June 14, 2023 (Nilaini) zan dar 7:00 khan Synod Social Front buatsaih Cement Mistiri Training kharna hun Pi Zaii Hall, Synod Conference Centre-ah neih a ni.
Cement Mistiri Training hi May 15 atanga June 14, 2023 chhung khan Synod Conference Centre-ah neih a ni a. Zirtirtu atan mithiam rual (engineer) te rawih an ni a, mi 29-in training hi tluang takin an zo a ni. Training-ah hian kar khat chhung theory class an nei a, theory class zawhah Supervisor kaihhruaina hnuaiah mimal in sain practical training kar thum chhung an nei bawk.
Training kharna hun hi Rev. V.L. Luaia Hranleh, Executive Secretary-in a kaihruai a. Rev. Dr. C. Chawnghmingliana, Synod Moderator-in Thuchah sawiin Training chhuakte hnenah Certificate leh Cement mistiri-te hmanraw mamawh tur thil chi hrang hrang a hlan a. Training resource person leh Trainees aiawh ten thu an sawi bawk. He hunah hian Trainees-te atangin Zaipawl leh One in Christ te an zai a ni.
Synod Social Front hian eizawnna mumal neiloten eizawnna an neih theih nan kut themthiamna training chi hrang hrang Aluminium Mistiri Training te, Plumbing Training te a lo buatsaih tawh thin a. Tun tumah hian Cement Mistiri Training hi a buatsaih ve leh ta a. Heng training chi hrang hranga training chhuak tam tak hian eizawnna an neih phah tawh a ni.