SYNOD FINANCE COMMITTEE VAWI 120-NA A THU

Mizoram Presbyterian Church Synod Finance Committee vawi 120-na, ni thum chhung awh tur chu vawiin (Nov. 15, 2016) atang khan JM Lloyd Hall, Synod Office-ah an thukhawm tan.

Synod Finance Committee hi Moderator Rev. H. Lalrinmawian a kaihruai a, hming lamna neih zawhah Finance Committee leh Finance Officer Report ngaihthlak a ni. Synod Finance Officer leh Synod Finance Committee Secretary ni bawk, Rev. P.C. Pachhungan report a pe a, kumin chhungin Finance Committee vawi 4 leh Finance Managing Committee vawi 5 an thu a. Synod Office leh Department/Field hrang hrang Account-te Synod ruat Auditor-ten April 2016 chhungin tluang takin an audit a, hemi hnu hian Chartered Accountant-in uluk takin an endik leh a, sumte hi him taka vawn anih thu dawn a ni. Kumin chhungin Pastor Bial 8-ah Finance Campaign neih a ni a, Pastor Bial 4 ah leh Kohhran mal 3 ah Synod Sum Vawn Dan Training neihpui a ni.

April, 2016 atanga October, 2016 chhunga Synod sum dinhmun chu Pastoral-ah Rs. 50,67,47,633/- (cheng nuai sangnga sawmruk pasarih leh singli sang sarih zaruk sawmthum pathum) hmuh tawh a ni a, hei hi za zela 53.70 a ni a, Mission Budget-ah Rs. 40,27,45,995/- (Cheng nuai sangli sawmhnih pasarih leh singli sangnga za zakua sawmkua pakua) hmuh tawh a ni a, hei hi za zela 48.89 a ni. Pastoral leh Mission Budget belhkhawm chu Rs. 90,94,93,628/- (Cheng nuai sangkua sawmkua pali leh singkua sangthum zaruk sawmhnih pariat) a ni a, za zela 51.46 hmuh tawh a ni.

Tun tum Synod Finance Committee-ah hian member 58 zinga 49 an tel thei a, thu ngaihtuah tur chhawpchhuah (agenda) 6 a awm a. Kum 2016 – 2017 Synod Office etc. Accounts Auditor ruat chungchang te, Asst. Finance Manager hna siam rem chungchang te, kum 2016 – 2017 kal meka sum indaih lohna (Additional budget) te, kum 2017 -2018 Synod Budget estimate an thlirho bawk ang. Synod Finance Committee-in Synod Department hrang hrang leh Ramthar Field-te sum ruahmanna (Budget Estimate 2017 -2018) a endik hnuah Synod Executive Committee (SEC), December 1, 2016-a thukhawmin a thlir nawn veleh ang a, Synod Inkhawmpuia pawm turin chhawp chhuah a ni ang.