Pian leh mûrna :
Rev. Vanlalngeiha hi Nov. 10, 1986 khan Synod Hospital, Durtlangah a piang a, Mission Vengah a seilian a ni. A pa P.C. Lalthantluanga (L), a nu Pi Sangthankungi a ni. Pianpui unau pahnihte chu Vanlaldawma (L) leh Lalnunthari W/o V. Lalremruata, Dinthar, Aizawl te an ni a; a pa leh a u ten an thihsan tawh bakah a nauin pasal a neih bawk avangin an nu fa hian Mission Venga an inpui luah lumtu ber an ni.
Zirna lam:
Kum 1991-ah English Congregation, Mission Vengah lutin zirna bul a tan a, kum 1994 atangin Gospel Centenary School, Mission Vengah a kal leh a. Kum 2003 khan Synod Higher Secondary School atangin HSLC a zo va, kum 2005 khan Pawl 12 (HSSLC) chu Oikos Higher Secondary School atangin a zir chhuak leh a ni. Pachhunga University College-ah B.Sc. zirin 2008 khan tha takin a zo a, MZU-a M.Sc. a zir lai hian Pathian thu zir dilin lak a ni a, M.Sc. chu a zir chhunzawm ta lo. Tichuan, kum 2010 atangin ATC-ah B.D. a zir a, kum 2014 khan tha takin a zo a ni.
Rawngbawlna:
Kum 2014 Synod Inkhawmpuiin Pro Pastor hna thawk turin a la a. Kum hnih 2015 leh 2016 Tuithumhnar Bialah dah a ni a, P/P kum 3-na (2017) chu Armed Veng Bialah a awm a ni. Tichuan kum 2017 Synod Inkhawmpui, Bungkawn Kohhran Biak Ina neih tumah khan Rev. F. Lalrinnunga, Synod Moderator-in Pastor atan a nemnghet a; Siliguri Mission Field-a Jaigaon Pastor Bial thara awm turin Synod chuan a ruat bawk a. January-June 2018 (thla ruk) chauh a awm hman tihin Presbyterian Bible School, Mission Vengah zirtirtu atan a dah leh a; hetah hian 2019 December thleng awmin hemi kuma Mission Veng Kohhrana Synod Inkhawmpui chuan Jharkhan Mission Field-a Jaruwadih Pastor Bial vawng turin a ruat leh a. January ni 12, 2020-ah Rev. K. Lalzarzova, Dumka Bialtu Pastor-in dahnghehna (Induction) neiin a hun tawp thlengin hetah hian a awm a ni. A tul chuan ringtharte bakah an ran damlote pawh a tawngtaisak mai zel a. Pastor hna a thawh chhungin Nupa tuak ___ a inneihtir a, mi __ Baptisma a chantir hman bawk.
A mizia leh thil dang:
Rev. Vanlalngeiha hi a naupan lai atanga Pathian tih leh tawngtai mi tak mai a ni a. A zirpuiten amah an hriat dan ber pawh “College a thlen leh a haw dawn apianga tawngtai thin kha” an ti thin. Evangelical Union-ah te in hmangin thahnem a ngai em em thin a. Mi tlawmngai thei tak leh inngaitlawm tak a ni a, a zirpuite leh a rawngbawlpuiten an ngaina viau zel a ni. A remchan chuan hna thawka inhlawhin mahni intodelh tum tlat a ni a, a thil neih mi dangte tan a ui ngai lo va, mi dangte tana tha tur a nih dawn phawt chuan eng pawh tih a huam zel thin. Khawtlang tana theihtawp chhuah thin a nih avangin YMA Mission Veng Branch chuan kum 2006 khan Tlawmngai Nopui an hlan a ni.
Aizawl Theological College-a BD a zir lai hian Magazine Editorial Board Member leh Mess lam hotuah te a awm thin a; ATC Chaplain pui turin Students’ Chaplain-a ruat hmasak ber a ni a, zirlai tlawmngai ber hnena an pek thin Upa R. Zobela Award an hlan bakah Sermon leh Inkhawm hruai thiam ber Best Homiletician-ah thlan a ni bawk. Tin, Saptawng a thiam hle a, a zirpuite pawhin an rawn fo thin. Hmun dang atanga hnam dang lo kalte a kawm nel thiam em em a, anmahni titlangnel bertu pakhat a ni thin. A zirnaah pawh hian a titha pawl tak ni zelin zirlai titha ten kum tin lawmman an dawn Proficiency Award pawh a dawng nual a ni.
Pastor rawngbawl hna a luhchilh hnuah pawh hian a theihna zawng zawnga thawk thin a ni a, a rawngbawlpuite leh hnam dang ring lo mite pawhin an nelin an ngaina hle thin. A tul angin ring tharte bakah an ran te pawh a tawngtaisak zel mai a ni. Rawngbawltu duhawm tak kan thlah a lo tul ta.
A hun hnuhnung :
Rev. Vanlalngeiha hi infiamna lamte pawh ngaina tak, mi hrisel tak leh insawiselna pawh nei ngai lo a ni. Kumin 2021 March thla vel atang khan a khuh deuh thin avângin Covid-19 a kai leh kai loh a in endik (test)-tîrin April 8, 2021-a result lo chhuakah a negative avangin ngaihthat lohna lutuk a nei lo va. April 12, 2021-ah pawh Inneihtirin hun a la hmang a; a Inneihtir zo chu amah a nawm loh deuh avângin a inah a rawngbawlpuiten an ngaihven a, ani chuan Damdawi In lam pan lo va in lama inenkawl zui mai a duh a. Mahse, a dinhmun enin hmunpui lam panpui tha an ti a.
April 16, 2021 (Zirtawpni) tlaiah a rawngbawlpuiten Ambulance-in Kolkata an pan pui a. BNI Hospital-ah an luhpui phawt a, a tuk April 17, 2021 zan dar 9:00 vêlah damdawi in lian zâwk Medica Superspecialty Hospital -ah an sawn leh a. Hetih lai hian harsa ti tak chungin a la tawng peih a. Investigation tul apiang tiin Covid-19 positive a ni tih hriat chhuah a ni a, a chuap nasa takin a lo khawih chhe tawh tih hriat a ni bawk. Covid Pneumonia enkawlna a tha thei ang ber pein ni 24.4.2021 atangin Ventilator a hmang a, ni 25.4.2021-ah ECMO khawl hmangin hun rei tak enkawl a ni a; May 31-ah Covid-19 chu a negative tawh a, mahse a taksa peng hrang hrangin hna an thawh mumal tawh loh avangin hma a sawn thei lo va, Doctor leh Nurse ten theihtawpa an enkawl chungin June ni 20, 2021 (Pathianni) chawhma dar 11:20 khan chatuana chawl turin min kalsan ta a ni.
VUINA PROGRAMME
Thih ni : Ni 20.6.2021 (Pathianni) Dar 11:20 AM
Thihna hmun : Medica Superspecialty Hospital, Kolkata
Vui ni : Ni 22 June, 2021 (Thawhlehni) 1:00PM
Vuina hmun : Mission Veng Kohhran Biak In
Vuitu : Rev. Dr. C. Lalhlira, Moderator, Mizoram Synod
Chanchin sawi : Upa Lalrinmuana, Secretary (Sr.), Mizoram Synod
Thlamuanna thuchah : Rev. Dr. C. Lalhlira, Moderator, Mizoram Synod
Tawngtaisakna : Rev. K. Lalrinmawia, Exe. Secy., Mizoram Synod
Malsawmna : Rev. B. Sangthanga, Exe. Secretary & Finance Officer, Mizoram Synod
Thlanmual : Rev. Vanlalmuanpuia Khiangte, Bialtu Pastor, Mission Veng Bial