SYNFO STUDIO THAR MODERATOR-IN PATHIAN HNENAH HLAN

March 26, 2019 (Thawhlehni) chawhma dar 10 khan Synod Information & Publicity Department (Synfo) Studio thar, Synod Office Annexe Building a mi chu Synod Moderator Rev. R. Lalhmingthanga’n Pathian hnenah a hlan.
Synod Moderator chuan, Synod rawngbawlna pawimawh tak pakhat kan nei thar hi lawmawm a tih thu a sawi a, he studio hi tangkai taka Pathian ropui nan hman a nih theih nan Pathian hnenah a hlan a ni.

Synfo Studio thar hi Kohhran mipuiten tangkai taka an hman theih tura ruahman a ni a, Audio leh Video recording tihna tur a hranin siam a ni. Audio Studio lamah hian mimal zai leh Kohhran Zaipawl te hman theih a ni ang a, Music track an siam thei nghal bawk. Video Studio lamah hian Interview, Talk Show leh thil dang tih theihna tur a ni ang. Studio hmang duh chuan Synfo Coordinator hnenah dilna thehluh tur a ni.