Rev. C. Chanchinmawia (Pensioner) kum 72 chu nimin (March 12, 2018) dar 2:05 a.m. khan kal thalo avangin a thi a, dar 1:30 p.m. khan Ramhlun North Kohhran Biak In-ah Synod Moderator Rev. F. Lalrinnunga’n a vui.
Vuina inkhawmah hian Rev. R. Vanlalnghaka, Synod Secretary (Jr.) in a chanchin tawi a sawi a, Rev. F. Lalrinnunga, Synod Moderator in thlamuanna thuchah sawiin Rev. Lalramliana Pachuau, Senior Executive Secretary in tawngtaisakna hun a hmang. Ramhlun North Kohhran Zaipawl leh Ramhlun North Bial Zaipawl an zai a, Rev. P.C. Pachhunga, Executive Secretary in malsawmnain vuina inkhawm a khar a ni. Thlanmual lamah Bialtu Pastor, Rev. Zothansangan hun a hmang thung a ni.
Rev. C. Chanchinmawia chanchin tlangpui : Rev. C. Chanchinmawia hi March 5, 1947-ah Sentlâng khuaah a piang a, a pa chu C. Thanga a ni a, a nu chu Zamawii a ni, Unau pakua an ni a, ani hi a upa ber dawttu a ni. Kum 1977-ah B. Malsawmi nên inneiin fapa pakhat an nei. Primary leh Middle School chu an khua Sentlângah a lût a. Ram buai kum 1966 khân jail-ah tângin kum khat a tân hnuah kum 22 mi niin St. John’s High School, Kolasib-ah pawl sarih a zir zawm tha leh a, Matric a pass hnuah Pachhunga University College-ah PUC a zir chhunzawm nghâl a. PUC hi zir zo lovin 1973-1977 chhung Aizawl Theological College-ah a zir a. Kum 1965 Good Friday lai vela harh tharna a chan atangin Pathian thu hrilin a kal chhuak thin a, B.Th a zir zawh hnuah pawh hian hmun hrang hrangah rawngbâwlin a vâk kual thin. Serampore College-ah B.D zir zawm lehin 1980-ah tha takin a zo leh a ni.
B.D. a zawh hnu pawh hian rawngbawlin Mizoram hmun hrang hrangah a vâk chhuak thin a. Hetia a hun eng emaw chen a hman hnu hian kum 1982-ah Fundamental Baptist Kohhran an din ta a, a din chhuaktu ber a nih avângin Moderator (Chairman) leh Executive Secretary-ah kum 11 chhûng lai a awm a ni. Kum 1992-ah Mizoram Synod nen indâwrin Special Assembly te neiin Presbyterian Church of India, Mizoram Synod nêna inremna siam chu an titlu ta a. January 14, 1993-ah Presbyterian Kohhranah an rawn lût ta a ni. Rev. C. Chanchinmawia hi thuhril mi niin mi hneh theihna riau nei a ni a. Chu bâkah lehkha ziak mi a niin lehkhabu pawh 50 chuang a ziak a ni.
Rawngbawlna : Presbyterian Kohhrana a luh hnu hian Synod Office-ah kum hnih (1994-1995) chhûng Co-Ordinator-in a awm a. Kum 1995 Synod-in Pro. Pastor atân ruatin Saitual Bialah kum 1996 chhûng a thawk a, 1996 Synod-in Pastor atân a nemnghet a, Ruantlang Pastor Bial vawngin 1997-2002 chhûng a awm a. 2003-2007 chhûng Bawngkâwn Pastor Bial vawng lehin, kum 2008-ah pension-in a chhuak ta a ni. Synod hnuaia rawng a bàwl chhûng hian Bial Inkhâwmpuiah tum 4 Chairman-ah a tang tawh a. Presbytery Moderator-ah term 2 a tang bawk a. Synod Board/Committee-ah hengah te hian a tang ve hman bawk :
Synod Nomination Committee-ah term - 1
Synod Pastoral Committee-ah term - 1
Synod Executive Committee-ah term - 1
Synod Social Front Committee-ah term - 2
Synod Revival Committee-ah term - 1
Synod Information & Publicity-ah term - 1
BSI Aizawl ‘N’ II Branch-ah President term 2 a chelh a, a rawngbàwlna hmun apiangah BSI lamah dinhmun pawimawh tak a chelh thin. Pastoral Counselling Training nei a ni a, Counsellor hnaah pawh mi tui tak a ni.
Rawngbawlna dang : Kum 2008 January 11 zàn khàn Pastor Quarters chhuahsanin Pension-in a kal ta a. Hemi zàn hian Zarkawt Kohhranah thu a sawi a, a thusawi zo chu an haw kawngah a pangkhing vei lampang a zeng ta thut a; kal thei loin a bawksawp ta a. Pension-a chhuah zànah Durtlâng Presbyterian Hospital-ah admit a ni a, January 14, 2008 Dâr 1:5 p.m-ah tawngtaina a dawng a, chu tawngtaina hla chu - “Sual phuara awmte’n a phelh kan nghâk reng a ni, Lalpa tidam mai rawh,” tia tawngtaisakna aw chuan a thinlung a luah a, “Lal Isua hmingin kein ka kal ang e,” a ti a, a kal ta mai a! Lalpan a tidam ta a ni. Lalpan a tihdam chhan - sual phuara awmte Isua hminga phelh hna chu chak lo takin a la thawk ta zêl a. A pension hnuah pawh Camping, Crusade, Campaign leh Retreat-ah te a inhmang a. Bial Hmeichhe Inkhâwmpui leh KTP Conference-ah te hun a hmang zêl a ni. Zunthlum leh thisen sâng natna nei chungin sual phuara awm phelh hna chu Lalpan a thawhtîr ta zêl a, Camping, campaign leh crusade-ah te speaker niin thahnemngai takin rawng a bawl chhunzawm zel a ni.
Zunthlum natnain a tihbuai avâng hian kum 2012 khân Vellore-ah te inenkawlin in lamah pawh home dialysis khâwl nên tangin hun rei tak a inenkawl a. Chumi hnuah Amri Hospital Kolkata-ah an kal leh a, chuta tang chuan damdawi in lamah dialysis lain a inenkawl chhunzawm ta zel a ni. A natna lo zual zêlin, a taksa a chak loh chhoh hlê hnu-ah pawh a thawh kân peih phawt chuan rawngbawla kohna chhângin a theih ang angin a la chhuak hrâm hrâm thin a. Kum 2016 phei kha chuan Pathian hnêna châwl tawh mai tûrin a inngai hman hial a ni. February 11, 2018 Pathianni chawhmaa Ramhlun North Biak Ina Bial Kohhran Hmeichhe Inkhawmpui a chhim kha a inkhâwm hnuhnung a ni ta a ni.
A hun hnuhnung : March 7, 2018 (Nilaini) zanriah ei kham atangin a irfiak a, zanlaiah a luak bawk a. Zîng dâr 4:30 vêlah Synod Hospital-ah kalpuiin damdawi te an lo pe a, a ziaawm leh mai avângin an haw leh mai a. A tûk March 8, 2018-a dialysis tia an luh chhoh leh chuan a taksa a chauh êm avângin an ti tha thei lo va, zan dâr 11-a a muhîl chu a harh theih tâk loh avângin March 9, 2018-ah ICU-ah dah luh a ni a. March 12, 2018 zing dâr 2:05-ah Lalpa hnênah a châwl ta a ni.