ZOSAP TU LEH FA TEN SYNOD OFFICE AN TLAWH

PC Wales atanga lo kal Rev. Aneurin Owen leh Dr. Owain Edwards ten nimin (May 15, 2018) khan Synod Office Devotion an hmanpui. Rev. Aneurin Owen (Zolawma) hi Rev. Owen William Owen (Pu Awna), Kristian Thalai Pawl dintu fapa a ni a. Amah hi PC Wales leh Mizoram Synod kan inthlunzawmna pawimawh tak a ni ta ber. 2014-a Mizoram Synod Choir Wales-a an zinna (Llangollen International Musical Eisteddfod) te kha Zolawma leh a thianpa Eilir Owen Griffiths hmalakna vek a ni.

2016 KTP Gen. Conference-ah khan Welsh zaipawl, khawvel puma lar tham CF1 Choir a rawn hruai bawk a. CF1 Choir kha BBC-in “Choir of The Year 2014”-a a puan hial an ni nghe nghe. Zolawma hi social works lamah a inhmang nasa hle a, HIV/AIDS dona lamah nasa takin hma a la bawk. Kan Synod hospital tihchangtlunna turah pawh sum leh pai leh tha a thawh tam hle. Kan hospital-in HIV/AIDS enna CD4 Count khawl kan neih theihna pawh ama hmalakna a ni.

A thianpa, Dr. Owain Edwards hi kan Missionary tho, Rev. David Edwards-a tupa a ni a. Rev. David Edwards te khan fapa 2 an nei a, an fapa Royce-a chu “Zorema” tiin a Mizo hming an phuah a. Chuvangin Rev. Edwards kha *Zorema Pa* tia hriat lar a ni. YLA dintu zinga mi a ni a, Treasurer hmasa ber a ni bawk. Zorema hian kan Missionary Rev. Samuel Davies-a fanu Zosiami chu nupuiah a nei a. Fapa 2 an nei a, an fapa pakhat zawk Hywel Rhys chu Pastor a ni a. 2016 November thla khan a nupui Julie Edwards nen an rawn zin nghe nghe.

An fapa pakhat zawk chu tuna lo kal Dr. Owain Edwards hi a ni a. Zolawma nen hian PC Wales tirhin India Hmarchhaka Mission Hospital-te Maternity (nau neihna) lama tihhmasawn dan tur thlithlaia lo kal an ni a. Synod Hospital leh John Williams hospital bakah Shillong leh Jowai-a Mission hospital dangte an rawn bitum. May 13 (Pathianni) chawhmaah Dawrpui Kohhran Biak Inah an inkhawm a, zanah Mission Veng Biak Inah an inkhawm.

Zolawma hi social works lamah a inhman nasat avang leh a thianpa Dr. Edwards-a hi YLA dintu hmasa tupa a nih hrerengin Central YMA chuan nizan khan an pualin programme a buatsaihsak nghe nghe a ni.