Rev. John Sharma (kum 55) chu Cancer avangin November 15, 2020 tlai dar 4:45 khan Synod Hospital, Durtlangah a thi a, vawiin (Nov. 16, 2020) khan Rev. F. Lalrinnunga, Ex-Moderator, Mizoram Synod in Zotlang Kohhran Hall, Aizawlah a vui.
A chanchin tlangpui :
Rev. John Sharma hi January 6, 1965-ah East Lumding, Nowgong, Assam-ah a piang a. A pa chu Bed Prasad Sharma a ni. Hindu chhungkua a pianga seilian a ni a, mahse Lal Isua hnung zui tura a in pek takah chuan a chhungte hian an tuithlar ta a ni. Baptisma a chanin a hming hi a ma duh ang ngeiin John Sharma tih a lo pu ta a ni. December 10, 1985-ah Anjali Sharma nen Zotlang Kohhran Biak Inah an innei a, fanu pahnih an nei a, tunah hian an fate hian pasal nei tawhin tu pahnih an nei a ni.
Mizoram Synod hotute Manipur Synod-a han palai te nen in hmu fuhin, an thurawn angin Mizoramah a lo chuang chhuak a. Pathian thu (G.Th.) te zirin Pastor atan buatsaih chhoh a ni ta a ni.
Kum 1989 Synod Inkhawmpui-in Pro. Pastor atan a la a, kum 1990 - 1991 chhung khan Siliguri Pastor Bialah Pro. Pastor hna a thawk a. Kum 1992 chhung khan Bawngkawn-ah Pro. pastor hna thawk chungin Hindi Bible School-ah Zirtirtu hna a thawk bawk a ni. Kum 1992 Synod Inkhawmpuiah Pastor atan nemngheh niin kum 1993 January atanga May 1997 chhung khan Siliguri-ah Pastor hna a thawk a. Kum 1997 June thla atanga April 2000 thleng B.Th. a zir a, May 2000 atanga 2003 chhung khan Hatiadanga, Siliguri Field-ah Pastor hna a thawk leh a. June 2005 atanga April 2007 chhung khan Aizawl Theological College-ah B.D. a zir leh a, May 2007 atanga December 2008 chhung khan Mizoramah Masihi Sangati Pastor hna thawkin Lungleiah a awm leh a ni. January 2009 atanga December 2015 chhung Hindi Bible School, Bawngkawnah Principal hna a chelh leh a. January 2016 atanga December 2019 chhung Dharan Bial, Nepal-ah Pastor hna thawk turin Synod-in a dah leh a. Tichuan, January 2020 atanga a hun tawp thleng Masihi Sangati Kendra, Bawngkawnah a thawk ta a ni.
A nat dan : Rev. John Sharma hi Nepal-a a awm lai kum 2018 khan Cancer a ni tih hriat chhuah a ni a. CMC Vellore-ah enkawl niin Doctor ten theih tawpin an enkawl a, mahse that lam a pan lutuk thei lova. Amah hian Mizorama Kohhranho te tawngtaina a thlahlel hle thin a, chuvangin November 8, 2019-ah Mizoramah a rawn haw ta a ni. Mizoram a rawn haw hma hian a Bial enkawl, Dharan a tlawh bawk. A beisei leh a thlakhlelh ang ngeiin Pathianin vawiin thlengin a Kohhranho te tawngtaina avangin a nun pawh a pawh sei sak ta a ni. A hun tawp lamah hian Synod Hospital, Durtlangah Doctor leh Nurse ten theihtawp chhuaha an enkawl chungin November 15, 2020 tlai dar 4:45 khan a rawngbawl sak Lalpa hnenah a chawl ta a ni.
Vuina Programme
A hmun : Zotlang Kohhran Hall, Aizawl
A hun : November 16, 2020 (Thawhtanni), Chhun dar 12:00
Vuitu : Rev. F. Lalrinnunga, Ex-Moderator, Mizoram Synod
Chanchin sawi : Upa Lalrinmuana, Secretary (Jr.), Mizoram Synod
Tawngtai sakna : Rev. Lianhmingthanga Sailo, Senior Executive Secretary, Mizoram Synod
Malsawmna : Rev. J. Lalremsiama, Statistician, Mizoram Synod
Thlanmual : Rev. Lalzidinga i/c Himali Bial