SYNOD EXECUTIVE COMMITTEE (SEC) VAWI 268-NA NEI MEK

Mizoram Presbyterian Kohhran hnuaia Committee sang ber, Synod Executive Committee Vawi 268-na, ni thum chhung awh tur chu vawiin (June 6, 2017) chawhma dar 10:00 atang khan J.M. Lloyd Hall, Synod Office-ah an thu tan a, member 131 an kal thei a ni.

Committee Meeting hi Rev. Lalzuithanga, Synod Moderator-in a kaihhruai a, Synod Recretary report te, Finance Officer report te leh Audit Report te ngaihthlak a ni a. Annual Statement of Account thlirho a ni bawk. Hemi zawh hian Committee member inthlakna hun hman a ni.

Synod Secretary hnen atangin Synod aiawha Inkhawmpui hrang hranga palai intirh thinnaah te tluang takin palaite an kal thu te, Pastoral Ministry hnuaia thawk tura lak, Pastor, Synod Mission Board hnuaia thawkte Service Record Bu, Synod Service Board lam enkawl tawh tura tih thu te, March 2, 2017 khan Synod Social Front buatsaih Political Education kick-off neih thu te, March 3, 2017 khan Presbyterian Church of India, Hyderabad Mizo Church din thu te, March 15-17, 2017 khan Synod Revival Speakers Residential Training neih thu te, Revival Speaker ten Aizawl khawpui leh a chheh vela mi awm tha duh lote zawng chhuaka rawngbawlna ‘Operation Nehemia’ an kalpui mek thu te, ATC a DCPC course hawn tharah zirlaiten tha taka an pass thu te, Lay Theological Education chu ATC, Durtlang atangin SMTC, Mission Vengthlangah sawn a nih thu te, Missionary lak tharte Tirhchhuah Inkhawm April 19, 2017 khan neih a nih thu te, Synod sum endiktu ten April 2017 chhungin Synod sum endikin sum te him leh dik taka hman a nih thu te, Synod Moderator-in Synod Office Annexe a hawn thu te, May 9-12, 2017 chhunga Pastor Retreat neih thu te, 3rd Battalion, Mangaldai, Assam-a Chaplain hna thawk turin Rev. R. Lalsawta, Vaivakawn (Pensioner) lak thu te, May 14, 2017 khan Bial 5 ah Pastor Induction neih thu te, Pastor Quarters sak thar tur 7 leh sak that tur 2 thlan thu te, Kohhran dinnghehna head atangin Diphu Presbyterian Kohhran Biak In sak nan leh Munnuam Local Church (Presbyterian Church in Bangladesh) Biak In sak nan Rs. 5,00,000/- ve ve pek thu te, June 2, 2017 khan Synod Bookroom Showroom thar, Khatla North Kohhran Biak In hnuai hawn leh luah tan thu te, SEC 267 leh 268 inkarah RC 392 leh RL 460 pek a nih thu te, SEC 267 leh 268 inkarah Synod Relief fund atangin harsatna tuar mi hrang hrangte hnenah tanpuina Rs. 35,68,000/- pek a nih thu te ngaihthlak a ni.

Tuntum SEC a thurel tur chhawpchhuah langsar deuh te chu – Kohhran pawimawhna inzirtir tura kaihhruaina siam thu te, Ram pum huap Social Media chungchang zirhona/seminar buatsaih thu te, Digital Media hmanga Synod rawngbawlna changtlung zawka kalpui rawtna te, Synod Hospital-a damlo awmpuitute tana khualbûk sak chungchang te, Medical Re-imbursement (MR) bill dan kalhmang enthat thu te, Pêm Hruai Dân enthatna te, Nupa Chungchang Dân leh Kohhran Pawl Dangte Nena Kan Inkungkaih Dân enthatna te, Youth Empowerment zir chianna bawhzui dan tur te, Synod Hospital Doctor-te tana Limited Private Practice kawng hawn chungchang te, Evangelical Presbyterian Theological Seminary (EPTS) a zir chhuakte Nepal Mission Field Pastor atana nemngheh dân kawng zawn thu te, Daily leh Contract-a rawhna rate enthat te, Synfo inkaihhruaina enthat thu te, Chhiah chungchanga Hospital dinhmun zir chianna te, Synod Statistic form enthatna te, Tripura Presbyterian Church Provisional Synod kalpui dan tur te, Pay Commission din chungchang te, Kohhran Hmeichhe inkaihruaina enthat thu te, Hmangaihna In inkaihhruaina enthat thu te, Manipur Area Synod-a hlan kai/siam rawtna te, Joint Pastorate Meeting Presbytery-a hlan kai rawtna te, Fellowship atanga pem lehkha/testimonial pawm dan tur te, Kohhran Hmeichhia leh KTP ten letterhead an siam dan tur te, ATC Administrative set-up ruahmanna te, Optometrist post siam dilna te, Kohhran hming sak that/thlak chungchang te, PES hawn dilna te, Synod Prison Ministry Sub-Committee siam chungchang te, Chhim Bial enkawl dân enthatna te, SMTC atana Instructor/Instructress post 2 dil belh chungchang te, Synod PPF sum investment chungchang te leh thil pawimawh chi hrang hrang te an ni.