SYNFO PRAISE ON 2018 HLANNA HUN HMAN DAWN

September 14, 2018 (Zirtawpni) zan dar 8:45 hian Mission Veng Kohhran Hall-ah Synod Information and Publicity Department(Synfo) buatsaih Synfo Praise On 2018 chu Pathian hnena hlanna hun hman a ni dawn a, Rev. F. Lalrinnunga, Synod Moderator-in a hlan ang.

Hlanna inkhawm hi Upa Zonunmawia, Synfo Coordinator leh Praise On Organising Committee Chairman-in a kaihruai ang a, Tual Upa Ricky Lalrammawia Ralte, Asst. Secretary, Organising Committee & Central KTP-in puan tur tulte puangin inhmelhriattirna a nei ang. Praise On Programme Committee Secretary Pu K. Lalruatpuian Praise On 2018 Endiktu turte leh Host turte puangin inhmelhriattirna a nei bawk ang. Mizoram Synod Choir, Praise On 2017-a lawmman pathumna dawngtu Dawrpui Vengthar leh 2016 Praise On House Band te an zai bawk ang.

Praise On 2018 – Beat Group intihsiakna Mission Veng Kohhran Hall-a neih tur a ni a. Round 1 hi September 18 & 19-ah zawh hman beisei a ni a, September 21 (Zirtawpni) zan dar 8:30-ah Synfo studio atangin Hruaina Eng channel-ah Round 1 intihsiakna results hi puan a ni ang. Round 2 chu October 16-19 chhunga neih tur a ni ang a, Round 3 chu November 6 -9 chhungin neih a ni ang.