SYNOD BOOKROOM CONFERENCE 2016

Vawiin (June 16, 2016) khan Synod Bookroom chuan kumtina an lo tih thin angin Synod Bookroom Conference 2016 chu Zosaphluia Building, Mission Vengah an hmang a, Mizoram puma Synod Bookroom zawng zawng hei vang hian khar a ni.

 

Conference hi zing dar 9:30-ah Upa R. Lalmalsawma, General Manager, Prescom chuan hawngin inlawmna thu a sawi a. Chawhma hun hi Pu Lalniliana, Synod Bookroom Manager-in kaihruaiin Upa R. Lalramchhana’n Bookroom sum dinhmun report a pe a. Report atanga a lan danin kum kalta khan Synod Bookroom hian nasa takin hma a sawn a. An Budget Rs. 7,82,00,000/- chu tha taka khumin Rs. 12,75,05,054/- zet thawhchhuah a ni a, Synod Bookroom 1911-a din a nih atangin kumkhata a thawhchhuah tam ber tum a la ni. Budget khumna ringawt hi Rs. 4,95,05,054/- zet a ni bawk. Kum kalta chhung khan Net Profit Rs. 47,18,029/- lai Synod Bookroom hian a nei bawk. Pathian awmpuina leh Kohhran mipuite thahnemngaihna azara hetiang dinhmun an thleng thei hi Synod Bookroom chuan lawmthu a sawi a ni.

 

 

Chawhma hunah hian Upa R. Lalmalsawma, General Manager-in kum 2015 Bookroom Conference-a thurelte bawhzui a nih dan leh tihhlawhtlin a nih dan chi hrang hrang report a pe a. Hei bakah hian Financial Year thara Synod Bookroom budget Rs. 8,80,00,000/- chu a pharh nghal bawk.

 

Chawhnu lamah Upa R. Lalmalsawma, Genereral Manager-in programme kaihruaiin Mizoram puma Branch hrang hrangte atangin report leh rawtnate ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni bawk.

 

Rawngbawlna hrang hrang thlirletna leh sawizauna hun hman zawh hian Pu Lalniliana, Synod Bookroom Manager-in Monthly Operation Review khaikhawmna a nei a. Operation review-a a lan danin 2015 kha Synod Bookroom Branch tam ber tan Sale tam ber kum a nih thu leh nikumah Synod Bookroom branch zawng zawngten an budget an khum vek thu tarlan a ni. Tin, nikum chhungin Distributor thar pali; Chawngte, Vaphai, Sihphir leh Sakawrdai ah te hawn thar a nih thu tarlan a ni.

 

Hemi hnu hian kum kaltaa Synod Bookroom Branch tha thlanna result puan a ni a, Rev. P.C. Pachhunga, Executive Secretary chuan Branch tithate hnenah lawmman a sem a ni. Tehna ki hrang hrang pali-a inteh a nih hnuah hetiang hi kum 2015 chhunga Synod Bookroom intehna result chu a ni:-
Pakhatna : Synod Bookroom Lawngtlai branch
Pahnihna : Synod Bookroom Bawngkawn Branch
Pathumna : Synod Bookroom Bazar Branch, Aizawl

 

Tun dinhmunah Synod Bookroom hian Branch 12 zet neiin Distribution Centre 28 a nei mek a. Kum 2016 chhung hian Saiha-ah Branch puitling hawng thar tura hmalak mek a ni a. 2015 chhungin Serchhip leh Lawngtlaiah Bookroom building sak thar a ni bawk.