SEC VAWI 279-NA A THU

Vawiin (Feb. 19, 2019) chawhma dar 10 atang khan Mizoram Presbyterian Kohhran hnuaia Committee sang ber, Synod Executive Committee vawi 279-na chu Synod Office-a JM Lloyd Hall-ah a thu a, member 141 an kal a ni. Meeting hian February 21, 2019 thleng a awh ang.

Meeting-ah hian member term hmang zo leh lut thar tur inthlakna tihfel hmasak a ni a, Inneihtir theihna kawltu, Board leh Committee danga inthlak ngaite pawh tihfel zui a ni bawk. Committee hi Rev R. Lalhmingthanga, Synod Moderator-in a kaihruai a, Synod Secretary-in reports a pe a, Finance Reports ngaihthlak a ni bawk. Synod Secretary Rev. R. Vanlalnghaka chuan Synod Executive Committee hmasa leh tun inkar-a thil thleng larsar zual report a pe a, Mizoram sawrkarin a sawm angin Synod Moderator Rev. R. Lalhmingthanga chuan December 15, 2018 khan Raj Bhavan-a Mizoram sawrkar thar lakluhnaah Bible chhiar leh tawngtaina hun a hman thu te, kum 2018 Synod Inkhawmpui thurel angin Pastor 77 leh Pro. Pastor 30, an vaiin 107 te chu January 13, 2019 khan induction neihpui an nih thu te, Mizoram Synod aiawha MPF Committee-a tel turin Rev. K. Lalrinmawia, Executive Secretary leh Rev. Lalrinmawia, Kulikawn West te ruat an nih thu te, CMC Vellore leh CMC Ludhiana Council member atan Rev. B. Sangthanga, Executive Secretary ruat a nih thu te, Zosap Missionary Rev. Dr. Robert-a nupui Mrs. Mair Roberts chu February 11, 2019 khan an chenna Wales-ah a thih thu leh February 16 khan a lawina Berea Newydd Capel, Bangor-ah vuina inkhawm neih anih thu te, January 16 & 17, 2019-a PCI Executive Committee meeting, Silchar Mission Compound-a neihah Tripura Provisional Synod chu Synod puitlinga hlan remtih a nih thu leh March 24, 2019 hian Noagang, Tripura-ah PCI Moderator Rev. Lalramliana Pachuau hawn tura rel a nih thu te, Manipur Area pawh Provisional Synod-a hlan remtih niin a hming atan ‘Tang – Phai Presbyterian Church Synod’ phuah a nih thu leh General Assembly-ah thlen tura rel a nih thu te, Rev. Lianhmingthanga Sailo, Senior Executive Secretary chu PCI Working Committee member atan ruat a nih thu te, February 3, 2019 chawhnu khan Dawrpui Kohhran Biak In-ah Missionary lak thar 86 te tirhchhuah inkhawm neih a nih thu te, January 20, 2019 chawhma khan Durtlang North Biak In-ah Masihi Sangati Evangelist lak thar mi 13 te tirhchhuah inkhawm neih a nih thu te, Christian College din tur atan Synod Moderator chairman-na hnuaiah Governing Board din a nih thu te, Bible Society hnuaia North East India Translation Committee member atan Rev. B. Sangthanga, Executive Secretary ruat a nih thu te, Theological Education Board-in D.Th., M.Th. leh B.D. zir tur a lak thu te, SEC hnuhnûng ber leh tun inkârah Synod Relief Fund atangin Rs. 10,63,000/- sem a nih thu leh Revocation Certificate (RC) mi 52 leh Re-marriage License (RL) mi 69 hnenah pek an nih thu te chu report langsar zualte an ni.

Tun tumah hian thu ngaihtuah tur pawimawh 60 zet a awm a, chung zingah chuan KTP Inkaihhruaina enthat dilna te, Vellore Mizoram House-a Staff Nurse dah rawtna te, Home Mission North-a rawngbawlna tha zawka kalpui dan rawtna te, Tunlai thiamna hmanga nau pai leh fa neih chungchang inkaihhruaina tih danglam rawtna te, Synod Hospital Charity Fund puala thawhlawm thawh chungchang te, MLA tharte nena inkawm chungchang te, Mizo Kristian Inneihna Dan PCI-in kan hman mek hi Indian Christian Marriage Act-in a pawm tura hmalak rawtna te, Champhaia Synod Rescue Home din rawtna te, Central Service-a Mizote kan tlin tam theih nana hmalak rawtna te, Ruihhlo do kawnga Synod-in chak zawka hmalak rawtna te, Synod Partnership Committee dinhmun enthata tih chak rawtna te, Kristian Hla bua hlate tihdanglama Kohhran programme-a sa lo tura inzirtir uar rawtna te, Mizoram Presbyterian Kohhran din ni January 11 urhsun taka hman rawtna te, Birth Control avanga Mizo kan tlem zel chungchang hmalak rawtna te, Kût chi hrang hrang hman chunchanga thuchhuah siam thar rawtna te, Synod Sum Vawn Dan 2011 enthat rawtna te, Barak Area Enkawl Dan enthat rawtna te, Synod Social Front Inkaihhruaina enthat rawtna te, PCM leh MPC Synod Mission rawngbawl ho dan tur te, South East Asia-a Mission kalpui dan tur te, Aizawl khawpui leh a vela Synod Revival hma lakna ‘Operation Nehemia’ tih hi tun aia lian zawka kalpui rawtna te, BSI-a Minister-te thawh dan tur tihchian te, PCI Executive Committee Member ruat that chungchang te, Contract leh Daily rate enthat chungchang te, NEICCYA Biennial Conference 2021 thlen dilna te, Tripura Synod hawn chungchang te, Kohhran Hmeichhe Inkhawmpui Lian Chairman leh General Secretary ruat chungchang te, Tuipang Bial hming Mara hminga thlak dilna te, Co-ordinator post ruak leh Synod Office Asst. Superintendent post ruak hnawhkhah chungchang te, Hall lian (Rev. William Williams Building) sak tur chungchang te, ATC-a D.Th. (Old Testament) hawn dilna leh ATC Faculty-te tana Post Doctoral Programme neih chungchang te, Guwahati-a Vaiphei Kohhran-te enkawl zui dan tur chungchang te, Pay Commission 2018 Report enthat ngai nia hriat te leh International Seminar neih dilna te chu a langsar zual an ni.