SYNOD PASTORAL COMMITTEE (2016-2018) VAWI 4-NA A THU

Vawiin (May 2, 2017) khan Synod Office-a J.M. Lloyd Hall-ah Synod Pastoral Committee a thu a, hei hi kum 2016 – 2018 term thutkhawm vawi 4-na a ni. Meeting-ah hian member 106 an kal thei a ni.

Pastoral Committee meeting hi Synod Moderator Rev. Lalzuithanga’n a kaihruai a, thu pawimawh tak tak ngaihtuah tur (agenda) 4 chhawpchhuah a ni. Rev. Lianhmingthanga Sailo, Synod Secretary-in reports pein Secretary reports-ah hian hengte hi tarlan a ni :

1. Kum 2016 Synod Inkhawmpuiin a rel angin Synod Mission Field chhungah January 15, 2017 khan Bial thar 4 tluang taka hawn a ni.
2. Synod Inkhawmpui 2016-in Pastor leh Pro. Pastor awmna a sawnte leh an awmna tur a ruat thar Pastor 71 leh Pro. Pastor 23 (an vaiin 94) te chu ruahman lawk angin January 15, 2017 khan tluang takin Induction neihpui an ni.
3. Mizoram Synod hnuaia Pro. Pastor lak tharte chuan February 13 – 17, 2017 chhung khan Synod Multipurpose Training Centre (SMTC) ah Orientation training tluang takin an nei.
4. Rev. A.K. Dawia, Tripura-a Bru ral tlan zinga rawih mek chu March – December, 2017 atan rawih chhunzawm leh a ni a, Rev. Thangzauva, Cancer Hospital, Zemabawk-a Chaplain atana rawih mek chu January – December, 2017 atan rawih chhunzawm a ni bawk.
5. Minister chatuan ram pan ta, Rev. Dr. Lalsawma (87), Mission Vengthlang leh Rev. Tlanglawma (80) te chu Synod Moderator Rev. Lalzuithanga leh Synod Moderator kal chhuak Rev. H. Lalrinmawia te’n an vui thu tarlan a ni a.
6. Rev. Dr. Vanlalchhuanawma chu Union Biblical Seminary (UBS), Pune-a Principal hna kum khat atana thawk tura sawm a ni a, May 2017-ah hna a zawm.
7. Pastor Quarters sak thar tur 7 leh sak that tur 2 Synod OM in a thlan thu tarlan a ni bawk.

Synod Pastoral Committee hian Synod hnuaia Pastor hna thawk lai mek zirna sang zawk zir chhunzawm dilte chungchang a ngaihthuah a. Diltu hi Pastoral hnuaia mi 4, Ramthar Board hnuaia mi 6 leh Theological Education Board-in Faculty Development atan a dilpui mi 6, an vaiin 16 an ni.