Rev. Lalhmingthanga (kum 81), pensioner chu nizan (Sept. 7, 2022) dar 6:45 khan Synod Hopital-ah a thi a, vawiin (Sept. 8, 2022) chhun dar 12:00 hian Republic Vengthlang Kohhran Biak Inah Rev. Dr. C. Lalhlira, Ex-Moderator, Mizoram Synod-in a vui ang.
Rev. Lalhmingthanga hi kum 1941 September 17 khân Mizoram chhimchhak Thêntlâng khuaah a lo piang a. Unau pianpui mipa panga leh hmeichhia pakhat a nei a. Amah hi an unau zinga a naupang ber dawttu a ni. A pa chu Upa Bûkchhuaka a ni a, a nu chu Pi Chawngchhungi a ni. A pa hi Assembly Preacher a ni, a nu hi Pu Zosaphluia hunlaia Bible Women zirho zinga mi a ni. Rev. Lalhmingthanga hi Thêntlâng khuaah sei lianin Kohhranah a theih ang angin a inhmang a, Kohhran Upa atân thlan a ni.
Kum 1971 khân Zonunmawii nên inneiin, fa pali an nei a, chûngte chu : Lalthantluangi, Malsâwmtluanga, Lalrêngpuii leh Lalhruaitluanga te an ni a. Hemi hnu hian Saichhîngpuii nên ni 17.4.1991-ah an innei leh a, fa pathum an nei a. Chûngte chu Imanuel Lalzârmawia, Esther Lalnilâwmi leh Angel Zaithanmawia te an ni.
Thingtlâng khuaa seilian a nih avângin High School thleng chauh a kai a. Kum 1963 khân Aizawl Theological School-ah a lût tan a, Pathian thu a zir zawh chuan kum 1965 Synod Inkhâwmpuiin Pro. Pastor atân a la a, Kanghmun leh Saitual Bialah te Pro. Pastor-in a awm a ni.
Synod Inkhâwmpuiin a lo rêl angin Bialtu Pastor indaih lohna avânga Pro. Pastor kum hnih leh a chanve thawk tawhte nem ngheh hun June 2, 1968-ah nemngheh a ni a. Hengah te hian rawngbawl hna thawkin a awm tawh :
1. Ngopa Bial : July 1968 - 1972
2. Kolasib Bial : 1973 - 1977
3. Lengpui Bial : 1978
4. Pathian thu zirin : 1978 - 1980
5. Rabung Bial : 1981- July 1983
6. Synod Publication Board : Aug. 1983 - 1985
7. Khawlailung Bial : 1986 - 1988
8. Bible Correspondence Course (ATC) : 1989-1992
9. Muallungthu Bial : 1993 - 1995
10. Synod Office : 1996
11. Bible Correspondence Course (ATC) : 1997 - 2001
Rev. Lalhmingthanga hian Pastor hna a thawh chhung hian a Bial chhûnga a ngaih pawimawh hmasak ber chu Bial pum Kohhranho inpumkhatna a ni a. “Mihring dinhmun hi inchen vek lo mah ila, Kohhran kan nihhonaah chuan tu mah kan sângin kan hniam tûr a ni lo,” a ti thîn. Pastor Bial-ah kum emaw chen a awm hnuin, an chhûngkua harsatnain a tlâkbuak a; chuvângin Revival Director pui tûrin Synod Office lamah lâk a ni a. Chuta tang chuan ATC lamah Bible Correspondence Course Office lamah a thawk leh a. Chuti chuan kum 2002 January 1 atangin pension-in a châwl ta a. Republic Vengthlangah hian inbengbelin Republic Vengthlang Kohhranah hian a lawi ta a ni. A rawngbâwl chhûngin mi 300 a baptis a, tuak 120 a inneihtîr bawk. Kum 34 rawng a bâwl chhûngin Pastor Bial pariatah a awm hman a ni.
Tun hma atangin BP sang leh pum tha lo natna hian a tibuai ve reng a, September 30, 2021 atang khan a natna avangin a ngaihtuahna te a buai a. Doctor-te rawnin a inentir a; hemi atang hian a chak lo zual ta zel a, Biak In pawh a thleng thei ta lo a ni. A theih ang anga inenkawl zelin June 2022 thla atangin chhungkaw zingah chaw a kil ve thei ta lova. Chutiang a nih avang leh khawsik awmnâte’n a tlakbuak zui tak avangin September 5, 2022 khan a Oxygen Level a hniam a, In lamah Oxygen pek niin a tuk zanah (September 6, 2022) Synod Hospital panpui a ni a, Hospital lam chuan uluk taka lo endikin Dengue natna a nei tih an hmuchhuak leh ta ni.
September 7, 2022 (Nilaini) chhunah ICU-ah dah luh a ni a, ventilator-te hmangin Doctor leh nurse-te’n theihtawp an chhuah laiin, zan dar 6:45-ah chatuan ram a pan ta a ni.
VUINA PROGRAMME
A hmun : Republic Vengthlang Kohhran Biak In
A hun : Ni 8 September, 2022 (Ningani), chhun dar 12:00 (Noon)
Vuitu : Rev. Dr. C. Lalhlira, Ex-Moderator, Mizoram Synod
Chanchin sawi : Rev. Z.D. Lalhmachhuana, Secretary (Sr.) Mizoram Synod
Thlamuanna thuchah : Rev. Dr. C. Lalhlira, Ex-Moderator, Mizoram Synod
Zaipawl : Republic Vengthlang Kohhran Zaipawl
Tawngtai sakna : Rev. C. Zorammawia, Senior Exe Secretary, Mizoram Synod
Hla (KHB No.466) : ‘Thihna lui piahah khawpui mawi tak chu a awm’
Malsawmna : Rev. Dr. K. Lallawmzuala, Exe. Secretary, Mizoram Synod
Thlanmual : Rev. C. Thangthuama, Bialtu Pastor