Nimin (June 20, 2019) chawhnu dar 1 khan Synod Moderator Rev. R. Lalhmingthanga’n Synod Hospital Auditorium-ah College of Nursing, Synod Hospital a hawng.
Hawnna inkhawm hi Dr. L.H. Thanga Singson, Synod Hospital Director-in a kaihruai a, Pi C. Lalrintluangi, Principal-in report a pe. Synod Moderator Rev. R. Lalhmingthanga’n Nursing College hawnna neiin thuchah a sawi nghal a, Rev. B. Sangthanga, Executive Secretary i/c Hospital-in tawngtainain college a hlan a. Mizoram Synod Choir te an zai zawhah Upa F. Lalsangliana, Synod Hospital Coordinator-in lawmthu sawina hun a hmang a, Rev. R. Vanlalnghaka, Synod Secretary-in malsawmnain inkhawm a khar a ni.
Synod Hospital (Welsh Mission Hospital) hi kum 1928 khan Zosap Missionary Dr. John Williams ten an din a ni a, kum 1944 khan Indian Nursing Council, New Delhi in recognition a pe a, India ram hmarchhakah Nurse puitling (GNM) zirna school hmasa ber pawl leh recognise hmasak ber pawl niin, Mizoram bikah phei chuan kum tam tak chhung Nurse zirna awm chhun a ni.
Synod Nursing School hi a dintirh atangin Assam Nursing Council hnuaiah kum 1990 thleng a awm a, kum 1991 atang khan Mizoram Nursing Council chu Assam Nursing Council atanga a lo indan khan Mizoram Nursing Council hnuaiah an lo awm ve ta a ni.
Ministry of Health, Govt. of India-in Indian Nursing Council kalphung tur hrang hrang a sawina Circular-ah kum 2020-2021 atang chuan India ram pumah GNM zirna tihtawp tur a nih thu a chhuak tak avangin kum 2017 Synod Inkhawmpui chuan Nursing School leh College chu kalkawp lovin School chu College-ah Upgrade turin a rel ta a ni. College-a hlankai a nih theihna tura paltlang ngai hrang hrangte tluang taka paltlangin, August 1, 2019 atanga class tan tura ruahman a lo ni ta a ni.
Kumin hian B.Sc (Nursing) zir tur Batch hmasa ber mi 30 lak an ni dawn a, seat hnih hi EDG-BPL tan reserve tur a ni a, Indian Nursing Council (INC) Guidelines angin 10+2 Science (PBC) 45% chian tan dil theih a ni ang. Zir duhte chuan Synod Hospital, Durtlangah Prospectus lak theih a ni a, July 6, 2019 tlai dar 4 thleng dilna hi thehluh theih a ni ang.