SYNFO LEH CKTP TANGKAWPIN FAKZAI AN BUATSAIH

Synfo Department leh Central Kristian Thalai Pawl tangkawp chuan November 22, 2018 (Ningani) zan khan Ramhlun Kohhran Jubilee Hall-ah Krismas pualin Fakzai an buatsaih.

Fakzai Synfo Reality Show programme chi khat a ni a. Kuminah hian Reality Show project chhungah Praise On 2018 Organising Committee chuan Praise On (Beat Group intihsiak) leh Krismas lam hawi Fakzai hi buatsaih tura a ruahman a ni a. Fakzai programme bik hi Central KTP-in inbuatsaihna tul zawng zawng an buaipui a, Synfo-in video coverage an buaipui thung a, Ramhlun Kohhranin an thleng a ni. Hun remchang hmasaah Hruaina Êng channel-ah tihchhuah a ni ang.

Rev. B. Sangthanga, Executive Secretary chuan hunserh a hmang a, T.Upa Rochungnunga, General Secretary CKTP, Upa Zonunmawia, Coordinator, Synfo leh Rev. Dr. K. Lallawmzuala, CKTP Leader ten thuchah tawi an sawi a. Mizoram Synod Choir, One in Christ, Vohbik, Mizo Zaipawl leh Dam Veng Branch KTP te chu group leh zaipawl zaite an ni. Tv. David Vanlalpeka, Nl. Lalduhsaki, Tv. Andrew Laltlankima leh Nl. R. Lalrinmawii te chu solo-in an zai bawk.