June 6-8, 2023 chhung hian Synod Executive Committee vawi 302-na chu J.M. Lloyd Hall, Synod Office-ah an thu a. He meeting hi Rev. Dr. C. Chawnghmingliana, Synod Moderator-in a kaihruai a ni.
Upa B. Lalhmunliana, Synod Secretary hnen atangin report ngaihthlak a ni a. Report-ah hian May 21, 2023 (Pathianni)-ah zirna sang zawk zir zo Pastor 8-te chu an awmna tur Bialah theuh induct an nih thu te, P.C. Wales Gen. Secretary, Rev. Nan Wyn Powell Davies-in Mizoram a rawn tlawh thu te, US Consul General Melinda Pavek-in Synod Office a tlawh thu te, Kohhran Inpumkhatna Joint Committee May 19, 2023-a neih a nih thu te, Manipur-a Meitei leh tlang mite buaina avanga harsatna tawkte tanpuina chungchanga OM member-ten Mizoram Chief Minister Pu Zoramthanga an kawm thu te leh Synod hmalakna hrang hrang dangte tar lan a ni.
Rev. V. L. Luaia Hranleh, Finance Officer-in Finance Officer report a pe bawk a. Kum 2022-2023 chhunga Mizoram Synod-in Pastoral bika sum a hmuh zawng zawng chu cheng 2,09,78,41,247 a ni a, Mission-a sum hmuh zawng zawng chu cheng 1,62,94,35,161 a ni thung a, a vaiin cheng 3,72,72,76,408 a ni a. Kum hmasa khumna chu cheng 56,79,20,267 a ni. Hetah hian Bial hrang hrang atanga thawhlawm thehluh zat chu cheng 3,47,59,13,799 a tling a ni. Hmanna lamah - Pastoral-a sum hman zawng zawng cheng 1,73,14,40,695 a ni a, Mission-a sum hman cheng 1,34,31,39,705 a ni thung a, a vaiin cheng 3,07,45,80,400 a ni.
Tun tum SEC thut khawmah hian agenda 60 chuang ngaihtuah ho a ni a. Thu ngaihtuah zingah hian Synod Pay Commission chungchang te, Synod Hospital Centenary puala Project ruahman chungchang te, Synod Service Board hna lak dan ruahmanna te, IMA-a Associate Gen. Secy post ruak hnawh khah chungchang te, Biak In leh a vela rualbanlote tana remchanna siam chungchang te, Council of Churches in Mizoram kalphung leh ruangam chungchang te, Corruption do leh a kaihhnawih chungchang te, Nupa chungchang Dan enthat chungchang te, Inkhawm tihtlem chungchang zir chianna te leh Prescom Department enthatna te, Presbyterian Church of Myanmar nena thawh hona enthatna te a tel a ni.
For more pics Click Here