SYNOD INKHAWMPUI VAWI 95-NA

Synod Inkhawmpui vawi 95-na chu nizan (Dec. 4, 2018) atang khan Electric Veng Kohhran Biak Inah tan a ni ta a, December 9, 2018 (Pathianni) zanah a tiak ang.

Kumin Synod Inkhawmpui thlarau lam thupui hi ‘I ram lo thleng rawh se’ (Matthaia 6 : 10) a ni a, Dec. 8, 2018 (Inrinni) zanah Rev. Dr. Vanlalnghaka Ralte, ATC-in a sawi ang.

Kumin 2018 Synod Inkhawmpuia Synod Puipa turte chu heng te hi an ni :
Moderator : Rev. R. Lalhmingthanga
Secretaries : Upa R. Dengzikpuia (Sr.) & Rev. R. Vanlalnghaka (Jr.)
Finance Officers : Rev. P.C. Pachhunga & Rev. H. Remthanga
Statistician : Rev. R. Lalnuntluanga
Executive Secretaries : Rev. Lalramliana Pachuau & Rev. B. Sangthanga

Synod Inkhawmpui hi kum 2010 atang khan Bial-in an thleng tan a, kum 2010 – ah Dawrpui Pastor Bialin Zarkawt Kohhranah thlengin kum 2011 khan Khatla Bialin Khatla Kohhranah an thleng a, kum 2012 khan Chanmari Bialin Chanmari Kohhranah an thleng leh a, kum 2013 khan Ramhlun North Bialin Ramhlun North Kohhranah an thleng a, kum 2014 khan Mission Vengthlang Bialin Mission Vengthlang Kohhranah an thleng a, kum 2015 khan Tuikual Bialin Tuikual Kohhranah an thleng a, nikum (2016) khan Durtlang Bialin Durtlang Kohhranah an thleng a, nikum (2017) khan Bungkawn Bialin Bungkawn Kohhranah an thleng a, kumin 2018 hian Electric Veng Bialin Electric Kohhranah an thleng a ni. Nakkum (2019) Synod chu Mission Veng Bial-in Mission Veng Kohhran Biak Inah an thleng ang.

Nizan (Dec. 4, 2018) khan Palai lawmna leh report inkhawm neih a ni a, Moderator tang lai Rev. F. Lalrinnunga’n palai lawmna thu sawiin kum 2018 chhunga Synod Report a pe bawk.

Vawiin (Dec. 5, 2018) khan Rorel inkhawm tan hmain Moderator kal chhuak Rev. F. Lalrinnunga’n Moderator thar, Rev. R. Lalhmingthanga hnenah Moderator mawhphurhna a hlan a, rorel tan nghal a ni. Kumin hian Nomination Committee thu 9, Pastoral 16 leh General Agenda 53 zet ngaihtuah a ni ang. Synod Rorel inkhawm hi Inrinni thlenga neih tura ruahman a ni a, zan lamah vantlang Pathian biak inkhawm neih thin a ni ang. Pathianni chawhmaah Pastor nemnghetin Pro Pastor dah ngheh an ni ang a, chawhnu lamah Synod Moderator Rev. R. Lalhmingthanga’n Lalpa Zanriah Sacrament a theh ang a, Minister chatuan ram pan te sunna hun hman a ni ang. Zan inkhawmah Moderator kal chhuak Rev. F. Lalrinnunga’n Valedictory Sermon a sawi ang.

Synod inkhawmpui vantlang Pathian biak inkhawm te hi Synod Information & Publicity Department ten video-in an cover dawn a, Hruaina Eng TV channel-ah live a pek chhuah thin a ni ang.

Synod Inkhawmpui Vawi 95-na Programme Click Here

Synod Inkhawmpui 2018 thurel thenkhat (Day 1 – Dec. 5, 2018) Click Here

Day 2 (Dec. 6, 2018) :

Synod inkhawmpui rorel ni hnihna vawiinah rawngbawlna chungchanga thil pawimawh tak tak rel a ni.

Rorel Inkhawm hi Moderator Rev. R. Lalhmingthanga’n a kaihruai a, General Agenda sawihoin, Agenda No. 12-na thleng an rel hman a. General Agenda 1-na ‘Synod Hospital Durtlang-ah inbiakpawhna tha zawk a awm theih nan kawng zawn’ chungchang chu hmalak mek a nih thu sawilan a ni a. General Agenda 2-na ‘Pro-Pastor dahna hmun tun aia uluk zawka ngaihtuah rawtna’ chu uluk zawka kalpui ni se an ti a. General  Agenda 3-na ‘Vellore Mizoram House-a staff nurse dah rawtna’ chu hmun dang pawh thlir telin Synod Execitive Committee (SEC)-in hma la rawh se, an ti a.

General Agenda 4-na ‘Pastor transfer & posting Synod-a pharh hmaa leak out lo tura tan lak rawt thu’ leh General Agenda 5-na ‘Synod Inkhawmpui dawna Committee hrang hrang thurel sawi darh loh dan zawn’ tih chu kaikawpin SEC-in lo bawhzui se, an ti a, General Agenda 6-na ‘Synod hnuaia thawktu lakah zuk leh hmuama fihlim chauh lak rawtna’ pawh SEC-in lo bawhzui se, an ti.

General Agenda 7-na ‘Missionary transfer & posting tun aia mumal zawka tih rawt thu’ te, General Agenda 10-na ‘Home Mission North-a rawngbawlna tha zawka kalpui dan zawn rawtna’ te, General Agenda 11-na ‘Tunlai thiamna hmanga naupai leh fa neih chungchang inkaihhruaina tihdanglam rawtna’ leh General Agenda 12-na ‘Synod Hospital Charity Fund puala thawhlawm thawh chungchang’ pawh SEC bawhzui turin an dah a ni.

Day 3 (Dec. 7, 2018) :
Vawiin (Dec. 7, 2018) chawhma dar 9:30 atangin Moderator Rev. R. Lalhmingthanga kaihhruaina hnuaiah rorel chhunzawm leh a ni a.

General Agenda 13-na ‘Mizo Holy Bible Diamond Jubilee ram pum huapa lawm dan kawng zawn rawtna’ chu BSI Committee lamin lawmna tur a buatsaih dawn niin hriat a ni a, Kohhran malin a hrana lawmna lo buatsaih chu a remchang lo ve, an ti a. General Agenda 14-na ‘Mizo Kristian Inneihna Dan PCI-in kan hman mek hi Indian Christian Marriage Act-in a pawm tura hma lak rawtna’ chu pawm theih tura hmalak tha tih a ni a, SEC-in kawng lo zawng se, tih a ni. General Agenda 15-na ‘Champhaia Synod Rescue Home din rawtna’ chu tha tiin SEC-in lo bawhzui se, tih a ni bawk.

General Agenda 16-na ‘Synod Hospital-ah mit chhungril enna (Optical Coherence Tomography) neih dan ngaihtuah tura rawtna’ chu Hospital Board lamin a neih theih dan kawng lo zawng rawh se, tih a ni. General Agenda 17-na ‘Central Service-a Mizote kan tlin tam theih nana hmalak rawtna’ chu SEC bawhzui tura dah a ni. General Agenda 18-na ‘Hunthar Pastor bial chhunga zu leh ruihhlo zuarte puala beihpui thlak rawtna’ pawh SEC in a tihhlawhtlin dan kawng lo zawng se, an ti. General Agenda 19-na ‘Missionary lak tharte training chhung tun aia tihrei dan zawn rawtna’ chu Synod Mission Board-in lo ngaihtuah rawh se, tih a ni a.

General Agenda 20-na ‘Pulpit leh Maicham humhalh dan hi en thata inzirtir thar leh rawtna’ chu Pulpit leh Maicham humhalh leh hman dan mumal tak kan nei a, sawihona hi a tawka ngaih a ni. General Agenda 21-na ‘Bial Sunday School Secretary-te term kum 2 tura rawtna’ chu pawm a ni a, kum 2019 atangin hman tan nghal tura tih a ni.

General Agenda 22-na ‘Ruihhlo do kawngah Synod-in chak zawkin hma la rawh se’ tih rawtna chu tha tiin SEC lo bawhzui tura dah a ni. General Agenda 23-na ‘Synod Partnership Committee dinhmun en thata tihchak rawtna’ chu thil tul tak niin hriat a ni a, SEC in lo en tha in Synod-ah rawn thlen leh rawh se, tih a ni.

General Agenda 24-na ‘MSSU chawimawina Medal hi midang dawr lovin Synod-in siam se tih rawtna’ chu sawihona hi a tawk e, tih a ni. General Agenda 25-na ‘Kristian Tlangau Bu tihlen rawtna’ chu ngaihtuah a ni a. Hemi chungchang hi SEC 275 in a lo rel tawh a ni a, sawihona hi a tawk e, tih a ni a. General Agenda 26-na ‘Ram pum huap Zaipawl intihsiak buatsaih leh rawtna’ pawh sawihona hi a tawk e, tih a ni bawk.

General Agenda 27-na ‘Sawrkar-in kawng hrang hranga mimal dinhmun tihchian nana Baptisma Certificate, Inneih Certificate leh kohhran atanga hriatpuina chi hrang hrang a phut thin hi a chhan leh vang chhuichhuah a, tih tlem emaw, tih tawp dan kawng zawn ni rawh se’ tih chu SEC bawhzui tura dah a ni. General Agenda 28-na ‘Pastor Quarters chhung thuam dan bithliah siam rawtna’ chu kan thuam dan tihchian tha tih a ni a, SEC in lo bawhzui rawh se, tih a ni. General Agenda 29-na ‘Ordained Minister post ngheta Mizoram chhunga rawihte tana Quarters sak ni rawh se’ tih chu kan la tlin rih lo ve, tih a ni. General Agenda 30-na ‘Frazer Clinic-ah thisen, zun leh êk exam-na khawl thar dah rawtna’ chu sawi ho a ni a, khawl tha zawka thlak a nih tawh thu inhrilhfiah a ni.

General Agenda 31-na ‘Kristian Hla Bua hlate tidanglama Kohhran programme-a sa lo tura inzirtir uar ni rawh se’ tih chu Kristian Hla Bua hlate humhalhna hre chungin SEC ngaihtuah zui tura dah a ni. General Agenda 32-na ‘HIV/AIDS invenna Condom hmang rawh, tih hi HIV/AIDS kai lo turin fimkhur rawh, tia thlak turin sawrkar-ah ngen ni rawh se’ tih chu sawrkar hmalak mekna a nih thu inhrilhfiah a ni. General Agenda 33-na ‘Synod Inkhawmpuiah Presbytery pakhat atangin agenda pathum aia tam lo neih rawtna’ chu kal dan pangngai hi a tha e, tih a ni. General Agenda 34-na ‘Tawng thei lo leh beng ngawngte tana zirna school buatsaih rawtna’ chu sawihona hi a tawk e, tih a ni.

Day 4 (Dec. 8, 2018) :
Vawiin (Dec. 8, 2018) chawhma dar 9:30 atangin rorel chhunzawm leh a ni a, Moderator Rev. R. Lalhmingthanga’n rorel a kaihruai.

General Agenda 35-na ‘MRI khawl lei thuai tura chak zawka hmalak chungchang’ chu hmalak mekna a ni e, tiin inhrilhfiah a ni. General Agenda 36-na ‘Mizoram Presbyterian Kohhran din ni January ni 11 urhsun taka hman rawtna’ chu tha tiin SEC-in ruahmanna lo siam rawh se, an ti. General Agenda 37-na ‘MSSU Pathian thu exam neih leh rawtna’ chu tuna kal dan ngai hi a tha e, tih a ni. General Agenda 38-na ‘Birth Control avanga Mizo kan tlem zel chungchanga hmalak rawtna’ chu pawmin SEC-in hma lo la rawh se, tih a ni. General Agenda 39-na ‘Kût chi hrang hrang hman chungchanga thu chhuah siam thar rawtna’ chu SEC-in hma lo la rawh se, tih a ni.

General Agenda 42-na ‘Executive Secretary thlan tharte leh an hna chanpual (2019-2021) (SEC 275:25)’ hetiang hian siam rem a ni :
Rev. Lianhmingthanga Sailo, Senior Executive Secretary
(1) Pastoral
(2) Finance
(3) General Administration
(4) Pension & Provident Fund
(5) Theological Education
(6) Service Board
(7) Administrative Areas
(8) Revival
(9) Synod Trust
(10) Endowment Fund
(11) |ul dang apiang

Rev. B. Sangthanga, Executive Secretary
(1) Sunday School
(2) PRESCOM
(3) Hospital
(4) SL & PB
(5) Campus Ministry
(6) Nupa Thu
(7) FG & CC
(8) Kohhran Hmeichhia
(9) Hmangaihna In
(10) SMTC
(11) Hmeichhe Hostel

Rev. K. Lalrinmawia, Executive Secretary
(1) Ramthar
(2) Education
(3) Social Front
(4) Synod Worship
(5) Archives
(6) KTP
(7) Presbyterian Bible School
(8) Research & Evaluation Wing
(9) Synod Information & Publicity
(10) Partnership
(11) Synod Prison Ministry

Executive Secretary-te Bungalow/Quarters luah dan tur pawh hetiangin ruahman a ni:-
(1) Rev. Lianhmingthanga Sailo – Bangla pui
(2) Rev. B. Sangthanga – Zosaphluia Building (First Floor)
(3) Rev. K. Lalrinmawia – Zosaphluia Building (Ground Floor)

General Agenda 43-na ‘Administrative Secretary thlan tharte (2019-2021) – (SEC 275:61) awmna tur hetiang hian pawm a ni :-
(1) Barak Area – Rev. Rualthankhuma
(2) Chhim Bial – Rev. John Raldosanga
(3) Manipur Area – Rev. R. Lalhmingsanga

General Agenda 44-na ‘Department Hotu thlan tharte (SEC 275:43, 46 &56)’ hetiang hian pawm an ni :-
(1) Rev. C. Zorammawia, Secretary, Synod Mission Board (2019-2021)
(2) Rev. Dr. Vanlalnghaka Ralte, Principal, Aizawl Theological College (2019-2022)
(3) Rev. Dr. C. Chawnghmingliana, Editor, SL&PB (2019-2021)

General Agenda 45-na ‘Synod Sum Vawn Dan 2011 enthat rawtna’ chu SEC in lo en tha se, Synod-ah rawn thlen leh rawh se, tih a ni a. General Agenda 46-na ‘Barak Area Enkawl Dan enthat rawtna’ chu SEC-in lo en tha se, Synod-ah rawn thlen leh rawh se, tih a ni. General Agenda 47-na ‘Synod Social Front Inkaihhruaina enthat rawtna’ chu SEC-in lo en tha se, Synod-ah thlen leh tura tih a ni. General Agenda 49-na ‘Arunachal leh Assam Mission Field North Headquarters sawn rawtna’ ngaihtuah a ni a, Aolo atanga Pasighat a sawn rem tih a ni. General Agenda 50-na ‘PCM leh MPC Synod Mission rawngbawl ho dan tur’ ruahmanna ngaihtuah ho a ni a, SEC-in hman nghal turin lo siamtha rawh se, tih a ni. General Agenda 51-na ‘South East Asia-a Chanchin Tha hrila luh rawtna’ Synod Mission Board lamin an zir chianna chu zir chiang leh se, Synod-ah rawn thlen leh rawh se, tih a ni bawk.

General Agenda 48-na ‘Pay Commission Report 2018 thlirho’ a ni a, January 2019 atanga hman tan turin pawm a ni a, belh ngai leh zut mam ngai a awm chuan SEC bawhzui tura dah a ni. General Agenda 52-na ‘Synod Hospital Board Ex-Officio Member-a Medical Superintendent John Williams Hospital telh chungchang’ ngaihtuah a ni a, SEC (275:63) in Medical Superintendent, John Williams Hospital chu Synod Hospital Board Ex-Officio member-ah telh ve tura a rawtna chu pawm a ni. General Agenda 53-na ‘Aizawl khawpui leh a vela Synod Revival hma lakna ‘Operation Nehemia’ tih hi tun aia lian zawka kal pui’ rawtna chu SEC-in chak leh zau takin hma lo la zui rawh se, tih a ni.

FINANCIAL
Rev. P.C. Pachhunga, Finance Officer hnen atangin April – October, 2018 chhunga Synod sum dinhmun report a pek chu pawm a ni bawk. Hetiangin :-
Sum hmuh zat –
1. Pastoral-ah : Rs. 68,64,59,520 (82.75%)
2. Mission-ah : Rs. 54,42,06,826 (59.11%)
3. Hmuh zawng zawng : Rs. 1,23,06,66,346 (62.64%)

Nikum khumna –
1. Pastoral : Rs. 7,21,88,620 (11.75%)
2. Mission : Rs. 7,79,24,705 (16.71%)
Total : Rs. 15,01,13,325 (13.89%)

Kum 2019-2020 Synod Budget Estimate –
Kum 2019-2020 Synod Budget ruahmanna pharh a ni a, hetiang hian pawm a ni :

Hmuh tum Hman tum
1 Patoral  Rs.    1,96,27,82,000  Rs.    1,96,27,82,000
2 Mission  Rs.    1,11,42,61,000  Rs.    1,11,42,61,000
Grand Total  Rs.    3,07,70,43,000  Rs.    3,07,70,43,000

Vawiin (Dec. 8, 2018) tlai khan tluang takin rorel hi zawh a ni. Naktuk (Dec. 9, 2018) chawhma inkhawmah Pastor nemngheh leh Pro. Pastor dah ngheh an ni ang a, chawhnu inkhawmah Moderator Rev. R. Lalhmingthanga’n Lalpa Zanriah Sakramen a theh ang a, Minister chatuan ram pan te sunna hun hman a ni bawk ang. Zan inkhawmah Moderator kal chhuak Rev. F. Lalrinnunga’n Valedictory Sermon a sawi ang.

Synod Inkhawmpui 2018 Vantlang Pathian Biak Inkhawm hi Hruaina Êng TV, LPS 5 leh Zonet Bawhbel-ah live-a pek chhuah thin a ni.Pathianni chawhma, chawhnu leh zan programme chu LPS 1, Zonet Zawlbuk leh Hruaina Êng channel-ah pek chhuah a ni ang.

Zanin atangin ram pawna miten an lo thlir theih ve turin Hruaina Êng Youtube channel-ah pek chhuah tan a ni bawk.