Nl. Lalthanzuali, Evangelist chu August 30, 2018 zîng dâr 7:30 khân Cancer avangin Synod Hospital, Durtlangah a boral a, hemi hian Rev. K. Lalrinmawia, Secretary, Synod Mission Board chuan Bethlehem Venga a u, Pu J. Lalthlamuana inah a vui a ni.
Nl. Lalthanzuali hi Sept. 24, 1966 khân Champhai Project Vengah a piang a. Pu Duhvea (L) leh Pi Kapzawni (L) te fa pariat zînga parukna a ni a. Thiamna lamah B.A. a ni a. B.A. a zawh hnu hian Electric Department-ah rei lo tê a thawk a. Kum 1991 khân a hna a bansan a, a pa thawhna - St. Peter English Medium School, Madhuripathar-ah missionary hna a thawk ta zâwk a ni. Madhuripathar hmuna a thawh lai hian a thawhpui - Tv. Vanlalchullova Pachuau, Nl. Laldawngliani Zote leh Mizoram atanga anmahni tlawhtu tlangval pahnihte nên Monigaon, Arunachal Pradesh-ah rawngbâwlin an feh chhuak a,he khua leh a chhehvêl atangin mi 57 laiin Lal Isua ringin, Upa Tomsen Khandu kutah baptisma an chang hlawm a. Chu chu duh lovin, ringlo hovin Police hnênah an hêk a. Monigaon Jail-ah hian hun eng emaw chen an táng a. Hetih hun laia Arunachal & Assam Mission Field Secretary, Rev. K. Lalthangmawia hma lâkna azârah rei erawh an táng ta lo a ni.
Missionary hna a thawh chhung hian Field hrang hrangah a awm a, January 2018 atanga a thih ni thlengin Masihi Sangati Kendra Office, Bawngkawnah a awm ta a ni. May 2018 atang khân chaw a ei thei lo tan a. July 19, 2018 khân a khawsik avângin Synod Hospital, Durtlangah a inentîr a; an lo admit nghâl a. Hetah hian investigation te tiin, a natna hi Chuap leh ruh Cancer a ni tih hriat chhuah a ni a. Damdawi In atanga chhuak tawh lovin enkawl chhunzawm nghâl a ni a. A natna hi a lo nasa tawh viau mai a; tin, a BP a mumal lo bawk nên, chemo pawh khaisak a ni ta lo a ni. A natna hi lo zual zêlin, August ni 30, 2018 zîng dâr 7:30 khân Chatuan ram min pansan ta a ni. Hemi ni vêk hian Rev. K. Lalrinmawia, Secretary, Synod Mission Board chuan Bethlehem Venga a u, Pu J. Lalthlamuana inah a vui a ni.
Nl. Lalthanzuali hi Synod Lay Workers Fellowship chuan Sept. 7, 2018 (Zirtawpni) hian Bethlehem-ah ralna hun an hmang dawn a ni.