ni a, kan
hlimpui dun khawp mai. Chhun chaw kan ei zawhah House of parliament (Big-ben leh
Westminster Abbey te ) tlawhin tlai dar 4-a Billericay lam pan turin CMS office
kan pan leh ta a. Billericay-a Pathianni ka hmanna tura min hruaitu tur Ms Julie
Whitfield nen chuan Train station lam kan pan ta a. Train vawihnih kan thlak
hnuin ama carin minutes 15 zet kan tlan hnuah ka thlenna tur Rev Elwin Cockett-a
In chu kan thleng ta a. A ni hi Anglican kohhran Rector a ni a, a enkawlna
hnuaiah hian Pastor leh kohhran panga lai an awm a. A thutchilh kohhran chu
Emmanuel Church a ni. A nupui Susanne leh an fanu Rachel te nen an awm a, an
fapa Thomas erawh chu University-ah Vocal Music zirin a awm bo a ni. Julie
pawhin chaw ei ve nghalin naktuk programme te kan sawi fel hnuah zan dar 9-ah
min hawsan.

Inrinni (18/2/06) zing dar 9-ah
Julie a lo thleng a, Cambridge University tlawh turin kan thawk chhuak ta a. Ama
car a rawn keng leh a, darkar hnih zet kan tlan hnuin Cambridge chu kan thleng
ta a. Chipchiara sawi sen a ni lovah ngai ila, nilengin hmuh tur hlir a ni mai.
Building mawi leh tha tak tak te chu kum zabi 18-na lai vela sak deuh vek an ni
chu a mak tak zet. College hrang hrang leh an Biak In te chu a ropui zia hmufiah
khawpa hun senga en tlak tak vek an ni ang. Chawhnu dar hnih atanga dar thum
inkarah punting (tui kuanga mau tianga in kar kual) kan han ti phei chu a vawt
deuh nain mit a tlai kher mai. Tlai dar li-ah hawin ka thlen In chu tlai dar
rukah kan thleng leh ta a. Ka thlen In te fapa Thomas pawh zan khat riak turin a
lo haw bawk a, kan hlim hle mai. Ka thlen In te hian an thiante chhungkua
Andrew-a leh a nupui Nancy leh an fapa Timothy te chaw eiah an lo sawm bawk a.
Nancy hi Singaporian Chinese a ni a. Andrew hi Construction Engineer a ni. Hong
Kong Airport thar kum 1993-96-a saknaah te thawkin Hong Kong-a Pathian thu ka
han zir ve lai te khan an lo awm ve niin; chung hunlai Hong Kong chanchin te
kan sawi a, kan titi a rual phian nghe nghe a. Zan rei tak thleng kan inkawm
hlawm a, dar 11:30pm-ah ka mu ta a.

Pathianni (19/2/06) zing dar 8
inkhawm chu ka nang hman lova, ka thlen In pa inkhawm bang leh ka zingtho kan in
tawk chauh a ni. Zing dar 10 in khawm turin kan in siam a. Ka thlen In pa chuan
report tawi ka pek zawhah min interview tur thu min hrilh a. Min inhmel hriat
tirna te a neih hnuah report pe turin min sawm a. LCD Projector hmangin
Powerpoint Presentation ka neih ve ang ang te ka han ti ve a. Pastor-in zawhna
te min zawt a. Mihring nuai li emaw lekin Mission hna thawk 1400 vel zet kan
chawm/ rawih theih mai dan te, State hausa lo tak ni chunga Mission budget Cheng
maktaduai 150 zet kan ngah theih mai dan te, CMS nena kan in hriat pawh dan te,
Wales rama Pastor Missionary kan tirh chhan te leh thil dang tam tak min zawt a,
min phur pui ve viauin ka hria. Tlai tawngtai inkhawmah pawh sharing hunah ka
report an sawi zui nasa ve hle a, a hlawhtling ve khat niin ka hria. Zan lamah
khua a nuam lo hle a, khawiah mah chhuak lovin kan awm a.

Thawhtanni (20/2/06) chu ka
thlen In nu Birthday a ni a. Zingah thovin ka zu chibai a, a hna lamah min
kalsan nghal a. Dar 8:30am-ah Julie a lo thleng a, train station lam kan pan dun
leh ta a. CMS Office chu dar 10:30am-ah kan thleng. Dar 11 am-ah Rev mark Oxbrow,
International Director nen darkar khat zet kan in kawm a. Chumi hnuah Prayer and
Advocacy Coordinator Mr Jamie Bird ka hmu leh a. Advocacy Mission hi CMS pawhin
a tihna a la rei bik lova. Mirethei te dikna humhalh na leh retheih avanga
rahbeh leh palzuta awm te tana rawngbawlna pawimawh tak a ni. Rev Mark Oxnrow
leh a Secretary Anton-a te nen chhun chaw kan ei hnuin CMS Chanchinbu ‘YES’
enkawltuten darkar khat dawn min kawm leh a. Zan Ina ka thlenna atana CMS-in min
lo hauh sak Union Jack Club lam ka pan ta a. He hmun hi British Sipai leh an
chhung te zin veivak leh London-a lokal te thlenna atana din a ni a, a ropui
khawp mai. Chhawng 24 vel niin ka hria a. Kei chu chhawng 19-na Room No 331-ah
ka thleng a. Ka programme-a a lan dan chuan zing dar 7-ah taxi-a airport pan tur
ka ni a. Taxi man ka han zawh chuan Pound 50 vel anih thu min hrilh a. Chu chu
Rs 4000/- tihna a ni. Chuti zat zat han sen chu dikin ka hre lo va. Train/ Bus-a
kal dan ka han zawt a. Train vawihnih thlakin Bus-in minutes 10 vel kal lehin
Heathrow Airport chu ka thleng thei a. Underground Train Map te min pe a, fiah
takin min hrilhfiah hnu chuan train-a kal tum chuan ka mu ve ta a.

Thawhlehni (21/2/06) zing dar
6:30-ah thovin Waterloo Station ka pan a. Heathrow Airport thlenna tur ticket ka
han lam a Pound 4 man chauh a lo ni a, ka ringhlel lek lek a ni. Jubillee
Train-ah chuangin station hnih ka kal hnuah Green Park-ah ka chhuk a. Picadilly
train man leh tur ka ni a, ka han kal chu ka thleng harin ka kal kual nasa hle
mai a. A tawpah chuan ka thleng ve ta hlawl a. Station paruk zet ka kal hnu
chuan Hatton Cross-ah chhukin Bus ka la a, minute nga lekah Heathrow Airport
Terminal No 4 chu dar 8am-ah ka thleng ta mai a. Ka thlawh hun tur chu dar
10:30am a ni. Tih tur neuh neuh a tam a, ka thlawh chhuahna tur Gate No 27 ka
thlen meuh chuan dar 9am a lo ri ve mai a. Thlawh hun tur aia minutes 15 vela
tlaiah kan thlawk chhuak thei.

Nilaini (22/2/06) zing dar
1:30-ah Kolkata kan thleng a. Domestic terminal lamah kalin dar 10:25am a thlawk
leh turin ka nghak ta vang vang a. Ka hmanin tih tur a vang kher mai. Ka
thuamhnaw te ka check-in hnuin dar 8:30am velah ka lo thu muhil a, ka thianpa
Liana Delhi kal hawin min rawn kaitho thut mai a. Ka khawhar rei tawh bawk a, ka
lawm hle mai. Kan thlawhna an delay zel a, chawhnu dar 2-ah kan thlawk chhuak ta
chauh a. Dam takin tlai dar 4 velah Zawlkhawpui hlim takin kan lut ta a ni.

Karhnih zet hun khat taka ka zin
vei vah chhungin kohhranhote tawngtaipuina a zarah Pathian awmpuina leh amite
thatna zar ka zo nasa hle a. Pathian leh a kohhranhote chungah lawmthu ka sawi
a. Hetia hah taka ka vah velna hi Pathian kohhranho tana tangkai leh chhawrawm
ni ve hlauh se tih hi ka zin chhung leh tun thlenga ka tawngtaina a ni.