WOMEN CENTRE-A PUANTHUI & PUAN TAH HAWNNA HUN HMANG

Nimin (Jan. 14, 2019) khan Women Centre, Phunchawng-a puanthui (5th Batch) leh Puan tah (3rd Batch) hawnna hun hman a ni a, Rev. B. Sangthanga, Executive Secretary i/c Kohhran Hmeichhia chuan a hmanpui a ni.

Hawnna hun hi Pi K. Lalliantluangi, Inkhawmpui Lian Chairman-in a kaihruai a, Pi Lalpianthangi Hrahsel, General Secretary-in Inhmelhriattirna hun hmangin Nl. R. Lalrinpuii, Superintendent hnen atangin Hostel dan leh hrai (Hostel Rules) te ngaihthlak a ni. Rev. B. Sangthanga, Executive Secretary in thusawina hun a hmang leh a, a duh apiang tan thusawina hun hawn a ni bawk.

Kumin 2019 hian puanthui zir tur mi 40 lak an ni a, puan tah zir tur mi 6 lak an ni bawk. Women Centre hi kum 2015 khan Cheng nuai zanga chuanga sak zawh a ni a, kum 2016 July thla atangin puanthui zirna hi kalpui tan a ni a. A tirah chuan thla ruk (6) course a ni a, tha zawka hriatna avangin kum 2018 atang khan kum khat course a lo ni ta a ni. Tum khatah mi 40 zel zirlai lak thin an ni.

Women Centre hi hlawk zawka hman tangkai tum zel a nih angin kum 2017 July thla atangin Puan tah zirna kalpui belh leh a ni a. Zirlai hi tum khatah mi 10 lak tur anih laiin mi 6/7 vel chauh zirlai hmuh thin a ni. Hemi kawngah hian puan tah thiam a pawimawh zia leh tulzia kan hriat thar a pawimawh tak zet a ni.