Rev. R. Thangvunga (kum 79), Pensioner chu nimin (July 14, 2021) zing dar 5:00 khan Thisen Cancer avangin a thi a, nimin vek khan Durtlang Kohhran Biak Inah Rev. Dr. C. Lalhlira, Moderator, Mizoram Synod-in a vui.
Rev. R Thangvunga hi April 11, 1942 khan Tlângnuam, Thingsûlthliahah a piang a, Pu Rova Ralte (L) leh Pi Chawngkungi (L) te fa pali zinga a upa ber a ni. Thingsulthliahah hian Pathian thu a zir thleng hian a chêng a. Kum 1973, January 19 (Zirtawpni) khan Suangpuilâwn Biak Inah Lalfanzauvi d/o Thangruma Zote, Vânbâwng khua nên Pastor C. Lalrampâran a inneihtir a. Lalpan fanau a pêkte chu hêngte hi an ni:
1. Lalhmangaihzuala h/o Lalzarliani, Darlawn
2. Lalfakzuala h/o Vanlalhriatpuii, Durtlang Mual Veng
3. Lalhmingthanzuala (L)
4. Rev. R. Lalfakawma i/c Lawngtlai Bial h/o B. Lalsangzeli
5. Rebecca Lalrinzuali, (SMB Missionary Bomdila, Arunachal West Field)
6. R. Lalmalsâwma
Rev. R. Thangvunga hian zirna chu Tlângnuam Primary School-ah tanin pâwl thum a zo va, Govt. M.E. School, Dârlawngah kum 1958 khan pâwl ruk a zo leh a. Saitual High School atangin pâwl riat a pass bawk a ni.
Kum 1965 January-ah Aizawl Theological College sak thar luaha zir hmasa berte zîngah a tel a, kum 1965-1968 chhûng Diploma a zir. A zir lai hian ram buaiin a nang a, a hrehawmin a luhaithlâk châng a tam hle. Pathian vênna leh tanpuinain a zirlai chu kum 1968 khan zovin hemi kum vek hian Synod-ah Pro. Pastor atan lâk a ni.
Vânbâwng Bial ni thîn, tûna Suangpuilâwn Bial lo ni ta Suangpuilâwnah hian kum 1969-1972 chhûng khan Pro. Pastor-in a awm a, kum 1972-a Mission Vêng Kohhran Biak Ina Synod Inkhâwmpuiah Moderator Pastor Lalthangan a nemnghet a ni.
Bial hrang hranga a awm tawhna leh awm hun chhûng chu:
(1) Vânzau Bial - kum 10 (1973-1982)
(2) Dârlâwn Bial - kum 9 (1983-1991)
(3) Kâwnpui Bial - kum 7 (1992-1998)
(4) Bâktâwng Bial - kum 3 (1999-2001)
(5) Durtlâng Bial - kum 2 (2002-2003)
A rawngbawl chhûnga Bial, Presbytery leh Synod-a a chanvo chelhte chu hêngte hi a ni:
Bial Chairman ah tum 10 a tang a, chung Bialte chu
(1) Suangpuilâwn Pastor Bial - vawi khat
(2) Vânzau Pastor Bial - vawi khat
(3) Dârlâwn Pastor Bial - vawi li
(4) Kâwnpui Pastor Bial - vawi hnih
(5) Bâktâwng Pastor Bial - vawi khat
(6) Durtlâng Pastor Bial - vawi khat
Presbytery Moderator
(1) Tuichangral Presbytery
(2) Tuipuiral Presbytery
(3) Hmarphei Presbytery
(4) Sakawrhmuituai Presbytery
Synod Board/Committee: Kum 26 Synod Board/Committee hrang hrangah a thu
(1) Synod Executive Committee member-ah term li
(2) Pastoral Committee member-ah term hnih
(3) Press & Bookroom Committee member-ah term khat
(4) Literature & Publication Board Committee member-ah term khat
Kohhran pâwn lam
(1) Block Development Committee member (Darlawn)
(2) BSI, Dârlâwn Branch President term li
Rev. R. Thangvunga hian Nupa tuak 320 a inneihtîr a, mi 4,386 a baptist bawk.
Pro. Pastor-a a thawh nên kum 35 chhûng Pathian hruaina zêla rawngbâwlin kum 2003-a Khatla Kohhran Biak Ina Synod Inkhawmpui chuan January 2004-a pension tûrin mawi takin a thlah a. A pension hnu hian Durtlâng Kohhranah an chhungkuain an lawi ta a ni.
Rev. R. Thangvunga hi pa hrisel tak leh taima tak, kut themthiam tak a ni a. Kut hnathawh pawh hreh lova thawk bawrh bawrh thin mi a ni. A rawngbawlna kawngah pawh dik leh tha nia a hriat ah chuan huaisen taka ding thin a ni. Pa rilru tha tak, tu leh fate hmangaih em em a ni a, a thih thlengin chhungkuate tuam hlawma kuah khawmtu ber a ni.
Kum zabi thara Kohhran mipuite hnena a thuchah chu Rom 12:2(a)-in "Tunlai khawvel mite awm dan ang hi tawm suh u" a tih zawm tlat tur leh KHB 495 Chang 2-na "Rinawm leh fel taka awmin, Ni tin rawng i bawl tlat ang; A ropuina chang ve turin, Damchhung hian i bei zel ang" tih hla hi a taka sa thei tura inpek tih hi a ni.
A hun hnuhnung :
March 2021 thla tirah a thâl-ah bâwk a lo awm a, Civil Hospital, Aizawl leh Synod Hospital-ah te entir a ni a. March 30, 2021-ah a thal bawk chu zaiin biopsy lak niin a result a that avangin ngaihtha takin an awm a. Chumi hnuah a thâlah te, a beng bulah leh nghawngah bâwk a awm leh a, Civil Hospital-ah an hîp sak a, result pawh a tha niin an sawi. Mahse amah a chak lo telh telh a, khawsikin a tlakbuak reng bawk avangin Synod Hospital-ah June 28, 2021 khan dah luh a ni leh a, Thisen Cancer (Acute Leukemia with Blast Crisis) a nei tih hmuhchhuah a ni a. Damdawi In a luh atanga kar khatna July 5, 2021 khan ICU-ah dahin, that lam a pan hlei thei lo va, July 14, 2021 zing dar 5-ah chatuana chawl turin min kalsan ta a ni.
VUINA PROGRAMME
A hmun : Durtlang Kohhran Biak In
A hun : Ni 14.7.2021 (Nilaini) Dar 12:00 Noon
Vuitu : Rev. Dr. C. Lalhlira, Moderator, Mizoram Synod
Chanchin sawi : Upa Lalrinmuana, Secretary (Sr.), Mizoram Synod
Thlamuanna thuchah : Rev. Dr. C. Lalhlira, Moderator, Mizoram Synod
Tawngtaisakna : Rev. Lianhmingthanga Sailo, Sr. Executive Secretary Mizoram Synod
Hla (Rimawi hmanga rem tur) : ‘Isua hmangaihna leh thatna’ KHB 495
Malsawmna : Rev. Lalramliana Pachuau, Finance Officer, Mizoram Synod
Thlanmual : Rev. Lalremruata Ralte, Bialtu Pastor, Durtlang Bial