SYNOD OFFICE ANNEXE BUILDING THAR HLAN LEH HAWNN

Vawiin (May 2, 2017) khan Synod Office Annexe Building thar chu Synod Moderator Rev. Lalzuithanga’n Pathian hnenah hlanin a hawng.

Building thar hlanna leh hawnna hun hi Rev. Lalramliana Pachuau, Senior Executive Secretary in a kaihruai a, T.Upa Thangliankhuma, Synod Office Assistant Engineer-in Technical Report a pe. Synod Moderator Rev. Lalzuithanga’n Ribbon chepchatin Building thar hlanna leh hawnna hun a hmang nghal a, Rev. P.C. Pachhunga, Executive Secretary-in lawmthu sawina hun hmangin Rev. Lianhmingthanga Sailo, Synod Secretary-in Malsawmnain programme a khar a ni.

Kum 2011 Synod Inkhawmpui Gen. 66-in a remtih angin Synod Office Annexe Building hi Synod Office bul hmar lam Annexe Building leh Music Class Room Building hmun hluiah sak a ni a. Mizopa chhiara chhawng li-a sak a ni a. Ground Floor-ah hian Motor pariat leh Two wheelers dah theih tura siam a ni a, a khawchhak lamah Canteen awm tura ruahman a ni bawk. Basement-I pumpui hi Synod Worship Department thawktute leh Music Class Room hrang hrang awmna tura ruahman a ni. Basement-II pumpui hi Synod Information & Publicity Department (Synfo) thawktute leh Studio awmna tur atan ruahman a ni a, Basement-III ah hian Chowkidar Quarters leh Synod Trust Store Room aawm tura ruahman a ni bawk. Floor tinah mipa leh hmeichhe inthiarna dah a ni a, inchhung step hrulah hian a tul huna Lift/Elevator dah theih turin ruahman a ni bawk.

Plan & Estimate hi TBL Architect Consultant, Khatla te siam a ni a, Architect hi Upa Samuel Lalfana a ni a, Structural Engineer hi Er. Hrangthanga Zote a ni. Annexe Building sak hna hi Synod Trust Committee-in a enkawl a, Upa R. Sangkhuma, Khatla chuan a sak hna hi a thawk a ni. September 2, 2013-ah hna tan a ni a, March 28, 2017 (kum 3½) ah sak zawh a lo ni ta a ni. A sak nan hian Rs. 485,45,000/- ruahman a ni a, ruahmanna ang takin sak zawh theih a ni. Total Floor Area hi 15191sq.ft. a ni a, a chung lam zawm belh zel theih tura ruahman a ni.