SYNOD PASTORAL COMMITTEE A THU

Vawiin (May 8, 2019) khan Synod Office-a J.M. Lloyd Hall-ah Synod Pastoral Committee a thu a, hei hi kum 2019 – 2021 term thutkhawm vawi 1-na a ni. Meeting-ah hian member 107 an kal thei a ni.

Pastoral Committee meeting hi Synod Moderator Rev. R. Lalhmingthanga’n kaihruaiin Rev. R. Vanlalnghaka, Synod Secretary-in reports a pe.

Report-ah hian kum 2018 Synod-in Pastor leh Pro. Pastor a sawnte leh an awmna tura a ruat thar Pastor 77 leh Pro. Pastor 30, an vaiin mi 107 te chu January 13, 2019 khan induction neihpui an nih thu te, Pastor zirna sang zawk bei mekte induction neih hun atan May 12, 2019 ruat a nih thu te, SEC-in Pastor pahnih, Rev. F. Lalremruata chu Monirampur Bial, Tripura-ah leh Rev. Samuel Lalmuanpuia Pachuau chu Koilamati Bial, Karbi Anglong-ah te awm tura a ruat thar thu te, Pro. Pastor lak thar 16 te tan Orientation February 26 – March 1, 2019 chhung khan neih a nih thu te, Synod Pastoral Ministry thupui chu Synod Inkhawmpuiin a thlan angin ‘Thlarau rah – Insumtheihna’ Galatia 5:23 tih a ni a, hemi thupui kaihhruaina hi OM in a siam a, semchhuah mek a nih thu te tarlan a ni.

Tun tum Pastoral Committee-ah hian Pro. Pastor Apan Lal Deb – Tripura Synod hnuaia Pro. Pastor hna thawk mek, Mizoram Synod Mission Board hnuaia Pastor a thawh tir tura Tripura Synod ngenna chungchang te, Pastor an nupuite nena awmho thei lo kalpui zel dan tur rawtna te, Minister zirna sang zawk dilte : Pastoral Ministry hnuaia thawk mi 8 Synod Mission Board hnuaia thawk lai mi 8 leh Theological Education Board hnuaia Faculty Development atana dilpuite mi 2 chungchang te ngaihtuah a ni ang.