Rev. Rokhuma (kum 90), pensioner chu nizan dar 7:05 khan a thi a, vawiin (Nov. 4, 2021) chhun dar 12:00 hian Mission Vengthlang Kohhran Biak Inah Rev. Dr. C. Lalhlira, Moderator, Mizoram Synod-in a vui.
A pian leh mûrna leh chhûngkua: Rev. Rokhûma hi April 17, 1931 khân Thingdawl Mel 8-ah a piang a. Kum 1934-ah Khawrihnimah an pem. A pa Kâpthangvunga, a nu Chhîngtei a ni a; unau paruk, hmeichhia pahnih leh mipa pali an ni. An unau chu :
1. Upa T.S. Liana (L), Bairabi
2. Upa V.L. Bawia (L), Tuikhuahtlang
3. Lianhnuna (L), Khawrihnim
4. Liantluangi (L), Khawrihnim
5. Rev. Rokhuma, Mission Vengthlang
6. Darchhungi (L), Khawrihnim
A pa hi kut hnathawk mi, rethei tak chhûngkua ni mah se, bahra lai leh pûr phur chungin a fapate chu Aizâwlah sikul a luhtîr vek thei a. Kum 1965-ah Rev. Rokhuma chu Champhai khuaa Sâptâwna leh Lalbiaki te fanu Lalthanpâri nên an innei a, a nupui hi Tirhkoh Thangchhûma tunu,Primary zirtîrtu a ni. Fa paruk, mipa pathum leh hmeichhia pathum an nei a; chungte chu :
1. Talo Rosanga (L) h/o Lalneihsangi, Mission Vengthlang
2. Dr. Lalrozama h/o Jenet Lalthanpari, Mission Vengthlang
3. Lalrokima h/o Lallianpuii - Mission Vengthlang
4. Lalrohlui w/o Lalhmachhuana Sailo, Khatla
5. Lalropuii - Mission Vengthlang
6. Ronungi - Mission Vengthlang
Tu 13 leh tuchhuan 5 a nei bawk
Zirna lam: Khawrihnîm Primary Sikulah Scholarship hmu phâk khawpa tithain Primary a pass a. Chumi hnuah Boys’ Middle School-ah a lût a, kum 1948-ah Scholarship hmu pha bawkin a pass leh a. Tichuan, Merit Scholarship chu hmangin Mizo High School-ah kum 1953 khân matric a zo leh a ni. Chumi hnuah Mizoram sawrkârah LDC hna a thawk a; dah ngheh (confirmed) a nih hnuah BA zir a duh avângin Delhi-ah a kal a, chutah chuan Finance Departmnent-ah LDC hna bawk a thawk leh a. Sawrkâr hna thawk chungin zânah College a kal a, kum 1961-ah BA a zawh hnuah B.D. zir chhunzawm nghalin tluang takin kum 1964-ah B.D. chu a zo ta bawk a ni.
Pathian kohna: Thenkhatte sawi anga khawi lai hmunah emaw, chumi zân khami zânah chuan tih tur angin Pathian kohna a dawng lem lo va; mahse, rawngbâwl a duh leh tûl a tihna chu a nunah tihmâkmawh thleng angin a awm tlat lawi si a. Chu chu ringtu nu leh pa, thlarau mite hruai a nihna leh kohhran enkawlnaa thang lian a nih avânga a chan leh a neih a ni.
Chutiang chuan a rawngbâwlna atân Pathianin duhsak tak leh khawngaihnain a chhawm chho zêl a, thil tha lo lakah pawh mak takin a hum him leh thîn. A naupan lai atangin tu nên maha eng lai maha insual ngai lo a ni a. Rilru dawih vâng aiin Pathian enkawlna leh hruaina avânga chutianga nung thîn chu niin a inhre hial thîn.
Rawngbâwlna: B.D. a zir zawh dâwn kum 1963-ah Synod Inkhâwmpui chuan Champhaia Pro. Pastor hna thawk tûrin a lo ruat a. Tichuan, kum 1964-a a zir zawh chuan Champhaiah a thawk ta nghâl a. Mahse, thla khat pawh a awm hmain Ramthar rawngbâwlna atân North East Frontier Agency (NEFA, tuna Arunachal Pradesh) rama Siang District-ah Private English Medium School-ah zirtîrtu hna a zu thawk a. Heta a awm lai hian Kum 1965 Synod Inkhâwmpui chuan kum 1966 Synod-a nemngheh tûrin a rêl a. Tichuan, kum 1966 Synod Inkhâwmpuiah Rev. C. Pazawna, Moderator-in a nem nghet a ni. A thawhna ram Siang District-a Deputy Commissioner chuan Chanchin Tha hril nia a rinhlelh avângin kum 1967 tâwp lamah chuan a hnawt chhuak a, Aizâwlah a haw a. Mahse, kum 1967 Synod Inkhâwmpui chuan Mikir ram, Karbi Anglong-a thawk tûrin a ruat leh a. A remchân ang anga APMK (ZPMK) pawh enkawl tûra tih a ni. Kum 1968 tîrah Mission Veng Biak Inah an thlah nghe nghe.
He mi tum hian thil thleng mak tak a awm a, Mizoram chu kum 1966 a ram a buai avângin missionary zawng zawng an rama haw vek tûrin sawrkarin thupêk a chhuah a. Chuvâng chuan missionary pawh anmahni remchân dân ang zêlin an tîn a. Missionary zînga haw hnuhnung ber Pi Teii (G. Rees Roberts) leh Pi Feli (J.M. Horner) Synod hminga thlah leh Mizoram Presbyterian Kohhranin ramthar lam hna thawk tûra a ruahman anga Rev. Rokhûma te chhûng thlah hi a inrual chiah a ni. Mikir ramah chuan kum 1968-82 thleng, kum 15 lai an thawk a ni.
Kum 1982 Synod Inkhâwmpui chuan Missionary Training Centre-a Dean hna leh Ramthar Hostel-a warden hna thawk kawp tûrin a ruat a. Kum 1985 &1986 Synod Secretary-ah te, 1988-ah Moderator (hun pum ni lova thawk hnuhnung ber a ni), 1989-91 chhûng Senior Executive Secretary a chelh a; kum 1992-93-ah Missionary Training Centre enkawl turin Dean atân ruat a ni leh a, tichuan kum 1994-ah pension-in a chhuak ta a ni. A pension hnu1995-1997-ah Synod Finance Officer hna a chelh leh a ni.
Synod aiawhin Assembly Executive Committee member-ah te a awm a, Ecumenical Church Loan Fund member-ah te, Church’s Auxiliary for Social Action (CASA) member bakah ZPMK a enkawl chhûngin inkhâwmpui Chairman hna te a thawk thin bawk. Ramthar Chanchinbu chhuah tirh 1984-2004 (kum 20) chhung Editor a ni.
Harsatna bîk leh lâwmna bîk: Rev. Rokhûma hian a rawngbâwl chhûng hian sawi tûr ting chuan harsatna a tâwk a. NEFA sawrkârin a hnawhchhuah te chu harsatna a tawh anga sawi theih a ni a. Chu bâkah an chhûngkua pawh dam lohnain a tlâkbuak ve fo bawk. Ramthim sutu an ni bawk a, malaria pawh an vei thîn. Mahse, chûng kârah chuan tluang tak leh hlim takin a hna chu a thawk thei zêl a ni. Pathianin a kohhran a hruai zêl dân te, kohhranin mi rinawm tak tak Pathian hruai mi a hmuh te, ringtu nun lo thianghlim chho zêl a hmuhte chu a rawngbâwlnaa a lâwmna leh a hlimna a ni thîn. Zirtîrna chungchângah pawh ngaih dân hrang hrangin nuaiin Fundamentalism leh Modernism ngaih dânin kan kohhran nuai vêl thîn mah se, kohhran chu rinawm tak leh ngîl taka a kal zêlnaah a lâwm thin hle a ni.
Rev. Rokhuman 1965-a Pangpar Bawm tih a lehlin chuan chhiar a hlawh hle a, lehkhabu chi hrang hrang a ziak hengte hi a ni:-
1. 1&11 Lalte Hrilhfiahna
2. 1 & 11 Petera lehkha thawn hrilhfiahna
3. Ephesi lehkhathawn hriilfiahna
4. Hebrai lehkhathawn hrilhfiahna
5. Senior Dept. zirlai bu (1983)
6. Field Education
7. Deuteronomy hrilhfiahna
8. Thuthlung Hlui zirna
9. Bible Thu zirna bu
10. Mizoram zirna siam that (2015)
A mizia : Rokhûma hi mi zaidam, hawihhawm, thawhpui nuam tak, mi invawng thei tak, mi dik leh rinawm , mahni hnaa inpe pumhlum tawp mai, rawngbâwltu duhawm tak a ni. Sap tawng a thiam hle a, Type writer-a thil chhutte pawh a thiam em em a ni. Office-a a thawhpui, a staff-te tawngkam na dengkhawng takin tu mah a be ngai lo va. A duh dan chu dam tak , hriat nuam takin a hrilh thin a ni. Rev. Rokhûma hian a rawngbâwl chhûngin nupa tuak 86 a inneihtîr a, mi 316 a baptis bawk.
A hun hnuhnung : Vanduai thlak takin Covid-19 a lo kai ve avangin October 10.2021-ah ZMC-ah dahin 25.10.2021-ah negative result neiin a chhuak a, a chuap leh a lungte check up a duh avangin ina haw loin Aizawl Hospital-ah luhpuiin ni 28.10.2021-ah tha takin a chhuak leh a, in lamah enkawl zui a ni. October 31, 2021-ah a pum nuam loin thil ei chakna pawh a nei lo va, na chhawkna te pea an inenkawl laiin November 3, 2021 (Ningani) zan 7:05-ah Lalpa hnenah min chawlhsan ta a ni.
VUINA PROGRAMME
A hmun : Mission Vengthlang Kohhran Biak In
A hun : Ni 4.11.2021 (Ningani) Chhun Dar 12:00
Vuitu : Rev. Dr. C. Lalhlira, Moderator, Mizoram Synod
Chanchin sawi : Upa Lalrinmuana, Secretary (Sr.), Mizoram Synod
Thlamuanna thuchah : Rev. Dr. C. Lalhlira, Moderator, Mizoram Synod
Tawngtaisakna : Rev. Lianhmingthanga Sailo, Sr. Executive Secretary, Mizoram Synod
Hla : ‘Ram ni eng tak chu a awm a’ KHB 499 (Rimawi hmanga rem tur)
Malsawmna : Rev. Lalramliana Pachuau, Finance Officer, Mizoram Synod
Thlanmual : Rev. P.C. Pachhunga, Mission Vengthlang