SEC VAWI 265-NA

Vawiin (Nov. 30, 2016) chawhma dar 10 khan Synod Executive Committee vawi 265-na chu Synod Office-a JM Lloyd Hall-ah a thu. Meeting hi Rev. H. Lalrinmawia, Synod Moderator-in a kaihruai a, Upa H. Ronghaka, Synod Secretary-in report a pe.

He meeting hian thu ngaihtuah tur 24 a nei a, hengte hi Synod Board leh Committee dangin an thlir tawh hnua lo lut lehte an ni hlawm.

Thurel tur zingah hian Institute of Laparoscopic Surgery Hospital, Agartala recognise rawtna te, Ruihhlo ngaite hmun khata dah khawm chungchang te, Minister/Pastor hna bansante chungchang kalpui dan tur ruahmanna te, Youth Empowerment chungchang te, Synod Ramthar Rawngbawl Hna Kaihhruaina Bung 34 & 39 Meitei tawnga lehlin dilna te, Synod Higher Secondary School behchhana College din chungchang te, Synod Transit Accomodation, Imphal kalpui zel dan tur te, Serampore College Bicentenary Project atana sum thawh tura ngenna te, Mizoram Synod Ordained ni lo, a hnua lutte vui/sûn dan chungchang te, Kohhran Upa pêm lehkha inang tlanga siam chungchang te, Doctor-te limited private practice rawtna te, Synod Administrative Set Up leh Management en thatna II zawh fiahna te, Synod Multipurpose Training Centre-a Trade thar hawn belh chungchang te chu a langsar zualte an ni.

Vawiin SEC meeting-ah hian member 130 an kal a. Naktukah hian SEC Vawi 266-na an thu chhunzawm dawn a, Kum 2017-18 Synod Budget thar tur an thlirho ang a, additional budget dilna ngaihtuah a ni bawk ang. Tun tangka kum kal mek chhungah hian Pastoral leh Mission belhkhawmin additional budget Rs.3,09,23,000/- (Cheng Nuai zathum pakua singhnih leh sangthum) dilna a lut a ni.