Rev. Lalbiaktluanga Pachuau (L.B Pachuau) kum 79, Pensioner chu vawiin (July 26, 2021) chawhnu dar 1:50 khan a thi a, naktuk (27.7.2021) chawhma dar 10:00-ah Ramhlun North Biak In mual Biak Inah Rev. Dr. C. Lalhlira, Moderator, Mizoram Synod-in a vui ang.
Rev. Lalbiaktluanga Pachuau (L.B Pachuau) hi Pu Chalthianga (L) leh Pi Thangziki (L) te fa pakaw zinga a pathumna ni a. October ni 5, 1937 ah Lailak khuaah a piang a. A pa hi Khawruhlian chhuak a ni a, a nu hi Saichal khaw chhuak a ni.
A pa hi zirtîrtu a nih avângin a naupan laiin an pêm kawi zîng hle a. Kum 1938 January-ah Saichalah an pêm a, kum 1941 September-ah Tlângnuam (Aizâwl)-ah an pêm leh a. Heta an awm lai hian Indopui II a thleng a. A pa hian Mission hna kum 1943, Japan tlâwm hma deuhvin a bânsan a, Khawruhlianah an pêm leh ta a ni.
Rev. Lalbiaktluanga hian kum 1944-ah sikul a kai tan a, 1948-ah pâwl thum a pass a. Chhûngkaw harsatna avângin a zir zawm mai thei lo va. Kum 1950-ah Dârlâwn MAV (Middle Anglo Vernicular) School a zawm leh a, kum 1953-ah Khawruhlian MAV School atangin pâwl ruk a pass ta a. Kum 1954-1958 chhûng Hmunnghâk leh Sâwlengah zirtîrtu hna (Assistant Teacher) a thawk a. Sâwlenga a thawh lai hian Rochhîngpuii, Sâwleng nên kum 1957 February 9-ah an innei a, fa pali (fapa pathum leh fanu pakhat) an nei, chungte chu -
1. James Lalhmingliana h/o Lalmalsawmi
2. John Lalsangliana (L)
3. Jonah Lalmalsawma h/o Laldikzuali
4. Joy Lalkrawspari h/o Hu Huth
Rev. Lalbiaktluanga Pachuau hi naupan lai atanga sakhaw mi, Sunday School zirtîrtu, a awmna apianga Kohhran bêla a phâk ang tâwk tâwka inhmangin thuhriltu dinhmunah te pawh dah a ni a. Kum 1951-a Dârlâwn Middle School-a pâwl li a zir tirhin Pathian hnênah inhlanin a rawngbâwl tûrin a inpe a. Tichuan, kum 1959-ah Pathian thu a zir a, a zir zawhah Pro. Pastor atân kum 1961 Synod Inkhâwmpui (Synod vawi 30-na), Mission Vênga neih chuan a la a. Vaitin Bialah Pastor Sêlkhûma kaihhruaina hnuaia awm tûrin a ruat nghâl a. Kum1963 Synod, Mission Vêngah Rev. Lalnghâkliana Pautu nên Moderator Rev. Sênan a nemnghet a, a awmna Bial vawng zui nghâl tûra ruat a ni a. Ratu Bial vawngtu Rev. Luka chu sipai Pastor tûra a kal avângin lo hmui tûra tih a ni bawk a, kum 1964 chhûng zawng hmuiin Kohhran 17 a enkawl a ni.
Kum 1964 Synod chuan sipai Pastor (Assam Regiment) tûrin a ruat a, kum 1965-1987 April thla thleng he rawngbâwlna hi a thawk a. Kum 23 chhûng zet sipai Pastor-ah a tang a ni. Sipai atanga a chawlh hnu hian Synod Department thar Social Front-ah kum 1987 June 22 atangin a thawk leh a. Rescue Home kum 1987 September-a hawn a nih khân Superintendent hna a chelh a, kum 1990 December thleng a thawk. Kum 1991-1996 chhûng Lengpui Bial vawntîr a ni leh a. Kum 1994 May - December chhûng Sairâng Bial a hmui tel bawk a ni.
Lêngpui Bial atang hian kum 1997 January thlaah voluntary-pension-in a kal a, Ramhlun North, Aizâwlah a khawsa zui ta a ni. Kum 1992 Tlawng Presbytery, Sairângah Moderator a ni a, sipaia kum tam tak a awm hnua he mawhphurhna a han chelh chu a tân chhinchhiah tlâk tak a ni. A chawlh hnuah hian ‘Fakna Thiltihtheihna’ tih lehkhabu a letling a. A rawngbâwl chhûng chanchin (sipai lama mi tel lovin) Mizorama a awm chhûngin mi 813 a baptis a, nupa tuak 88 a inneihtîr. Bial Chairman-ah vawi hnih tangin Presbytery Moderator-ah vawi khat a tang bawk.
A hun hnuhnung -
A nupui Pi Rochhingpuii hian kum 2017 April ni 3 khan a thih san a, chuta tang chuan chak lohna hrang hrangin a tlakbuak ve ta a. Kum 2017 kum tawp lam atangin kum tin Hospital-ah luh ziah a ngai a. Zunthlum leh BP sangin a tlakbuak reng avangin kum 2021 khan a kal (kidney) a function that loh thu Doctor-in a sawi a. February ni 16, 2021 khan LRM Hospital Aizawl ah Admit a ni a, March ni 10, 2021 khan tha takin a chhuak leh a, tichuan In lamah inenkawl zuiin, March ni 12, 2021 khan Dialysis a la tan a, amah pawhin ziawm lam a pan ve zel a, July ni 23, 2021 khan a oxygen level nasa takin a tlahniam a, a thisen te test tirin Haemoglobin level a hniam a, potasium a sang hle thung a, thisen te pawh pek nghal a ni. July ni 24, 2021 ah LRM Hospital-ah dah luh leh a ni a, thisen unit 2 pek leh a ni a, Dialysis a lak mek laiin a chauh avangin ICU-ah dah luh a ni a, a natnain zual lam pan zelin July ni 26, 2021 (Thawhtanni) chawhnu dar 1:50 ah chatuan ram min pan san ta a ni.
VUINA PROGRAMME
A hmun : Ramhlun North Biak In mual Biak In
A hun : Ni 27.7.2021 (Thawhlehni) Dar 10:00 AM
Vuitu : Rev. Dr. C. Lalhlira, Moderator, Mizoram Synod
Chanchin sawi : Upa Lalrinmuana, Secretary (Sr.), Mizoram Synod
Thlamuanna thuchah : Rev. Dr. C. Lalhlira, Moderator, Mizoram Synod
Tawngtaisakna : Rev. Z.D. Lalhmachhuana, Secretary (Jr.), Mizoram Synod
Hla KHB 399 : ‘Lalpa i rawngbawla min koh hi’ (Rimawi hmanga rem tur)
Malsawmna : Rev. B. Sangthanga, Executive Secretary, Mizoram Synod
Thlanmual : Rev. Zothansanga, Bialtu Pastor, Ramhlun North