SYNOD OFFICE BUILDING TECHNICAL REPORT & SAK REPORT

SYNOD OFFICE SAK REPORT
Rev. Dr. R. LalbiakmawiaExecutive Secretary i/c Property 

Tuna Synod Office kan thiah mek hi Ni 11.11.1971 chawhma Dar 11:00-ah Rev. Thansiama, Synod Moderator-in a lungphum (foundation) a phûm a. Kum 1976 Synod Inkhawmpui tan ni (Ni 9.12.1976), Inkhawmpui hawnna leh Palai hming lamna neih zawhah Rev. Zairema, Synod Moderator-in a hawng a. Upa Chalhnuna, Synod Secretary (Sr.) chuan Synod Office sak dan report a pe a. Ni 6 May, 1977 khan Office atana luah tan a ni. Kan Synod Office hi a sak dan te a thain kan chhuang êm êm a. Kohhrante min tipumkhattu leh nghehna min thlentu pawimawh tak a ni.  

Kan Synod Office hi kum 30 kan lo luah ta a. He kum 30 chhung hian Kohhran hoten Pathian hruaina ropui tak kan dawng a, nasa takin hma kan sâwnin kan lo thang ta a ni. Thawktute kan lo pung zel a, Synod Office atana ruahmanah kan leng ta lo va. Synod Office chung, Hall atana ruahman chu Office-ah kan hmang a, kan len loh avangin a kawmchâra Synod Committee Room chu Office-ah kan hmang leh a, kan len loh avangin Mission Veng Pastor Quarters atana sak kan luah leh a. Chutah pawh chuan kan len leh tak loh avangin in dang kan sa leh a, Office atan kan luah leh bawk a ni.  

Hetiang hi a nih avangin kum 2005 Synod Inkhawmpui chuan “SEC rawtna ang hian Synod Office pumpui sak that chu a tha e kan ti”  tiin a rel a (2005 Synod Gen. 52). Budget-ah Rs. 50,00,000/- (Nuai sawmnga) dah a ni a. 2007-2008 Budget-ah hian Rs. 50,00,000/- (Nuai sawmnga) dang dah leh a ni a. Heng sum hmang hian a sak hna hi thawh tan kan tum ta a ni.   

Synod Office kan sak tur hi A dung ft. 78 (+10), A vâng ft. 60 a ni a. Ground coverage chu 4,980 sq.ft a ni a. Floor zawng zawng zau zawng chu 24,000 sq.ft a ni ang. Chhawng sarih sak theih tura ruahman a ni a. Tunah hian chhawng thum, mizo chhiar dana chhawng li a sak tum a ni a. Ramthar Office-a kan hman thin (Basement) hi Motor dahna (Car Parking) atana siam a ni ang. A in chhawng sân zawng hi ft. 12 zel a ni ang a. A chhuat (Ground Floor) atang chuan ft. 48-a sang a ni ang a, Basement atang chuan ft. 60 vela sang a ni ang. A sak nan hian Cheng nuai zahnih sawmli leh paruk (Rs. 2,46,00,000/-) ruahman a ni. Inkhai chhohna leh chhukna tur (lift) pawh awm tura ruahman a ni.         

Kan Synod Office hi kan sak that dawn avangin June 18, 2007 khan thiah tan a ni a. Aizawl Khawpui chhunga Pastor Bial hrang hrangte hnatlanga thiat tura sawm an ni a. Thahnemngai takin Pastor Bial tinte an lo thawk a, mi 3224 an lo thawk chhuak thei a, kan lawm êm êm a ni. A thiah hna hi hlawhfa ruaia thawh chhunzawm zêl tum a ni a. Tunah hian a thiah hna hmun thuma thena hmun khat (1/3) chu thawk tawhah kan inngai a ni.

Office hi pindan nek nek awm lo (Open Office System) an tih anga siam tum a ni a. Kan Synod hotute – Moderator, Synod Secretary leh Executive Secretary-te leh Mission Board Secretary Office erawh chu pindan sak tum a ni a. Committee Room lian deuh leh tê deuh (mi 20 atanga 200 len theihna) pathum siam tum a ni a. Tin, a chhawng sang ber chu Convention Centre atana siam tum a ni a. Archive Hall te, Recording Studio leh Bank (ATM) te awm tura ruahman a ni bawk. Synod Office hmasa kan sa ang bawk khan a sa turin mi harsa leh chhuanchham te hre reng thei ila a duhawm hle ang. Tin, kan thalaite tan Cement Mistiri zirna a ni nghal ang a, kan work culture siam that nan hman kan tum bawk dawn a ni.

Synod Office thar kan sak tur hi ruahmantu atan L.B. Associates Dr. Lalbiakmawia Ngente (Architech) thlan a ni a. Tin, Structural Design min siam saktu chu Pu H. Zoramliana, B.E. (Civil); M.E. (IIT), tuna PWD-a E.E. thawklai leh World Bank Project-a thawk mek a ni a. Anmahni avang hian a sakna bungrua pawh tlawm zawka lei kan tum mek a ni. Tin, Work Manager atan Pu J. Lalhmachhuana, Mission Veng sâwm a ni a, kan hnathawktute hneh takin a kaihruai mek a ni.

Kan Synod Office hmasa khan Kohhranhote min tipumkhatin, nghehna min siam sak nasa hle a. Tuna kan sak leh tur pawh hi Kohhranhote min tipumkhattu leh nghehna leh hmasawn zêlna kawnga tanpuitu lo ni zêl se la. Tha tak leh fel taka kan sak zawh ngei theih nan Kohhran hoten tan i la zel ang u. 

Lalpa’n chakna thar min pe zel rawh se.