WOMEN CENTRE-A PUANTHUI ZIR TUR (2ND BATCH) TE PATHIAN HNENAH HLAN

Vawiin (Jan. 11, 2017) chawhnu dar 1:00 khan Women Centre-a puanthui zir Second Batch-te Pathian hnena hlanna hun hman a ni.

Programme hi Women Centre, Phunchawngah neih a ni a, Pi Rinchawii, Central Kohhran Hmeichhe Chairman-in kaihruaiin Ni Lalrinpuii, Superintendent-in Report tawi a pe a. Rev. P.C. Pachhunga, Executive Secretary i/c Kohhran Hmeichhia-in fuihna thuchah a sawi a, Pastor Vanroluaha’n Pathian hnena hlanna hun a hmang. A duh apiang tan thusawina hun hawn a ni bawk.

Women Centre-a puan thui zir hi nikum (2016) khan First Batch tan a ni a, mi 37 ten thiam taka zirin December 16, 2016 khan an lo chhuak tawh a. Tun tum Second Batch-te hi nimin (Jan. 10, 2017) khan an lut leh a, a zir hun chhung hi thla 6 zel tur a ni. Hostel-a awm chilh tur a ni a, thla tin mess fee Rs. 1500/- atangin zirlaite’n Rs. 500/- an tum a, a bak zawng chu Central Committee-in an tumsak a ni.