Rev. V. Lawmkima (pensioner), kum 70 chu vawiin (Apr. 21, 2021) 10:05 a.m. khan All is Well Hospital, Burhanpur, Madhya Pradesh-ah a thi a, TBZ Mission Compound, Kanapur, Madhya Pradesh-ah vawiin vek khan vuiliam a ni.
Pian leh mûrna
Rev. V. Lâwmkima hi V. Lianrûma leh Lalhnuaii te fa 4-na niin February 1, 1951 khan Ngopa-ah a lo piang a, pianpui unau panga neiin Ngopa-ah hian a seilian a ni.
Kum 1987 khân Teikhang Bial, Mimbunga Pro. Pastor-a a awm laiin K. Lalrinpuii, Upa K. Thannghinga leh Dârthanmawii, Venghlui te fanu upa ber nên inneiin fapa 2 leh fanu 2 - Lalhruaitluanga, Peter Lianhmingthanga, Vanlalruati, Grace Laldinsângi te an nei.
Matric a pass hnu kum 1975 khân DC Election hnuaiah Enumerator hna thla 4 a thawk a, hemi kum vêk hian Local Administrative Office-ah District leh Directorate-ah LDC officiating-in a thawk leh a, kum 1976 January thla tâwp lam atangin Directorate of Supply & Transport Office-ah Account Assistant-in 1983 thleng a thawk leh a ni.
Zirna lam
Primary atanga High School thlengin Ngopa-ah a zir a. Ram buai vângin School kal zawm lovin 1968-1969 chu ram hnâ a thawk zui a, kum 1970 khân Ngopa khuaah Private High School, rambuai vânga khâr tawh chu thar thawh lehin Class VII hawn lehah chuan zirna a chhunzawm leh ta a ni.
Kum 1974 khân Ngopa High School atangin HSLC (Matric) chu exam-in 2nd Division-ah a pass a. Hemi kum vêk 1974 hian Pachhunga University College-ah PU a zir chhunzawm a, kum khat hnuah hnathawk paha zir a ngaih avângin evening shift-ah insawnin 1978-ah B.A. a zo ta a ni.
Rawngbâwlna lam
Rev. V. Lawmkima hi tleirawl tê anih atangin Naupang Sunday School, KTP leh Kohhran rawngbawlna ngai pawimawh tak a ni a, chanvo pawimawh tak tak a lo chelh tawh thin a ni. Hun puma rawngbawl châkna neiin kum 1983-1986-khan Bishops’ College, Calcutta-ah B.D zirin tha takin a zo a, Kum 1986 Synod chuan Pro. Pastor atân a la ta a ni.
Pastor/Minister hna a thawh chhunga a rawngbawl tawhna te chu :
1. Kum 1987-1989 - Pro Pastor, Mimbung, Teikhang Bial
2. Kum 1990-1996 - Pastor, Tuipuibari Bial
3. Kum 1997-2003 - Pastor, Sialsuk Bial
4. Kum 2004-2008 - Chaplain, Synod Hospital, Durtlang
5. Kum 2009-2011 - Principal, Presbyterian Bible School
Kum 2012, January 1 atang khan pension-in a chhuak ta a ni. Pro. Pastor leh Pastor a nih chhûngin Bial Chairman vawi 7, Presbytery Moderator vawi 2 a tang hman a, Synod Executive Committee term 3, Pastoral Committee term 2, Synod Mission Board kum 2, Education Board term 1, Prescom Board term 1 a tang hman a ni. A rawngbawl chhung hian nupa tuak 115 inneihtîrin, mi 1568 baptisma a chantîr bawk.
Rev. V. Lawmkima hian a pension hnu pawhin awl nei hman miah lovin rawngbawlna a chhunzawm zel a, Kum 2012-ah PBS-ah rawihzui leh a ni.
Rev. V. Lawmkima hi a awmna apianga theih tâwpa khawtlâng tana inhmang thîn a ni a. Kum 1975 khân Ngopa atangin an chhûngkuain Venghlui, Aizawlah an pêm a. YMA leh VDP lamah te inhmangin hruaitu mawhphurhna hrang hrang a lo chelh tawh a; mize zawi, tawng tam vak lo, hun vawn dik tum tlat mi a ni a, a thupui pakhat chu, “A theih phawt chuan nangmahni lam tal mi zawng zawng nên inremin awm rawh u,” (Rom 12:18) tih hi a ni. Kohhran thiltih leh a hna ngai pawimawh mi niin, an chhangchhiat vânglai pawhin bial fan thulh phah nân chhûngkua a chhuanlam ngai lo. Hotute rorêl a sawisel ngai lo va, Inkhâwmpuiin a dahna apiangah tangkai taka thawh tum mi a ni a, lâwm takin a kal thîn a ni.
A hun hnuhnung
Rev. V. Lawmkima hi mi hrisel tak a ni thin a, damlohna em em a nei ngai lo. Kum 2013-ah 3rd IR Batallion (Mangaldai) Assam-ah Chaplain-in a awm a, June 2018 atangin TBZ Mission, Jharkhand-ah Field Director-in a awm leh a. Corona virus hri leng avangin Mizoram-ah a lo haw a, ni 9.12.2020-ah a thawhna hmun Jamshedpur-ah Field Director hna chhunzawm turin a chhuk leh a, ni 27.01.2021-ah Madhya Pradesh-ah Field Director turin sawn a ni leh a. Ni 25.02.2021-ah a awmna tur Khandwa chu thlengin rawngbawlna tura tul leh pawimawh te a chhunzawm nghal a, hetih mek lai hian insawisel tanin ni 3.04.2021 khan Doctor hnenah a inentir a, Covid-19 a positive tih hmuhchhuah a ni a. Ni 8.04.2021-ah Khandwa-a Civil Hospital-ah admit nghal a ni a, hma a sawn theih loh avangin Damdawi In tha zawk All is Well Hospital, Burhanpur, M.P.-ah ni 12.04.2021-ah sawn leh a ni a, MICU-ah dah nghal a ni. Hma a sawn ve hret hret ni a hriat a nih laiin, nizan (20.04.2021) zan dar 8-ah chuan Ventilator hman a ngai ta a. Doctor leh Nurse-te’n theihtawpa a nunna chhan an tum laiin, vawiin (21.04.2021) Nilaini zing dar 10:05 AM khan a rawng a lo bawl thin Lalpa hnenah min kalsan ta a ni.
VUINA PROGRAMME
Thih ni : Ni 21.4.2021 (10:05 AM)
Thihna hmun : All is well Hospital, Burhanpur, M.P.
Vui ni : Ni 21 April, 2021 (Nilaini)
Vuina hmun : TBZ Mission Compound, Kanapur, M.P.
Vuitu : Pu K. Lalrotluanga
TBZ Missionary, Burhanpur, M.P.
Chanchin sawi :
Chhungkaw aiawh thusawi :
Tawngtaisakna :
Malsawmna :