SYNOD INKHAWMPUI VAWI 95-NA – 2018

Synod Inkhawmpui vawi 95-na chu December 4 – 9, 2018 chhung hian Electric Veng Bialin thlengin, Electric Veng Kohhran Biak Inah neih a ni dawn a, hemi hma hian Committee hrang hrang an thukhawm chho mek bawk. December 4, 2018 (Thawhlehni)-ah Nomination an thu ang a. December 5 – 8, 2018 chhungin Rorel a ni ang a, zan lamah Pathian Biak inkhawm neih thin a ni ang. December 9, 2018 (Pathianni) chawhmaah Pastor nemngheh leh Pro. Pastor dahngheh inkhawm neih a ni ang a, chawhnuah Lalpa Zanriah Sacrament kilho a ni ang a, Zan Pathian Biak Inkhawmah Moderator valedictory sermon ngaihthlak a ni ang.

Kumin Synod Inkhawmpui Thlarau lam thupui chu ‘I ram lo thleng rawh se’ (Matthaia 6 : 10) a ni a, Dec. 8, 2018 (Inrinni) zanah Rev. Dr. Vanlalnghaka Ralte, ATC-in a sawi ang.

Kumin 2018 Synod Inkhawmpuia Synod Puipa turte chu heng te hi an ni :
Moderator : Rev. R. Lalhmingthanga
Secretaries : Upa R. Dengzikpuia (Sr.) & Rev. R. Vanlalnghaka (Jr.)
Finance Officers : Rev. P.C. Pachhunga & Rev. H. Remthanga
Statistician : Rev. R. Lalnuntluanga
Executive Secretaries : Rev. Lalramliana Pachuau & Rev. B. Sangthanga

Synod Inkhawmpui hi kum 2010 atang khan Bial-in an thleng tan a, kum 2010 – ah Dawrpui Pastor Bialin Zarkawt Kohhranah thlengin kum 2011 khan Khatla Bialin Khatla Kohhranah an thleng a, kum 2012 khan Chanmari Bialin Chanmari Kohhranah an thleng leh a, kum 2013 khan Ramhlun North Bialin Ramhlun North Kohhranah an thleng a, kum 2014 khan Mission Vengthlang Bialin Mission Vengthlang Kohhranah an thleng a, kum 2015 khan Tuikual Bialin Tuikual Kohhranah an thleng a, kum 2016 khan Durtlang Bialin Durtlang Kohhranah an thleng a, Nikum 2017 khan Bungkawn Bialin Bungkawn Kohhranah an thleng a, kumin 2018 hian Electric Veng Bialin Electric Kohhranah an thleng dawn a ni. Nakkum (2019) Synod chu Mission Veng Bial-in Mission Veng Kohhran Biak Inah an thleng ang.

Synod Inkhawmpui Vawi 95-na Programme Click Here